Hapot
◼ Anong mga bagay an maninigo niatong darahon sa mga pagtiripon?
Kada semana nag-aako kita nin kapakipakinabang na pagtotokdo asin pagpakosog sa mga pagtiripon kan kongregasyon. (Isa. 48:17; Heb. 10:24, 25) Alagad an kadakolan kan napapakinabangan niato minadepende sa kun gurano kita karahay na nag-andam para sa mga pagtiripon.
Marahay para sa kada miembro kan pamilya na magkaigwa nin saiya mismong personal na kasangkapan para sa mga pagtiripon. Kabale digdi an sarong Biblia, songbook, an (mga) publikasyon na inaadalan, notebook, asin panurat.
Para sa Teokratikong Paadalan sa Pagmiministro, kaipuhan an Theocratic Ministry School Schedule asin an School Guidebook. Tinatabangan kita kan mga bagay na ini na isaisip an tema kan itinataong mga pahayag kan estudyante asin masundan an paraataman sa paglilingkod kun sia nagtatao nin sadol. Puwede niatong personal na iaplikar an sadol asin mga suhestion tanganing mapaoswag an sato mismong mga pahayag asin mga pag-atubang sa paglilingkod sa langtad. Poon kan Enero, an kadaklan sa nagtotokdong pahayag basado sa Jehovah’s Witnesses—Proclaimers of God’s Kingdom. Tibaad bakong praktikal para sa lambang miembro kan pamilya na magdara kan saiyang sadiring kopya; puwedeng darahon an sarong tomo para sa bilog na pamilya.
Para sa Pagtiripon sa Paglilingkod, kaipuhan ta an pinakabagong An Satong Ministeryo sa Kahadean asin an librong Reasoning. Darahon an arin man na publikasyon na nasasambitan durante kan pagtiripon, siring baga kan mga literatura na gagamiton sa mga pag-atubang na idedemonstrar. An kamagurangan maninigong magkaigwa nin kopya kan Organized to Accomplish Our Ministry.
An mga magurang maninigong magmaigot na patukawon nin matoninong asin papaghinanyogon an saindang mga aki sa mga pagtiripon kan kongregasyon. An pagtao sa sainda nin personal na mga kopya kan An Torrengbantayan asin iba pang publikasyon, dawa bago pa sinda makabasa, nakakapakosog sa sainda na magkaigwa nin interes, asin nakakatabang na makapatalubo nin pambilog na buhay, kapakipakinabang na espirituwal na mga ugale.
An kagayagayahan asin pagkakontento na nakukua niato sa mga pagtiripon kan kongregasyon nadudugangan na gayo kun minaatender kita na kompleto an kasangkapan.—2 Tim. 3:17.