Paghanap sa mga Interesado Paagi sa Epektibong Pagpatotoo sa Tinampo
1 Tinokdoan ni Jesus an saiyang mga disipulo na hanapon an mga angay na makadangog kan maogmang bareta kan Kahadean. (Mat. 10:11) Alagad, sa dakol na lugar ngonyan, paorog nang paorog na nagigin depisil na maabotan an mga tawo sa saindang mga harong. Kaya, ano an puwedeng gibohon tanganing maabot an mga angay na tibaad malihisan?
2 An pagpatotoo sa tinampo puwedeng magin epektibong paagi na manompongan an mga tawo na nalihisan sa pagharongharong. Puwede kitang gumibo nin pagpatotoo sa tinampo sa mga pondohan nin awto, sa harani sa guwardiadong marhay na mga edipisyo nin apartment, sa mga pampublikong parke, asin sa iba pang lugar kun saen an mga tawo naggigibo kan saindang pan-aroaldaw na mga aktibidad.
3 Kun nasasambitan an pagpatotoo sa tinampo, may mga nakakamate nin pagkatakot. Puwede sindang magduwaduwa na makikabtang sa gibohon na iyan huli ta masosopgon sinda o inaantisipar ninda na sasayumahan nin mga tawo. An mga kahaditan na ini parateng mayong basihan. An mga eksperyensiado sa aktibidad na ini nagbabareta na iyan bakong depisil na siring man sana sa pagpatotoo sa mga pinto. Sa katunayan, naheling ninda na an kadaklan na tawo mas may tendensiang makipag-olay kisa kun kita tumoktok sa saindang pinto. Kaya kun kita ‘magmapuso,’ puwede kitang mabigla sa marahay na mga resultang nakua.—1 Tes. 2:2.
4 Paano puwedeng gibohon an pagpatotoo sa pinakaepektibong paagi? Mahalaga na mag-andam nin marhay. Basahon na nin patienot an mga magasin, asin pumili nin saro o duwang puntong mapag-oolayan na namamatean nindong magigin interesante sa mga tawo. Tama sana an pag-atubang sa laog nin 30 segundos. Pumili nin lokasyon kun saen dakol na tawo an regular na nag-aagi. Minsan ngani isinasadol na magkaigwa nin saro pang parahayag na nasa harani, parateng pinakamarahay na separadong gumibo. An mga parahayag na iribang nakatindog puwedeng may tendensiang mag-orolay sa kada saro asin dai mamangno an mga nasa publiko na puwedeng angay na magdangog kan mensahe nin Kahadean.
5 An pagtindog sa sarong lugar asin an pagpaheling sana kan mga magasin bakong siring kaepektibo kan pagdolok sa indibiduwal. Magin maogma asin makikatood mantang pinagmamaigotan nindong makapoon nin pag-orolay. Sa ibang kamugtakan, tibaad kaipuhan nindong lumakaw nin pirang lakad kaiba kan saro mantang nakikipag-olay sa saiya. Kun naghihimate sia, ialok an mga magasin. Kun sinasayumahan an mga magasin, puwede kamong mag-alok nin tract.
6 Parateng pinakamarahay na mag-andam nin sarong halipot na hapot o kapahayagan na makakapukaw nin interes. Kun igwa nin interes, pagmaigotan na kuanon an ngaran, adres, asin tibaad an numero kan telepono kan saro tanganing puwede nindong balikan an interes. Puwede kamong magsabi: “Kun boot nindo na orog pang makanood, maoogma akong dalawon kamo o mag-areglo nin saro pang Saksi na gumibo kaiyan.”
7 An sarong magurang na nagpapatotoo sa tinampo dinolok an sarong babae asin naaraman na nungka siang nakapakipag-olay sa mga Saksi sa saiyang harong. Nag-ako sia nin libro asin uminoyon na magpadalaw sa sarong tugang na babae sa saiyang harong sa kombenienteng panahon. Dakol pang angay an seguradong manonompongan asin matatabangan kun kita epektibo sa pagpatotoo sa tinampo.—Gibo 17:17.