An Gabos na Kasuratan Kapakipakinabang Para sa Pagtokdo
1 Dai mapapantayan an kadonongan kan hatol sa Biblia. Dai malalabihan an moral na mga pamantayan na sinusuportaran kaiyan. An mensahe kaiyan mapuersa, “nakamimidbid kan mga kaisipan asin pagmawot kan puso.” (Heb. 4:12) Paano niato matatabangan an iba na maheling an pangangaipo na maingat na siyasaton an librong ini? Tibaad boot nindong probaran an minasunod na mga suhestion kun iinaalok an New World Translation kaiba kan librong The Bible—God’s Word or Man’s? ngonyan na Nobyembre.
2 Huling nahahadit an dakol na tawo dapit sa pagkakaigwa kan pangenot na mga pangangaipo ninda, an pag-atubang na ini puedeng makakua kan saindang atension:
◼ “Dakol na tawo na nakakaolay ko sa mga aldaw na ini an nahahadit dapit sa pagbayad kan saindang pinansial na mga obligasyon. Siisay sa paghona nindo an makatatao sa sato kan pinakamarahay na sadol sa siring na mga bagay? [Pasimbagon.] Nanompongan ko na an Biblia nagtatao nin praktikal na sadol na makatatabang sa sato na malikayan an dai kinakaipuhan na mga problema. Togoti nindo akong ipaheling saindo an sarong halimbawa.” Buksan sa pahina 163 kan librong The Bible—God’s Word or Man’s? asin basahon an 1 Timoteo 6:9, 10, na kinotar sa parapo 3.
3 Uya an saro pang suhestion na puede nindong probaran:
◼ “Kada magbasa kita nin diaryo o maghinanyog sa mga bareta nadadangog niato an manongod sa saro pang problema na nakapahahadit sa sato. [Sambiton an sarong nakahahadit na pangyayari na ibinareta dai pa sana nahahaloy sa mga diaryo.] Paano daw kita makapanggagana sa mga problema na siring kaini? [Pasimbagon.] Kaidtong 1983, an presidente kan Estados Unidos nagsabi na an Biblia igwa kan pinakadakulang mensahe na isinurat kasuarin pa man asin na ‘sa mga pahina kaiyan yaon an gabos na simbag sa gabos na problema na naagihan na nin tawo.’ Ipinagigirumdom kaini sa sato an sinasabi kan Biblia. [Basahon an 2 Timoteo 3:16, 17.] Togoti ako nindong ipaheling saindo kun taano kita ta makasasarig sa Biblia.” Ipaheling an nagkapirang punto sa Kapitulo 1 kan libro asin ialok iyan.
4 Kun dakol an bakong relihioso sa saindong teritoryo, puede nindong probaran an pag-atubang na ini:
◼ “Dakol na tawo sa lugar na ini an minamansay an Biblia na nagkokorontrahan asin eroestorya sana. Naheling ninda an kadakoldakol na maraot na ginibo sa ngaran nin relihion kaya dai na sinda nin tiwala sa Biblia. Sa katunayan, padakol nang padakol na tawo an nag-iisip kun baga an Biblia Tataramon nin Dios o nin tawo. Ano an saindong opinyon?” Pasimbagon. Depende sa simbag kan kagharong, buksan an sarong kabtang kan librong The Bible—God’s Word or Man’s? na nagpapaliwanag manongod sa pagkontra o punto-de-vista kan kagharong, asin ipakipag-olay an saro o duwang punto. Halimbawa, tibaad igwa kamo nin panahon na gamiton an parapo 27-9, poon sa pahina 66 sa subtemang “Jesus—A Real Person.”
5 An pagtabang sa iba na apresyaron an tunay na halaga kan Biblia saro sa pinakamarahay na magigibo niato na matabangan sinda; ikaliligtas kaiyan an saindang buhay.—Tal. 1:32, 33.