Konsideraron an Tataramon ni Jehova Aroaldaw!

¹ An kada aldaw nag-aatubang nin bagong mga angat sa saindong pagtubod. Tibaad an sarong kinabanon na kamidbid padagos na pinipirit kamong makipag-date. Gusto kan paratokdo nindo na pag-aaboton nindo an sarong sekular na karera, o gusto kan among nindo na magtrabaho kamo nin mas halawig na mga oras. Tibaad nagrururo an saindong pisikal na salud. Minsan ngani an siring na mga pagbalo tibaad mapaatubang sa saindo sa ano man na oras, dai kamo nagsosolo. Andam si Jehova na itao sa saindo an kadonongan na kaipuhan tangani na makaya iyan. An pagkonsiderar sa teksto sa Biblia asin mga komento na nasa Pagsiyasat sa Kasuratan sarong paagi na regular nindong ikalalaog sa isip an Tataramon ni Jehova. Inaaprobetsaran daw nindo an probisyon na ini?

² Igwa nin Tabang: An Isaias 30:​20 ilinaladawan si Jehova bilang an “Kaharohalangkaweng Paratokdo” na sa saiya an banwaan nin Dios puedeng humagad nin tabang. Tinatawan nia kamo kan talagang kaipuhan nindo tangani na maatubang an mga angat sa saindong pagtubod. Paano? Nagpapaliwanag an sunod na bersikulo: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian.’” Ngonyan, ipinapaabot ni Jehova an saiyang “tataramon” paagi sa Kasuratan asin sa mga publikasyon kan ‘fiel na oripon.’ (Mat. 24:45) Abunda an kadonongan na nasa nakaaging mga artikulo sana kan Torrengbantayan, na may koneksion sa haros gabos na aspekto nin Kristianong pamumuhay. An pagrepaso sa mga kinotar sa Pagsiyasat sa Kasuratan nakatatabang sa saindo na magtipon nin kaaraman na mahalagang marhay sa pag-atubang sa gabos na klaseng pagbalo.​​—Isa. 48:17.

³ Tawan Iyan nin Panahon: Minsan ngani an mga aga sibot na panahon, sinisierto nin sarong ina na basahon asin ipakipag-olay an teksto asin mga komento sa saiyang aking lalaki mantang ini namamahaw. An mga tataramon na ini kaiba an pamibi iyo an huring mga tataramon na nadadangog nia kada aga bago mag-eskuela. Pinasarig sia kaiyan na labanan an seksuwal na mga pan-aagyat, dai makikompromiso sa atubangan nin nasyonalismo, asin makosog an boot na magpatotoo magin sa mga estudyante asin paratokdo. Minsan ngani sia an solamenteng Saksi sa eskuelahan, nungka siang nakamateng nagsosolo.

⁴ Umasa ki Jehova asin sa saiyang Tataramon para sa pagdirehir asin paggiya. Kun gigibohon nindo iyan, sia magigin tunay para sa saindo, arog sa sarong pinagtitiwalaan na katood. Dumolok sa saiya aroaldaw! Kaiba kan minilyon na iba pa sa bilog na kinaban na aroaldaw na nagkokonsulta sa Tataramon nin Dios, logod na manompongan nindo na an saindong mga mata magin ‘mga mata na nakakaheling sa saindong Kaharohalangkaweng Paratokdo.’