An Pagtanom nin Abunda Nagbubunga nin Nagsosopay na mga Bendisyon
1 Kita gabos nag-aantisipar sa kaotoban kan marahayon na mga panuga na yaon sa Tataramon nin Dios. Dawa ngonyan, si Jehova nagtatao nin dakol na bendisyon na nakadadagdag nin dakulang kaogmahan sa satong buhay. Minsan siring, kun sagkod saen na kita personal na makikinabang minadepende sa dakulang kabtang sa paghihingoa na ginigibo niato. Siring kan pagkasabi dian ni apostol Pablo, “an nagtatanom nin abunda mag-aani man nin abunda.” (2 Cor. 9:6) Estudyare an duwang kabtang na dian aplikado an prinsipyong ini.
2 An Satong Personal na Ministeryo: An paghiras sa mga tawo kan maogmang bareta kun nasa kakayahan niato na magpatotoo nagbubunga nin dakol na balos. (Tal. 3:27, 28) Kaomaw-omaw na dakol an nagtatanom nin abunda paagi sa pagpahiwas kan saindang kabtang sa ministeryo, kaiba an pag-auxiliary o pagregular payunir. Kita gabos puedeng magtanom nin abunda paagi sa maatom na pagdalaw liwat tanganing kultibaron an gabos na interesadong nanonompongan asin paagi sa pag-alok nin pag-adal sa Biblia kun magkaigwa nin oportunidad. (Roma 12:11) An paghihingoa niato sa mga paaging ini nagbubunga nin nakaparirigon na mga eksperyensia asin dagdag na kagayagayahan sa satong ministeryo.
3 Pagsuportar sa Intereses kan Kahadean: Si Pablo nagkomento manongod sa ‘pagtanom nin abunda’ may koneksion sa pagtao nin materyal. (2 Cor. 9:6, 7, 11, 13) Ngonyan, dakol an magigibo niato sa pisikal asin materyal na paagi tangani na masuportaran an intereses kan Kahadean. Puede kitang tumabang sa pagtogdok nin mga Kingdom Hall asin Assembly Hall. Puede man kitang magpresentar na makikabtang sa paglinig asin pagmantener kan mga lugar na ini para sa tunay na pagsamba. Dugang pa, puede kitang magkontribwir sa pinansial para sa mga gastoson kan lokal na kongregasyon saka para sa pambilog na kinaban na paghuhulit kan Kahadean asin paggibo nin mga disipulo. Mantang ginigibo niato gabos an kabtang niato, kanigoan an paggayagaya niato na maheling an abundang bendisyon ni Jehova sa ordenadong gibohon na ini nin Dios!—Mal. 3:10; Luc. 6:38.
4 Sinasadol kita kan Tataramon nin Dios na “maggibo nin marahay, magin mayaman sa marahay na mga gibo, magin matinao, andam na manhiras.” Mantang hinihimate niato an konsehong iyan, kita magkakamit nin nagsosopay na mga bendisyon ngonyan. Kadungan kaiyan, kita “nagririmpos para sa [sato man sana] nin marahay na pasisikadan para sa ngapit [asin] sa tunay na buhay” na madatong.—1 Tim. 6:18, 19.