Pagtatanda na Nagtatao nin Kaligtasan
1 Kan kaaldawan ni Ezequiel, pinangyari ni Jehova na matandaan an mga nag-aaragagha asin nag-aaragrangay dapit sa ginigibong makababaldeng mga bagay, na naggagarantiya kan saindang kaligtasan. (Ezeq. 9:4-6) An satong paghuhulit ngonyan nakaootob kan kaparehong katuyohan. Puwede kitang magkaigwa nin importanteng kabtang sa gibohon na ini na pagtatanda.
2 An paghanap sa sinserong mga tawo enot sanang tangga. Nag-aareglo kita nin pagdalaw liwat. An satong kapangganahan madepende sa kun ano an andam kitang sabihon pagbalik niato.
3 Sa pagdalaw liwat sa napasakamotan kan “An Torrengbantayan,” puwede nindong isentro an atension sa pangenot na tema kaiyan:
◼ “Mangnoha na sa atubangan na tutob kan An Torrengbantayan maheheling an mga tataramon na ‘Nagpapahayag kan Kahadean ni Jehova.’ Napapalaen iyan huli ta sinusuportaran kaiyan an Kahadean nin Dios bilang an solamenteng solusyon sa mga problema kan kinaban. Ini an maogmang bareta na sinabi ni Jesus na ipapahayag sa bilog na daga.” Basahon an Mateo 24:14, asin ipaliwanag kun paano makukua nin regular An Torrengbantayan asin magagamit para sa personal na pag-adal sa Biblia.
4 Tibaad mas gusto nindong isentro sana an atension sa Biblia mismo asin idoon an pangangaipo na basahon iyan nin regular. Puwede kamong magsabi:
◼ “Garo baga haros gabos boot na magkaigwa nin praktikal na sadol sa kun paano makapanggagana sa mga problema sa aroaldaw na pamumuhay. Saen sa paghona nindo makakakua kita nin sadol na satong mapagtitiwalaan? [Pasimbagon.] An dakol na nagtiwala sa sadol nin mga katood o nagbayad para sa propesyonal na sadol nadisganar. Sa ibong na kampi, minilyon katawo an nakanompong na an Biblia nagtatao nin sadol na talagang mapagtitiwalaan ninda. Ipinaheheling kaiyan sa sato kun paano mapanggaganahan an ano man na problema na puwede niatong atubangon. [Basahon an 2 Timoteo 3:16, 17.] Togotan nindo akong ipaheling saindo kun paano nindo iyan magagamit tanganing mabuksan an mayamanon na burabod nin madonong na sadol.” Ipadagos paagi sa pagbukas sa “Love” sa seksion na “Bible Words Indexed” sa likod kan New World Translation, asin itokdo an nagkapira sa mga teksto na nagpapaheling kun paano an pagkamoot makakatabang sa sato na maresolberan an mga dai niato pagkasinabotan asin nin iba.
5 May pasohan na makapoon nin pag-adal sa Biblia sa librong “Puwede Kamong Mabuhay Sagkod Lamang sa Paraiso Digdi sa Daga,” taano ta dai probaran an introduksion na ini?:
◼ “Paano makikinabang an saindong pamilya sa pamumuhay sa sarong kinaban na siring kaini?” Ipaheling an mga ilustrasyon sa pahina 156-7, dangan basahon an saro o duwa sa mga teksto na kinotar sa mga pahinang iyan, asin ipaliwanag na an mga ini panuga ni Jehova Dios, na dai makakapagputik. Buksan an lista kan mga kapitulo sa pahina 5-6, asin hapoton an kagharong kun arin na tema an pinakainteresante sa saiya; buksan sa kapitulo na pinili nia, asin ipakipag-olay an saro o duwang parapo.
6 Boot daw nindong tabangan an saro pang tawo na matandaan para sa kaligtasan? Kun iyo, ‘lubos na otobon an saindong ministeryo’ paagi sa pag-andam nin marhay asin pagdalaw tolos sa gabos na interes na nanompongan nindo.—2 Tim. 4:5.