Tabangan an Iba na Makanood Dapit sa Pinakadakulang Tawo
1 Dakol na nakabasa kan librong The Greatest Man Who Ever Lived an nagpahayag nin pag-apresyar sa epekto kaini sa saindang buhay. An saro nagsurat: “Pakatapos kong mabasa an libro, namatean kong garo baga ako inagda ni Jesus na makiiba sa saiya, masa kataning nia, makidamay sa saiyang mga pagsakit, sa saiyang emosyon, sa lambang kabtang nin saiyang ministeryo.”
2 An librong Greatest Man nagtatabang sato na orog na mamidbid bako sana si Jesus kundi man si Jehova. (Juan 14:9) An sarong 12 anyos nagsabi mapadapit sa libro: “Rinanga ako kaini nin marhay na nakapamibi ako ki Jehova na may luha nin kagayagayahan pakabasa ko tolos kaini. Sa kairairaromi kan sakong boot, nagkaigwa ako nin pagsarig sa pakaaram na si Jehova asin si Jesus nagbabantay sa sato.” An pag-adal sa librong ini dapit sa buhay ni Jesus nagtatao sato nin espesyal na pagmansay sa personalidad ni Jehova huling si Jesus iyo an “eksaktong representasyon kan saiya mismong naturalesa.”—Heb. 1:3.
3 Labing 19 milyon na kopya kan librong Greatest Man an inimprenta sa labing 70 tataramon. An sarong interesado natapos ining basahon sa laog nin duwang semana pakaako kaini. An sarong klerigo nagsabi: “Dai ko basta-basta mabutasan an libro. Ako asin an sakong agom binabasa an iba kaini barobanggi bago kami magtorog.”
4 Impormal na Pagpatotoo: Ipinaheling nin sarong tugang an librong Greatest Man sa mga tawo sa saiyang pinagtatrabawohan. Ilinista kan mga katrabaho nia an gustong kumua nin kopya. Nakapasakamot sia nin 461 libro! An lima sa mga nakaako kaini nag-aadal na. An sarong tugang na babae, mantang nagbibiyahe lunad sa eroplano, nakapasakamot nin librong Greatest Man sa sarong padi. An padi nasa Batikano sa laog na nin 40 taon. Maninigong lubos na aprobetsaran niato gabos an mga oportunidad na irekomendar an libro sa iba.
5 Inaapresyar Ini nin mga Hobenes: An sarong nuwebe anyos nagsurat: “An paborito kong publikasyon iyo an The Greatest Man Who Ever Lived huli ta dakol akong nanonodan dian.” Kun nakanonompong kita nin mga hobenes sa paglilingkod sa langtad, maninigong magtao kita nin panahon, kun oyon an saindang mga magurang, na ipaheling an libro sa mga hobenes na ini asin repasohon an pirang mga tampok asin retrato kaiyan. Kun natatawan nin oportunidad na makanood dapit ki Jesus, an mga hobenes ngonyan magigin dayupot sa saiya. Si Jesus tawong madaling dolokon.—Mat. 19:14, 15.
6 An pagbasa sa librong Greatest Man puwedeng makapabago sa buhay nin mga tawo. Gamiton an materyal sa ultimong pahina kan introduksion sa libro, sa subtemang “Benefit by Learning About Him.” Ining materyal matabang sa mga tawo na isentro an saindang isip sa mapakikinabangan ninda sa pagbasa sa libro. Dakol sa saindong teritoryo an tibaad mapakagsing siring sa ginibo nin saro pakabasaha kan libro: “Ini an pinakamarahay na librong nabasa ko kasuarin pa man! Binago kaiyan an sakong buhay.”