Hapot
◼ Paano kita makakokomento sa pinakaepektibong paagi sa mga pagtiripon?
Kita naghihidaw kan satong semanal na mga pagtiripon sa kongregasyon. Dian kita nagkakaigwang oportunidad na ipahayag an satong pagtubod paagi sa pagkomento. (Tal. 20:15; Heb. 10:23, 24) Kaipuhan na mansayon niato an pagkomento bilang pribilehio asin magmaigot na makikabtang nin regular. Paano niato ini magigibo sa pinakaepektibong paagi?
An enot na tangga iyo an pag-andam. An patienot na pagbasa kan materyal importante. Probaran na makua an espiritu kan iinatubang na materyal. Minsan an topiko puedeng napag-olayan na kan nakaagi, hanapon an itinaong ano man na dagdag na punto. Kun nag-aandam nin mga komento hale sa sarong publikasyon na nagtatampok nin kompletong pag-adal sa sarong libro nin Biblia, siring sa librong Revelation Climax, pagmaigotan na saboton kun paano an sarong partikular na bersikulo konektado sa mga nakapalibot na bersikulo. An pagsunod sa mga suhestion na ini mapahiro sa saindong abilidad sa pag-isip. Matabang iyan saindo na makaandam nin marahay na mga komento asin magkaigwa nin kagayagayahan sa saindong pakikikabtang.
An pinakamarahay na mga komento iyo an halipot, simple, asin basado sa publikasyon na pinag-aadalan. An enot na parakomento kaipuhan na direktang simbagon an hapot, na ipinababaya an ibang punto para sa dagdag na mga komento. Likayan an halaba, nawawaran nin direksion na mga komento. Magpahayag sa sadiring tataramon, imbes na basahon an saindong komento letra por letra hale sa publikasyon. Puedeng iayon sa ibang komento an mga puntong kinobrehan sa sitadong mga teksto sa Biblia. Maghinanyog nin maingat sa sinasabi nin iba tanganing malikayan an dai kinakaipuhan na pag-otro.
Marahay na mag-itaas nin kamot nin pirang beses alagad bakong sa kada parapo. Iniimbitaran niamo an mga hoben na makikabtang sa pagkomento. Kun kamo nag-aalangan na magtaram, puede nindong patienot na ipaaram sa konduktor an parapong mawot nindong komentohan, asin posibleng ikatao nia saindo an oportunidad na gibohon iyan.
Gabos kita kaipuhan na gumibo nin odok na pagmamaigot tanganing igwa kitang ikahiras sa pagtiripon kan kongregasyon na kalabot an pagpartisipar kan mga nagdadangog. Girumdomon, an kapangganahan kan siring na pagtiripon minadepende nin dakula sa satong pagigin gikan sa boot asin pagigin epektibo sa pagkomento.—Sal. 26:12.