Kanigoan Kapakipakinabang na Isaysay an mga Ginibo ni Jehova!
1 An pinasabngan na kagsurat kan Salmo 48 sinadol an mga taga-Israel na ‘magmartsa sa palibot kan Sion, bilangon an mga torre kaiyan, kalagkalagon an mga palasyo kaiyan, tanganing ikasaysay ninda iyan sa kapag-arakian na madatong.’ Napahiro kan pagkamoot ki Jehova, odok sindang interesado sa gabos na detalye kan daganon na sentrong iyan nin teokratikong pamamahala. Kanigoan kahalagang gayo kan mga detalyeng ini huli ta ini an siudad na dian ibinugtak ni Jehova an saiya mismong ngaran! Pinag-oorolayan ninda iyan, asin nangorogna na sinierto ninda na an saindang mga aki makadangog dapit sa gabos na bagay na pinahalagahan nindang marhay sa saindang puso.—Sal. 48:12, 13.
2 Nabubuhay kita ngonyan sa panahon na an sentro kan teokratikong pamamahala kan Mesiyas ni Jehova bako nang sa daganon na Sion kundi nasa langitnon na Jerusalem. (Heb. 12:22) An Kahadean ni Jehova sa mga kamot ni Jesu-Cristo namamahala na poon pa kan 1914. (Kap. 12:10) Dakulaon nanggad an satong interes sa aktibidad kaiyan. Interesadong gayo man kita sa kun paano giniyahan ni Jehova an saiyang mga lingkod digdi sa daga tanganing maotob ninda an saiyang kabotan bilang naheheling na mga representante kan Kahadean na iyan. An interesanteng marhay na mga detalye manongod kaini ilinaladawan sa satong bagong libro na Jehovah’s Witnesses—Proclaimers of God’s Kingdom. Naogmang gayo kita na maresibi iyan sa nakaagi pa sana niatong “Banal na Pagtotokdo” na Pandistritong Kombension!
3 Kan Setyembre 1, 1993, an libro ilinuwas na sa 20 lenguahe, asin nagpapadagos an pagtradusir asin pagpublikar tanganing mapanigoan an mga pangangaipo kan mga nagtataram nin 13 iba pang lenguahe. Nakakua daw nin sarong kopya an saindong pamilya? Binabasa daw nindo iyan? Ipinakikipag-olay daw nindo an mga nanodan nindo dian?
4 Pakatapos na maheling an mga retrato asin mabasa an mga kapsion, siring kan isinuherir sa kombension, an dakol na tugang na lalaki asin babae tolos na duminiretso sa pangenot na laog kan materyal. Ano an saindang nagin komento? Uya an nagkapira sana.
5 An sarong tugang na babae nagsurat: “Ini sana an librong naresibi ko kasuarin pa man na gustohon ko nang matapos tanganing mabasa ko otro iyan. Nasa kapitulo 25 na ako ngonyan. Sagkod na nagbabasa ako, sige man an pagluha ko asin napapano an sakong puso nin pagkamoot ki Jehova. An libro nakapakokosog na gayo asin nakaparirigon sa pagtubod.”
6 An sarong tugang na lalaki na labi nang 40 taon na naglilingkod ki Jehova nagsabi: “Dai ko aram na magigin makawiwili an librong ini. Nagpamatanga ako asin amay na nagbangon patin natapos ko an libro sa laog nin duwang semana. Iyan talagang saro sa pinakanakapahihirong libro na nabasa ko kasuarin pa man. Iyan sarong obra maestra nin pagsiyasat pero obra maestra man nin pagpakosog.”
7 Regular na Programa sa Pagbasa: An iba na marikas na binasa an bilog na libro desididong basahon giraray iyan pero ngonyan luway-luway na.
8 Kun labi sa saro an miembro kan saindong pamilya na nasa katotoohan, tibaad booton nindo na gamiton an nagkapirang kabtang kan libro sa saindong pampamilyang pag-adal. Pinonan na gibohon iyan kan ibang pamilya mga pirang aldaw pa sana pakaresibi ninda nin sarong kopya sa kombension. Dai ini nangangahulogan na an ibang bagay, arog baga kan pag-andam para sa Pag-adal sa Torrengbantayan, maninigo nang pabayaan. Pero puwedeng manompongan nindong kapakipakinabang na gumamit nin 15 o 20 pang minuto para sa pagbasa asin pag-orolay kan materyal sa librong Proclaimers.
9 An ibang pamilya nagbabasa nin duwa o tolong pahina—puwedeng saro o duwang subtema—kada banggi pakapamanggi. Bilang indibiduwal puwedeng nabasa na ninda an kadaklan kan libro, pero nakikinabang sinda sa mas maluway na pagbasa kaiba an oportunidad na pag-orolayan an materyal. An ibang naggigibo kaini dakol nang taon na naglilingkod ki Jehova. Mantang nagbabasa sinda, dakol na makaoogmang mga memorya an napupukaw. Pinaoogma kaiyan an saindang puso mantang magkairiba nindang pinag-oorolayan an sadiri nindang kabtang dapit sa mga pangyayari na saindang nababasa.
