Pampamilyang Iskedyul—An Pan-aroaldaw na Teksto
1 An mamomoton na mga magurang naggigibo nin dakulang paghihingoa kada aldaw tangani na magtao nin masustansiang kakanon sa saindang mga aki. Mas mahalaga pa ngani an pagtao sa sainda nin espirituwal na kakanon hale sa Tataramon nin Dios. (Mat. 4:4) An sarong paagi na matatabangan nindo an saindong mga aki na magin maganang marhay sa espirituwal asin ‘magtalubo sa kaligtasan’ iyo an pagtao nin panahon kada aldaw tangani na pag-olayan an pan-aroaldaw na teksto asin mga komento bilang pamilya. (1 Ped. 2:2) Noarin daw nindo ini puedeng iiba sa saindong pampamilyang iskedyul?
2 Kun Oras nin Pagkakan: An pagpoon kan saindong aldaw paagi sa pag-orolay kan teksto makakatabang sa saindong pamilya na papagdanayon na nasa isip si Jehova sa bilog na aldaw. (Sal. 16:8) An sarong ina nagdesisyon na basahon asin pag-olayan an teksto asin mga komento kaiba kan saiyang aking lalaki mientras na ini namamahaw asin mamibi kaiba an aki bago ini maglaog sa eskuela. Pinasarig sia kaini na dai makikompromiso kun napapaatubang sa isyu nin nasyonalismo, labanan an salang mga pan-aakit, asin may kosog nin boot na makapatotoo sa mga estudyante sagkod paratokdo. Minsan ngani sia sana an Saksi sa eskuelahan, dai nia namatean noarin man na sia nagsosolo.
3 Kun bakong praktikal na pag-olayan an teksto sa aga, puede nindong pag-olayan iyan bilang pamilya sa huring kabtang kan aldaw, tibaad durante kan pamanggihan. Sa oras na ini pinag-oolayan man kan nagkapira an mga eksperyensia sa ministeryo sa langtad asin an mga punto na ikinaogma ninda sa saindang personal na pagbasa kan Biblia. Dakol an may pagkawiling nagigirumdoman an siring na mga okasyon mantang nagkakakan na kabilang sa pinakamaogmang mga panahon nin pag-iribaiba bilang pamilya.
4 Sa Banggi: Para sa nagkapirang pamilya, an pinakamarahay na panahon na pag-olayan an pan-aroaldaw na teksto iyo an bago magtorog sa banggi. Ini puede man na magin marahayon na okasyon na iribang mamibi. Mantang aroaldaw na nadadangog kamo kan saindong mga aki na nagtataram manongod ki Jehova asin namimibi sa saiya, sia nagigin tunay na persona para sa sainda.
5 Bendisyonan logod ni Jehova an mga paghihingoa nindo na itadom an katotoohan sa mga aki nindo mantang ginagamit nindong marhay an Pagsiyasat sa Kasuratan Aroaldaw.