Agdahon an Iba na Sunodon an Pinakadakulang Tawo
1 Sa Mateo 5:14, sinabihan ni Jesus an saiyang mga disipulo: “Kamo iyo an ilaw nin kinaban.” An mga parasunod ni Jesus dapat na magtaram sa mga tawo sa gabos na lugar manongod sa mamomoton na probisyon ni Jehova para sa kaligtasan paagi ki Jesus. Nasa isip iyan, ngonyan na Disyembre naglalaom kita na mag-alok kan librong The Greatest Man Who Ever Lived. Yaon digdi an nagkapirang suhestion na puwedeng boot nindong gamiton.
2 Pakapamidbid kan saindong sadiri, puwede nindong sabihon:
◼ “Dakol an naghorophorop kun ano an itsura ni Jesus kan sia nabuhay bilang tawo digdi sa daga. Sa anong mga paagi sa paghona nindo na laen sia sa iba? [Pasimbagon.] An librong ini, The Greatest Man Who Ever Lived, isinasaysay an saiyang buhay asin ministeryo, asin ipinaliliwanag an klase nin saiyang pagkatawo. Pakabasa kaiyan, an iba nakakamate na garo baga nagkaoportunidad sindang personal na makiasosyar sa saiya.” Itokdo an enot na ilustrasyon sa libro. Dangan buksan an introduksion, asin basahon an ikaduwang parapo sa irarom kan subtemang “Benefit by Learning About Him.” Ialok an libro.
3 O puwede kamong magsabi nin siring kaini:
◼ “Durante kan panahon na ini an mga tawo nag-iisip manongod ki Jesus. Alagad, huli sa kadakoldakol na maraot na bagay na nangyayari sa bilog na kinaban, an iba puwedeng naghohorophorop kun talagang nagmamakolog si Jesus sa sato. Ano an saboot nindo dapit kaiyan?” Pasimbagon. Buksan an kapitulo 24 kan librong Greatest Man, asin pag-olayan sa halipot kun taano si Jesus ta nagdigdi sa daga. Dangan basahon an Juan 15:13, na nagdodoon kan odok sa pusong pagkamoot ni Jesus sa iba. Magkaigwa kan pinakahuring mga magasin, sarong brochure, o tract na iaalok kun dai akoon an libro.
4 Uya an saro pang suhestion:
◼ “An kadaklan na hobenes naghahanap nin mga modelo na aarogon, pero masakit hanapon an mararahay. Itinao ni Jesu-Cristo an sangkap na halimbawa para sa gabos. [Basahon an 1 Pedro 2:21.] An saiyang bilog na buhay nakasentro sa pagsamba sa saiyang langitnon na Ama. Ano sa paghona nindo an magigin kamugtakan kun dakol na tawo an naghingoa na arogon sia?” Pasimbagon. Ipaliwanag kun paano an librong Greatest Man makakatabang sa sato gabos na magin mas marahay na mga Kristiano.
5 Puwedeng booton nindong gamiton an siring kaini:
◼ “Kun nasasambitan nin saro si Jesu-Cristo, dakol na tawo an nakakagirumdom sa saiya bilang sarong omboy o bilang sarong nagsasakit na tawo na magagadan na. An saindang ideya dapit ki Jesus kalabot sana an saiyang pagkamundag asin an saiyang kagadanan. Minsan siring an naginibo ni Jesus durante kan saiyang bilog na buhay nakakaapektar sa lambang tawo digdi sa daga. Iyan an dahelan na mahalagang manodan niato an pinakadakol na mapupuwede dapit sa makangangalas na mga bagay na ginibo nia sa satong kapakanan.” Basahon an Juan 17:3. Buksan sa enot na pahina kan introduksion kan librong Greatest Man, asin basahon an ikaapat na parapo. Ipaliwanag kun paano makukua an libro asin magagamit sa personal na pag-adal.
6 Siertohon na magkaigwa nin lista kan nagpaheling nin interes tanganing makagibo kamo nin mga pagdalaw liwat. Maigot niatong tabangan an mga sadiosan an puso na magin mga parasunod kan satong Paraligtas, si Jesu-Cristo.—Mat. 16:24.