10 Huli sa mga kamugtakan sa saindong harong, tibaad manompongan nindo na solo kamo sa pagbasa. An sarong tugang na babae na suminurat sa Sosyedad nagsabi: “Binabasa ko an librong ini nin padiitdiit barubanggi bago magtorog. An librong ini nagpapatalubo sa sako nin mas hararom na pag-apresyar asin pagkamoot para sa katotoohan, asin nakakamate akong mas harani ki Jehova asin nagpapasalamat na marhay na ako kabtang kan saiyang organisasyon. Talagang ginaganahan ako sa kada pahina na sakong binabasa.”
11 Dawa ngani dakula an libro, an indibiduwal na mga kabtang bako. An enot na kabtang marikas an dalagan pero interesanteng pagkobre sa mga pangyayari poon kan kaaldawan ni Abel sagkod sa taon 1992—sa 108 sanang pahina. An ibang kabtang poon 13 sagkod 150 pahina. An kada saro kan mga kabtang na ini binanga sa nagkapirang kapitulo. Imbes na hidaleon iyan, sarosaroon an pagbasa nin sarong seksion, sarong kapitulo, o sarong subtema; maogma kaiyan asin makinabang dian.
12 Tawan nin Panahon na Horophoropon an Saindong Binabasa: Ano dapat an pasohan nindo mantang kamo nagbabasa? An pagbasa sana sa mga pahina—pag-ubos sa libro—bakong an maninigong magin katuyohan nindo. An librong Proclaimers igwa kan rekord kan saindong espirituwal na mana. Maninigo nindong aramon nin marhay iyan. Tawan nin panahon na horophoropon an mga kahulogan kan saindong binabasa. Mantang rinirepaso nindo an aktibidad kan suanoy na mga saksi ni Jehova, horophoropon kun paano nindo maaarog an saindang pagtubod. (Heb. 12:1, 2) Kun binabasa nindo an dapit sa paglataw kan dakulang apostasiya, nangorognang mangnohon an mga peligro na nakasiod duman sa mga buminaya, na an katuyohan ingatan an saindong espirituwalidad. Asin mantang rinirepaso nindo an satong kasaysayan sa modernong aldaw, mangnohon an espirituwal na mga kuwalidad kaidtong mga ginamit nin Dios, kun paano ninda ipinaheling na an paggibo kan kabotan nin Dios iyo an pinakaimportante sa saindang buhay, asin kun ano an saindang reaksion sa mga situwasyon—an iba kaiyan masakiton—na itinogot nin Dios.—Heb. 13:7.
13 Manonompongan nindong nakaparirigon sa pagtubod an pagsiyasat sa mga detalyeng nagpapaheling kun paano giniyahan ni Jehova an saiyang banwaan pasiring sa malinaw na pakasabot kan katotoohan sa Biblia na nakakamtan niato ngonyan. Matalubo an saindong apresasyon sa naheheling na areglo na ginagamit ni Jehova mantang mas nagigin pamilyar kamo sa pag-oswag kan organisasyon. Siertong maoogma kamo mantang binabasa nindo kun paano, bilang kaotoban kan hula, an maogmang bareta nakaabot sa pinakaharayong parte kan daga. Mapaoogma an saindong puso kan mga eksperyensia nin mga maimbod sa gabos na parte kan kinaban na naglingkod nin maigot sa pagbalangibog kan Kahadean. Mapakokosog kamong atubangon an personal na mga pagbalo mantang binabasa nindo an mga natagalan na kan maimbod na mga tugang na lalaki asin babae huli sa saindang pagkamoot ki Jehova.
14 Pakabasa nindo nin sarong kabtang kan materyal, magtao nin panahon na iribang pag-orolayan an kahalagahan kaiyan asin repasohon an mga detalye. Kun igwa kamong saradit na aki, iiba sinda sa pagpaliwanag kan mga retrato asin pagsabi saindo kan aram ninda manongod sa ipinaheheling na mga tawo. Dawa solo kamong nagbabasa, pagmaigotan na ihiras sa iba an saindong nanonodan. Kun angay, gamiton an materyal sa mga pagdalaw liwat asin kun nagkokondukta nin mga pag-adal sa Biblia sa harong. An pag-otro nindo kaiyan itutudok iyan sa saindong isip asin puso, asin pakikinabangan man iyan nin iba.
15 Magkainteres sa mga Detalye: An mga panahon na ginagamit nindo sa pagbasa kan librong Proclaimers maninigong magin maogma asin kapakipakinabang.
