Si Jehova Nagtatao nin Kapangyarihan
1 Bilang banwaan ni Jehova, kita tinawan nin asignasyon na ihulit an maogmang bareta mantang pinapagdadanay niato an ‘marahay na ugale sa tahaw nin mga nasyon.’ (Mat. 24:14; 1 Ped. 2:12) Sa pagkonsiderar kan delikadong mga panahon asin kan satong sadiring mga kaluyahan asin pagkukulang, dai ta kayang gibohon an trabahong ini na kita sana. (2 Tim. 3:1-5) Maogma nanggad kita na makalalaom kita sa tabang ni Jehova!
2 Tinagalan kan apostol na si Pablo an dakol na pagbalo. (2 Cor. 11:23-27) Paano nia naatubang an mga iyan asin tinapos an trabahong iinasignar saiya? Si Jehova nagtao saiya kan “kapangyarihan na lihis sa ordinaryo.” (2 Cor. 4:7) Minidbid ni Pablo an tabang na iyan nin Dios kan sia magsurat: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Fil. 4:13) Tatabangan man kita ni Jehova sa kaparehong paagi. Paano ta maaako an tabang na ini?
3 Paagi sa Daing Ontok na Pagpamibi: Sinadol kita ni Jesus na ‘padagos na maghagad, maghanap, asin magtoktok,’ asin dai sumuko. (Luc. 11:5-10) An pagkadesidido niato sa pamimibi pagdemonstrar ki Jehova kan rarom asin kosog kan satong kamawotan, asin kan pagigin tunay kan satong motibo. (Sal. 55:17; 88:1, 13; Roma 1:9-11) Minidbid ni Pablo an importansia kan pagkadesidido sa pamimibi kan sinadol nia kita na “mamibi nin daing ontok.” (1 Tes. 5:17) An pamibi saro sa pangenot na mga paagi na akoon an tabang ni Jehova.
4 Paagi sa Pagsunod sa Teokratikong Pagdirehir: An “teokrasia” nangangahulogan pamamahala nin Dios, na pagkamoot. Kalabot dian an pag-ako sa mamomoton na autoridad ni Jehova asin pagsunod sa saiyang mga instruksion kapwa sa dakula o sadit na mga desisyon. An “maimbod asin madonong na oripon” nagrerepresentar sa teokratikong pamamahala digdi sa daga. (Mat. 24:45-47) An pagkooperar sa organisasyon na ginagamit kan “oripon” kaipuhan kun mawot niatong mag-ako kan bendisyon ni Jehova. (Ikomparar an Hebreo 13:17.) Babalosan ni Jehova an satong kaimbodan asin pagigin andam an boot paagi sa pagtao kan kapangyarihan na kaipuhan niato sa tamang panahon.—Heb. 4:16.
5 Paagi sa Pagdanay na Dayupot sa Satong mga Tugang: An pagkamoot iyo an midbidan kan mga disipulo ni Jesus. (Juan 13:34, 35) Mantang nagkakalaenlaen na marhay an mga personalidad, puedeng lumataw an dai pagkasinabotan sa tanga niato huli sa personal na mga pagkakalaen. Dapat igwa kitang maboot na pagkaherak, na lubos na nagpapatarawadtawad sa lambang saro. (Efe. 4:32) Ginigibo kaining posible na magdanay kitang dayupot sa satong mga tugang sa pagtubod asin mapakosog kan saindang dai natatanyog na pakatagal sa irarom nin pagbalo. “Sa pakaaram na an siring man na mga pagtios nangyayari sa bilog na kasararoan nin [satong] mga tugang,” igwa kita kan itinao nin Dios na kosog na atubangon an kaagid na pangigipit.—1 Ped. 5:9.
6 Paagi sa Pagpadanay sa Marahay na Rutina sa Personal na Pag-adal: An pagpakosog kan satong isip asin puso sa espirituwal na paagi mapangyari sato na labanan an pag-atake ni Satanas. (1 Ped. 5:8) An iskedyul sa personal na pag-adal mapatalubo kan satong diosnon na kaaraman. Puedeng makatabang iyan kun napapaatubang kita sa pan-aroaldaw na mga angat. Idinoon ni Pablo na an “tamang kaaraman” kaipuhan sa pagkamit nin kaligtasan. (1 Tim. 2:3, 4) Kaipuhan niatong regular na mag-ako nin espirituwal na pagkakan.
7 Itinatao paagi sa Kristianong kongregasyon an gabos na pangangaipo niato tanganing magdanay na makosog. An bilog na pusong pagsuportar sa mga aktibidad kaiyan magarantiya na kita “maralakaw asin dai pangluluyahon.”—Isa. 40:29-31.