An Tataramon kan Kahadean—Pagsabot Kaiyan
1 Sa saiyang ilustrasyon manongod sa parasabwag, nagsabi si Jesus na an banhi na nahoholog sa “marahay na daga” naglaladawan sa “nagdadangog kan tataramon asin nakakasabot kaiyan.” (Mat. 13:23) Pakadangog manongod kan Kahadean, ‘nakasabot daw kita kaiyan?’ Inenot daw niato an intereses kan Kahadean, sa siring ipinaheheling na nasabotan niato an mensahe?
2 An tamang pakasabot sa mensahe kan Kahadean naghahagad nin personal na pag-adal. Kaipuhan kitang magtao nin panahon sa paghorophorop manongod sa espirituwal na pagkakan na itinatao. An hiridalian na pagbasa kan An Torrengbantayan arog sa paghalon sana nin sarong masiram asin masustansiang pagkakan. Tanganing makamtan an pinakadakol na pakinabang, kaipuhan na magkaigwa nin motibasyon asin marahay na espirituwal na apetito. Kun mayo an mga ini, maiinaan kan ibang aktibidad an mga pakinabang sa personal na pag-adal o uuboson an panahon na kaipuhan niato para dian. An pagdadanay sa marahay na iskedyul nin pag-adal bakong pasil, pero an espirituwal na mga kayamanan na makakamtan daing kapantay sa halaga.—Tal. 3:13-18; Col. 1:27.
3 An Pagsiyasat sa Kasuratan nagtatabang sa sato sa aroaldaw na magkaigwa nin positibo, nakakapakosog na mga kaisipan manongod sa Kahadean. An mga “nakamamate kan saindang espirituwal na pangangaipo” nagpaplano na tumao nin pirang minuto aroaldaw sa pagbasa kan teksto asin mga komento. (Mat. 5:3) Dakol na teksto an nagpapaliwanag kan manlaenlaen na kabtang nin Kahadean. Halimbawa, kan Nobyembre 22, 1994, an itinampok na teksto iyo an Mateo 13:4. Ipinaliwanag kan komento an paglaom na Kahadean asin pinagirumdom kita manongod sa mga peligro nin bakong marahay na pakikiiba sa mga paryentes asin kataraed. An bagay na sa mga erokan na Bethel sa bilog na kinaban, igwa nin 15-minutos na pag-orolay sa aroaldaw na teksto kada aga kan aldaw nin trabaho nagdodoon kan mga pakinabang asin kan pagkaseryoso nin iribang pag-orolay sa teksto kan aldaw. Iiniiba daw kan pamilya nindo an kaparehong pag-orolay sa saindong aroaldaw na rutina?
4 Mantang nagtatalubo kamo sa pagpahalaga sa Kahadean, magkakaigwa nin mas makosog na motibasyon na ihiras sa iba an mensahe kan Kahadean. An Torrengbantayan asin Awake! nagtatabang sa sato na mamatean na marhay kun gurano kakaipuhan kan kinaban an Kahadean nin Dios. Tinatabangan kita kaiyan na magin espirituwal na mga tawo, na “igwa kan kaisipan ni Cristo.” (1 Cor. 2:15, 16) An gabos na ini makakadagdag sa satong kaigotan na ihiras sa iba an paglaom na Kahadean.—1 Ped. 3:15.
5 Mahalaga na personal niatong saboton an mensahe kan Kahadean. An Kahadean an pangenot na tema kan Biblia. Iyan an paagi na gagamiton nin Dios tanganing taposon an karatan asin darahon an sarong bagong kinaban. Pinagbotan kita ni Jesus na enoton iyan sa satong buhay. (Mat. 6:10, 33) Lubos na aprobetsaran an oportunidad nindo na kamtan an mga bendisyon kaiyan.