Tabangan an Arog-Karnerong mga Tawo na Makatogdok sa Solidong Pundasyon
1 An pagtogdok nin harong nagkakaipo nin maingat na pagpaplano asin konsentradong paghihingoa. Pakadisenyo kan harong, kaipuhan na andamon an lugar na totogdokan asin magbugtak nin solidong pundasyon. An proyekto progresibong nahahaman sagkod na sa katapustapusi makompleto iyan. Kaagid kaiyan, kaipuhan niatong tabangan an arog-karnerong mga tawo na progresibong manodan an katotoohan. Hinihingoa niatong pukawon an interes sa enot na pagdalaw. Pakatapos kaiyan, naggigibo kita nin mga pagdalaw liwat, na ibinubugtak an pundasyon paagi sa pagtotokdo kan pundamental na mga katotoohan dapit sa Dios asin sa saiyang katuyohan para sa katawohan.—Luc. 6:48.
2 Durante kan bulan na Nobyembre iaalok niato an librong “Mabuhay Sagkod Lamang” sa mga interesado. An satong pasohan bako sanang an makapasakamot nin literatura kundi oras na mawalatan niato an tawo, baga man nin sarong tract o iba pang publikasyon magigin interesado kitang bumalik tanganing makatogdok sa ibabaw kan ibinugtak na pundasyon. Sa pagdalaw liwat niato boot niato na magkaigwa nin espisipikong mga punto sa isip, asin progresibong itogdok an pundasyon. Sa kada pagdalaw nagtatalubo an kaaraman kan kagharong asin nadudugangan an saiyang pagtubod sa Dios.
3 Kun nakapasakamot kamo kan librong “Mabuhay Sagkod Lamang” sa pagdalaw liwat puwede kamong magsabi:
◼ “Naoogmang gayo ako na manompongan kamo sa harong. Tibaad nagigirumdoman nindo na kan huri kitang mag-olay, napag-olayan niato an nagrururong interes sa Dios sa lokal. Malinaw na sinasabi kan Biblia na an Dios interesado sa katawohan asin na an mga matanos bebendisyonan paagi sa saiyang Kahadean. [Basahon an Mateo 6:9, 10.] Paagi sa Kahadean na ini, an katanosan asin hustisya magdadanay.” Basahon an Isaias 11:3-5, dangan darahon an atension kan kagharong sa enot na duwang parapo sa kapitulo 1 kan librong Mabuhay Sagkod Lamang. Idemonstrar kun paano puwedeng pag-adalan an materyal.
4 Kun an tract na Peaceful New World ikinapasakamot sa enot na pagdalaw, an pangenot na mga punto na pinag-olayan puwedeng repasohon. Idoon na tanganing mabuhay sa bagong kinaban, kaipuhan niatong kumua nin tamang kaaraman. Basahon an Juan 17:3. Ipaliwanag na pakakua nin siring na kaaraman, kaipuhan niatong gibohon an kabotan nin Dios. Basahon an 1 Juan 2:17. Darahon an atension kan kagharong sa espisipikong mga punto sa pahina 5 kan tract.
5 Kun itinatampok an tema manongod sa buhay pampamilya kun iinaalok an librong “Mabuhay Sagkod Lamang,” sa pagdalaw liwat nindo, puwede nindong sabihon:
◼ “Kan huri kong pagdalaw, pinag-olayan niato an tema manongod sa buhay pampamilya. Nagkaoyon kita na tanganing magkaigwa nin maogmang buhay pampamilya, kaipuhan na sunodon an mga giya na yaon sa Biblia. Ano daw sa paghona nindo an kaipuhan tanganing gibohon na mapanggana an pag-aragoman?” Pasimbagon. Idoon an espisipikong mga punto gikan sa impormasyon na itinao sa pahina 243-6 sa librong Mabuhay Sagkod Lamang. Hagadon an mga komento kan kagharong manongod sa mga ilustrasyon asin pag-olayan an piniling mga punto na angay.
6 Kun iwawalat nindo an tract na Enjoy Family Life, sa pagdalaw liwat nindo repasohon an pangenot na mga prinsipyo sa Biblia na itinao sa pahina 4 asin 5. Kun ipinaheheling an interes, ialok an librong Mabuhay Sagkod Lamang. Itokdo an kapitulo 29, “Ginigibong Mapanggana an Buhay Pampamilya,” asin ipaheling kun paano ini ipakikipag-olay sa kagharong asin sa saiyang pamilya.
7 Kita gabos maninigong magkaigwa nin regular na pakikikabtang sa paggibo nin mga pagdalaw liwat. Kultibaron an gabos na interes na ipinaheling paagi sa paggibo nin epektibong mga pagdalaw liwat durante kan Nobyembre.