Pagmaigotan na Makakua nin Naghihinanyog na Talinga
1 An dakol na tawong nanonompongan niato sa satong ministeryo sa harong-harong mayo nin espirituwal na mga bagay sa saindang isip. Tibaad sibot-sibot sinda sa saindang sadiring mga problema. Tanganing makapoon nin pag-orolay, parateng pinakamarahay na ipakipag-olay an mga bagay na pinagkakainteresan kan dakol sa lugar na iyan. An mga hapot puwedeng gamiton tanganing pukawon an interes. Pinakaepektibo an punto-de-vista na mga hapot na dai napapasopog an mga tawo.
2 Puwede kamong makakua nin naghihinanyog na talinga paagi sa paggamit nin arog kaining pagdolok:
◼ “Marahay na aldaw. Ako si _____. Taga-digdi ako sa pagtaraed. An dakol na nakaolay ko ngonyan na aldaw nahahadit manongod sa [sambiton an bago pa sanang bareta na nangyari sa pagtaraed o bagay na pinag-oorolayan sa lokal]. Sa paghona daw nindo katuyohan nin Dios na magin arog kaini an kinaban?” Pasimbagon. Sa puntong ini puwedeng itampok an tract na Life in a Peaceful New World. Ipaliwanag nin halipot an ilustrasyon sa pahina 1 asin an impormasyon sa pahina 1-3 sagkod na itinotogot nin oras. Kun nagkaigwa nin interes, an librong Mabuhay Sagkod Lamang puwedeng iintrodusir. Puwede nindong darahon an atension sa Salmo 37:9, 10 na kinotar sa pahina 157 asin basahon iyan sa libro. Ginagamit an retrato sa pahina 156-7, ipaliwanag an matanos na mga kamugtakan na mangyayari sa bilog na daga kun mayo na an karatan.
3 Perming magin andam na ialok an Torrengbantayan asin Awake! An mga tawo sa gabos na lugar nahahadit sa pagraot nin moral. Mantang binabasa nindo an Setyembre 8 Awake!, pumili nin pirang punto na hinohona nindong makakapukaw nin interes sa mga tawo sa saindong teritoryo. Positibong itaram an manongod sa mga pakinabang nin pagsunod sa sadol kan Tataramon nin Dios. Sa paghinanapos kan bulan, kun iiniintrodusir an Setyembre 22 na Awake!, darahon an atension sa artikulo na nagtatampok kan sadol kan Biblia manongod sa mga bagay na nakaaapektar sa sato. An bago patin daan na mga luwas kan Torrengbantayan asin Awake! puwedeng itampok ano man na oras apuwera sa espesyal na mga aldaw na itinalaan para sa pag-alok nin mga magasin.
4 Girumdomon na an satong patolodan iyo na pukawon an interes sa mensahe kan Kahadean. Tanganing magibo ini kaipuhan nguna niatong kuanon an atension kan kagharong asin animaron an saiyang pag-isip. Papangyarihon kaini an arog-karnerong mga tawo na magustong maghinanyog nin orog pa mapadapit sa katuyohan ni Jehova para sa katawohan.—Sal. 85:8.