Kamo daw Nagtatanom nin Abunda?
1 Si apostol Pablo nagsabi sa 2 Corinto 9:6: “An nagtatanom nin kadikit mag-aani man nin kadikit; asin an nagtatanom nin abunda mag-aani man nin abunda.” Nangorognang totoo ini sa satong pagsamba. Mientras na mas dakol an ginagamit niatong panahon asin paghihingoa sa pag-andam para sa mga pagtiripon asin paghuhulit kan mensahe nin Kahadean, orog man kitang matalubo sa espirituwal na paagi. Pero kun kita dai naggigibo kan bilog na makakaya o kabanga an puso sa satong ginigibo, an satong pag-oswag magigin mas maluya. Kamo daw nagtatanom nin abunda?
2 Personal na Pag-adal sa Biblia: Tanganing magin mabungang mga ministro, kaipuhan nguna kitang magtanom nin abunda sa satong personal na pag-adal. (Sal. 119:97, 105; Mat. 5:3) Huli sa gabos na pag-asikaso sa pan-aroaldaw na buhay, nagkakaipo nin paghihingoa na magin puka sa satong espirituwal na pangangaipo. Parateng nagkakaipo iyan nin ‘pagtubos kan panahon.’ (Efe. 5:16) An iba mas amay na nagmamata sa ibang mga aldaw o nagtatagama nin mga banggi sa personal na pag-adal. Sa anong paagi na kita nag-aani nin abunda? Nagkakaigwa kita nin mas makosog na pagtubod, mas maliwanag na paglaom, asin mas maogmang kamugtakan nin isip.—Roma 10:17; 15:4; 1 Ped. 1:13.
3 Mga Pagtiripon sa Kongregasyon: Sa Salmo 122:1, nagsabi si David: “Ako naogma kan sinda nagsasabi sako: ‘Sa harong ni Jehova magduruman kita.’” Arog man daw kaiyan an namamatean nindo? An pagtanom nin abunda nangangahulogan nin regular na pag-atender sa satong limang semanal na pagtiripon. Magdesisyon na dai nindo totogotan na makaolang an maraot na kamugtakan nin panahon. Mientras na mas dakol na kaolangan an napanggaganahan niato, mas dakula man an satong mga bendisyon.
4 Umabot nin amay asin makikabtang sa nakakapakosog na pakikipag-olay sa saindong mga tugang. Mag-andam na gayo para sa Pag-adal sa Torrengbantayan tanganing makatanom kamo nin abunda paagi sa pagkomento. Paagi sa ‘pagbaribi’ sa iba sa mga pagtiripon, kamo “mababaribian” man.—Tal. 11:25.
5 Pagmiministeryo sa Langtad: Mientras na mas dakol na oras an idinudusay niato sa pagmiministeryo sa langtad, posibleng dakol man an aanihon niatong interesanteng eksperyensia, mabungang pagdalaw liwat, asin maproduktong pag-adal sa Biblia.
6 An pagtanom nin abunda nangangahulogan nin pagpaoswag sa kuwalidad siring man sa kadakolan. An ekselenteng pantabang sa pagpaoswag sa kuwalidad kan satong ministeryo iyo an librong Reasoning. An pahina 9-15 ilinista an labing 40 introduksion na nagkokobre sa 18 tema sa pagtabang na mapukaw an interes sa mga pinto. Kun makanompong kamo nin interes, siertohon na bumalik asin anihon an mga bunga kan saindong pagtanom. Tibaad pa an saindong mga paghihingoa gumiya sa pag-adal sa Biblia.
7 Kun kita magtatanom nin abunda, makakalaom kita nin mas dakulang mga bendisyon hale ki Jehova.—Mal. 3:10.