Mga Magurang na Naggagayagaya!
1 Kun kamo sarong barobata na nag-iistar sa sarong Kristianong harong, igwa nin sarong espesyal na paagi na mapaoogma nindo an saindong mga magurang. Kun kamo nagsusunod sa katanosan, “an [saindong] ama asin an [saindong] ina maggagayagaya.” (Tal. 23:22-25) Mayo nang orog na makapaoogma sa saindong mga magurang kisa sa maheling kamo na isinasapuso nindo an katotoohan asin idinudusay an saindong buhay ki Jehova.
2 Makapasasalamat kamo sa pagkaigwa nin mga magurang na nasa katotoohan. Poon kan kamo mamundag, sainda kamong pinakakan, ginubingan, asin tinawan nin istaran patin inataman sa mga panahon nin paghelang. Hiningoa man ninda na tokdoan kamo manongod ki Jehova asin sa saiyang matanos na mga dalan; pagsasanay ini na magsisierto kan saindong buhay na daing katapusan. (Efe. 6:1-4) Paano nindo ikapaheheling an saindong apresasyon?
3 Isapuso Nindo an Katotoohan: Ikapaheheling nindo an apresasyon paagi sa pagkaigwa nin interes sa pampamilyang pag-adal na dai na kaipuhan pang piriton. Magpaheling nin pagmawot na umatender sa mga pagtiripon, na kamo na mismo an nag-aandam kan saindong sadiri tanganing an pamilya makaabot sa tamang oras. Tumukaw kataed kan saindong mga magurang durante kan mga pagtiripon asin magin atentibo paagi sa pagsubaybay sa mga publikasyon na pinag-aadalan. Hingoahon na magkomento sa mga pagtiripon. Gikan sa boot na akoon an mga asignasyon sa Teokratikong Paadalan sa Pagmiministro asin gibohon an saindong pinakamakakaya na otobon iyan. Magboluntaryo na tumabang sa pag-asikaso sa mga gibohon sa Kingdom Hall.
4 Magbugtak nin Progresibong mga Pasohan: Pagmaigotan na lubos na makapakikabtang sa paglilingkod sa langtad, na ipinaheheling an pagmawot na makualipikar bilang sarong parahayag. Sundan an semanal na pagbasa sa Biblia o, mas marahay pa ngani, basahon nindo mismo an bilog na Biblia. Magin desididong aboton an mga kahagadan para sa pagdusay asin bautismo. Maingat na planohon an saindong mga kurikulum sa eskuelahan, na an katuyohan magkamit nin pagsasanay na masangkap sa saindo para sa lubos na pakikikabtang sa paglilingkod ki Jehova. Gumibo nin reputasyon na magpapahiro sa iba na irekomendar kamo para sa espesyal na mga pribilehio na arog kan pagpapayunir o paglilingkod sa Bethel. (Gibo 16:1, 2) An pag-abot sa mga pasohan makatatabang sa saindo na “makasierto sa orog na mahalagang mga bagay, tanganing . . . mapano kamo nin matanos na bunga.”—Fil. 1:10, 11.
5 An pagkabarobata panahon na mag-adal asin makanood nin mga abilidad sa pakikiiba sa iba. Iyan panahon na puede kamong maogma sa buhay na mayo kan gabos na paninimbagan na minadatong sa pagkaadulto. Si Salomon nagsabi: “Mag-ogma ka, soltero, sa saimong pagkahoben, asin an saimong puso pagiboha nin karahayan sa saimo sa mga aldaw kan saimong pagkabarobata.” (Ecl. 11:9) Kun gagamiton nindo an saindong pagkabarobata sa paglilingkod ki Jehova, mag-aani kamo nin mga bendisyon na magdadanay sagkod lamang.—1 Cron. 28:9.
6 Kun kamo ‘nagsusunod sa katanosan’ imbes na “sa mga horot na konektado sa pagkabarobata,” pagiginhawahon nindo an saindong mga magurang sa dakol na kahaditan asin kolog nin puso. (2 Tim. 2:22) Tatawan nindo an saindong sadiring puso nin dahelan na maggayagaya. (Tal. 12:25) Orog sa gabos, magtatao kamo nin kagayagayahan sa saindong Kaglalang, si Jehova Dios.—Tal. 27:11.