Dagkahon Sinda na Magin Saiyang mga Parasunod
1 Sa 1 Corinto 3:6, nagsurat si Pablo: “Ako an nagtanom, si Apolos an nagbaribi, alagad an Dios iyo an nagpapatubo.” Tinatabangan digdi ni Pablo an saiyang mga tugang na pahalagahan an saindang kabtang sa gibohon na pagtanom asin pagbaribi.
2 An nagliligtas-buhay na gibohon na iyan tatapuson sa satong aldaw. Bilang nagdusay na mga Kristiano, igwa kitang paninimbagan na tabangan an iba na magin mga parasunod ni Jesus. (Gibo 13:48) Paano nindo babalikan an interes na nanompongan nindo kan ginagamit an librong The Greatest Man Who Ever Lived?
3 Kun minadalaw liwat kamo sa sarong tawo na nag-ako kan libro, puwede kamong magsabi:
◼ “Kan huri niatong pag-olay, iwinalat ko saindo an librong The Greatest Man Who Ever Lived. Ano an hinangaan nindong gayo dapit sa pagtotokdo asin personalidad ni Jesus?” Pasimbagon. Buksan an kapitulo 113, asin pag-olayan an nangongorog na halimbawa ni Jesus manongod sa kapakumbabaan. Alokon na madalaw liwat tanganing orog pang pag-adalan an bagay.
4 Puwedeng mas gusto nindo an introduksion na ini:
◼ “Napag-olayan niato an manongod sa mga bagay na ginibo ni Jesus mantang nasa daga na nagpapaheling na tunay na nagmamakolog sia sa sato. Ano sa paghona nindo an gigibohon nia sa katapustapusi sa pagpaginhawa sa mga nasakitan na gayo?” Pasimbagon. Buksan sa kapitulo 133, asin basahon an mga punto sa ikalimang parapo. Buksan sa retrato na nasa sunod na pahina tanganing ipaheling kun ano an magigin kamugtakan kun gibohon na an kabotan nin Dios digdi sa daga. Alokon na madalaw liwat para sa orog pang pag-orolay.
5 Kun kadikit an interes na alokan kan libro sa primero, puwede nindong ponan an saindong pag-orolay nin arog kaini:
◼ “Dakol na tawo ngonyan an inaarog an saro na minamansay ninda na saindang modelo. Si Jesu-Cristo an pinakamarahay na modelo nin siisay man. Boot kong ihiras saindo an importanteng leksion na nanodan ko sa halimbawa ni Jesus. [Buksan sa kapitulo 40 kan librong Greatest Man, asin sambiton an leksion ni Jesus manongod sa pagkaherak.] Ipinagirumdom kaini sa sako kun gurano ko kaipuhan na ipaheling sa iba an kuwalidad na ini.” Basahon an Mateo 5:7. Ialok an libro kun may ipinaheheling na interes.
6 O puwedeng boot nindong probaran an direktang pag-atubang na ini:
◼ “Kan nakaagi kong pagdigdi, pinag-olayan niato an kahalagahan kan pagkua nin kaaraman dapit ki Jesus. An Juan 17:3 nagsasabi na ‘nangangahulogan nin buhay na daing katapusan’ an pagkua nin siring na kaaraman. Paano niato magigibo iyan?” Pasimbagon. Ipadagos paagi sa pagpaliwanag kan satong areglo sa pag-adal sa Biblia.
7 Nagsasabi si Pablo na an trabahador sa pag-ani “maako kan saiyang balos sono sa saiyang pagpapagal.” (1 Cor. 3:8) Kun maigot kitang naggigibo sa pagtabang sa iba na magin mga parasunod ni Jesus, magigin dakula an satong balos.