16 Boot daw nindong pasyaran kan saindong pamilya an pankinaban na opisina prinsipal kan mga Saksi ni Jehova? An pahina 208-9 ipinaheheling an mga pasilidad na ginamit kan Sosyedad sarong siglo na an nakaagi sa lugar nin Pittsburgh. An pahina 216-17 ipinaheheling saindo an mga edipisyo na ginamit kan huri sa Brooklyn. An mga retrato sa pahina 352-6 makatatabang saindo na iladawan sa isip an pankinaban na opisina prinsipal ngonyan. An kapitulo 26 asin 27 itinatao an mga detalye manongod sa mga trabahong ginigibo sa Bethel, asin an pahina 295-8 nagtatao nin dugang pang impormasyon dapit sa buhay sa Bethel.
17 An kadaklan sato dai nakakapasyar sa dakol na sanga kan Sosyedad. An pahina 357-401 kan librong Proclaimers ipinapasyar kamo sa kinaban. Dai kaipuhan na hidaleon iyan. Gumamit nin halipot na panahon sa kada nasyon asin maogma dian. Gamiton an mapa kan kinaban sa pahina 415-17 sa paghanap sa kada lugar. Basahon an mga komento na kaiba sa retrato kan kada sanga. Paagi sa indese makaheheling man kamo nin iba pang kawiliwiling impormasyon manongod sa kada nasyon. Gamiton an oportunidad na ini na makamidbid an mga miembro kan saindong espirituwal na pamilya sa ibang kadagaan.
18 Kun an mga tawo nagkakatiripon sa sosyal, kun beses nagkakarawat sinda nin mga kawat na kalabot an kaaraman sa sekular na mga pangyayari. Bako daw orog pang kapakipakinabang na maaraman an mahalagang mga petsa asin mga pangyayari sa modernong aldaw na historya kan banwaan ni Jehova? Maheheling nindo an dakol kaiyan na nalilista sa pahina 718-23 sa librong Proclaimers. An listahan na iyan nagtatao nin pundamental na impormasyon; puwede nindong dagdagan iyan hale sa mga detalye na nasa iba pang kabtang kan libro. Gamiton iyan na basihan sa pagrepaso. An mga barobata sa pamilya tibaad matutuom tolos iyan. An iba sa sato na mga may edad na tibaad mas maluway. Pero mga detalye ini nin teokratikong kasaysayan na dian kita gabos puwedeng makinabang huli sa pakaaram. Pakanood nindo sa mga petsa asin pundamental na mga pangyayari, magtogdok sa ibabaw kan pundasyon na iyan. Helingon kun gurano kadakol na detalye an magigirumdoman nindo manongod sa kada pangyayari. Dangan ipakipag-olay an kabtang kan kada pangyayari sa pag-otob kan kabotan nin Dios. Sunod, pag-olayan kun paano iyan nakaapektar sa saindo mismong buhay asin kun ano an kabtang nindo sa mga ginigibo ni Jehova.
19 Mansayon an mga Oportunidad na Bukas sa Saindo: Mantang binabasa asin pinag-oorolayan nindo an Jehovah’s Witnesses—Proclaimers of God’s Kingdom, maheheling nindong nabubuksan sa saindong pagheling an mamuraway na kaotoban kan Isaias 60:22. An libro nagsasabi sa pahina 519: “An kaotoban kan panuga na ‘an sadit mismo magigin sangribo’ tunay na naotob, asin abunda nanggad! Sa kada saro kan labing 50 nasyon na mayo ngani nin minsan ‘sadit’—na mayo ni saro kan mga Saksi ni Jehova kaidtong 1919, na mayo sindang ginibong ano man na paghuhulit—igwa na ngonyan nin labing sangribong paraomaw ki Jehova. Sa pira sa mga nasyon na ini, igwa ngonyan nin manampulong ribo, iyo, labing sanggatos na ribo pa ngani, kan mga Saksi ni Jehova na maigot na mga parabalangibog kan Kahadean nin Dios! Sa bilog na kinaban, an mga Saksi ni Jehova nagin ‘makosog na nasyon’—mas dakol an kabilangan bilang sararong panglobong kongregasyon kisa indibiduwal na populasyon kan arin man sa saro sa kisuerra 80 nasyon sa kinaban na may sadiring gobyerno.”
20 An gibohon na iyan nin pag-oswag kan Kahadean dai pa nanggad tapos. Al kontraryo, pinarikas pa iyan ni Jehova sa daing kaagid na sokol. Sagkod saen kamo makikikabtang dian? Talaga daw na naririsa nindo an gabos na oportunidad na bukas sa saindo? Mantang nanonodan nindo kun ano an ginigibo kan iba, mapahiro logod an saindong puso na idusay an saindong sadiri sa lubos na pakikikabtang sa mamuraway na gibohon na dinidirehiran kan satong mamomoton na Dios paagi ki Jesu-Cristo sa satong aldaw.