Hapot

◼ Ano an maninigong gibohon kun ipinipirit nin sarong kagharong na an mga Saksi ni Jehova dai na magparadalaw sa harong na iyan?

Kun an karatula sa pinto espisipikong nagbabawal sa mga Saksi ni Jehova, maninigo niatong igalang an saindang mga kagustohan asin likayan an pagtoktok.

Kun beses tibaad makaheling kita nin karatula na nagbabawal sa mga ahente o parahagad-abuloy. Mantang naggigibo kita nin mamomoton na relihiyosong trabaho, iyan talagang dai minaaplikar sa sato. Magigin angay na dumiretso asin magtoktok sa mga pintong iyan. Kun magsayuma an kagharong, puwede niatong mataktikang ipaliwanag kun taano ta para sa sato an siring na mga karatula dai minaaplikar sa satong kamugtakan. Kun linawon kan kagharong sa panahon na iyan na an pagbabawal kabale an mga Saksi ni Jehova, igagalang niato an saiyang mga kagustohan.

Kun naghuhulit kita sa teritoryo, an kagharong tibaad mauyam asin ipirit na dai na kita dumalaw liwat. Kun magsayuma siang makipagrasonan sa bagay na iyan, maninigo tang kuyogon an kahagadan na ini. Maninigong ibugtak an petsadong paisi sa sobre kan teritoryo tanganing an mga parahayag na magibo sa teritoryo sa ngapit lilikayan an pagdalaw sa adres na iyan.

Alagad maninigo tang girumdomon na an mga harong na iyan dai dapat likayan sagkod pa man. An mga nag-iistar sa presente tibaad humale. Tibaad makaolay niato an saro pang miembro nin pamilya na maako. Yaon man an posibilidad na an kagharong na nakaolay niato mabago asin magugustong pasongkoon kita giraray. Kaya paghaloyhaloy maninigo kitang maghapot sa mga nag-iistar tanganing madeterminaran an mga saboot ninda sa presente.

An file kan teritoryo maninigong repasohon sarong beses kada taon, na ilinilista an mga harong na dian dai na kita pinasosongko. Sa paggiya kan paraataman sa paglilingkod, an nagkapirang eksperyensiadong parahayag puwedeng iasignar na dalawon an mga harong na ini. Puwede nindang sabihon na nagdadalaw kita tanganing maghapot kun nag-iistar pa duman an dating kagharong. Kun may makatanosan na simbag, an mga pagdalaw sa ngapit puwedeng gibohon sa dating paagi. Kun padagos na nagkokontra an kagharong, dai na magdalaw sagkod sa masunod na taon.