An Torrengbantayan Asin Awake!—Mga Magasin nin Katotoohan
1 An Enero 1, 1994 luwas kan An Torrengbantayan, pahina 22, nagpagirumdom sa sato na an satong mga magasin nagpupublikar nin “napapanahon na mga artikulo na nag-aatubang sa tunay na mga pangangaipo nin mga tawo.” Durante kan Abril asin Mayo, itatampok niato an mga magasin na ini sa gabos na nanonompongan niato.
2 An pagharongharong nagtatao kan pinakamarahay na oportunidad na makapasakamot nin mga magasin. An epektibong impormal na pagpatotoo, paghuhulit sa kalye, asin paggibo sa komersial na teritoryo ekselente man na mga paagi na madugangan an pagwaras.
3 Mga Tema na Ikapakikipag-olay: An Abril 1 luwas kan Torrengbantayan nagpapaliwanag kan mga temang “Sarong Mas Marahay na Kinaban—Pangatorogan daw Sana?” asin “Sarong Mas Marahay na Kinaban—Harani Na!” Ini siertong kaoyon kan katuyohan kan magasin na ipahayag an Kahadean nin Dios. An ikaduwang artikulo nagpapaheling kun paano an paraiso magigin tunay sa irarom kan pamamahala ni Cristo.—Luc. 23:43.
4 “Saen Kamo Makanonompong nin Masasarigan na Paggiya?” an hapot na ipinaliwanag sa luwas na Abril 15. An mga luwas na Mayo orog pang ipaliliwanag an temang ini sa mga artikulong “An Relihiyon daw Pinaninigoan an Saindong mga Pangangaipo?” asin “Taano ta Maninigong Basahon an Biblia?” Maninigo na pasil kitang makapoon nin mga pakikipag-olay sa mga tawo na nakamamateng nagkukulang nin katuyohan an saindang buhay.
5 Pagpadakol kan mga Ikinakapasakamot: An Enero 1 luwas nagtao nin apat na suhestion tanganing mapadakol an mga ikinakapasakamot. Pinakosog kita na (1) magin mapaggirumdom sa magasin. Kun sato mismong binabasa iyan, maninigo tang isipon an kun arin na mga artikulo an tibaad makaakit sa mga tawo sa satong teritoryo. Siring man, kun regular kitang nagdadara nin mga kopya, tibaad makapasakamot kita sa mga katrabaho, kataraed, maestro, kaklase, o nananaod.
6 Pinagirumdom kita na (2) papagdanayon na simple an satong mga pag-atubang. Pumili nin sarong interesanteng punto, asin sabihon iyan sa pirang tataramon. Kun ikinapasakamot nindo an magasin, “makatataram” iyan sa mga tawo sa laog nin pamilya.
7 An saro pang kaipuhan iyo na (3) magin madaling makibagay. Marahay na magkaigwa sa isip nin laen-laen na artikulo na ikapakikipag-olay—saro para sa mga hobenes, an saro pa para sa mga lalaki, asin iba pa para sa mga babae.
8 Sa katapustapusi, kaipuhan ta na (4) magbugtak nin personal na pasohan para sa pagpasakamot. Mantang an kongregasyon dai makatatao nin sarong kota, indibiduwal kitang makabubugtak nin pasohan para sa satong sadiri. Puwede kita kaining tabangan na magin mas entusiastiko sa pag-alok kan mga magasin.
9 Boot niato na makaaram an iba dapit sa Kahadean nin Dios. Biyong aprobetsaran an mga magasin sa pagpalakop kan mensahe nin Kahadean.—Mat. 10:7.