Pagpadanay nin Balanseng Punto-de-Vista sa Teknolohiya nin Komputer
1 Huli ta “nainaan na an panahon na natatada,” dinagka ni apostol Pablo an mga Kristiano kan enot na siglo na ‘tuboson an panahon’! An panahon mahalaga.—1 Cor. 7:29; Efe. 5:16.
2 An teknolohiya inomaw bilang dakulang pan-ekonomiya nin panahon. Halimbawa, sa pagdoon sa sarong buton nin komputer, an sarong tawo puedeng makakua tolos nin kadakol na impormasyon. Sa parate nagigibo kan mga komputer sa pirang segundo an mangangaipo kutana nin mga oras o semana kun gigibohon sa ibang paagi. Kun ginagamit nin tama, iyan nakatatabang na kasangkapan.
3 Iyan daw Talagang Nakaeekonomiya nin Panahon?: Sa ibong na lado, an siring na teknolohiya bakong daing gastos sa naggagamit—kapwa sa kuarta asin panahon. Tibaad kaipuhan an pirang oras tanganing manodan kun paano ipagigibo sa komputer an pinakasimpleng trabaho. Saro pa, an sarong tawo na nawiwili sa teknolohiya mismo tibaad gumamit nin panahon na puede kutanang nagamit nin mas marahay. Kaipuhan tang girumdomon an sadol ni apostol Pablo na maglakaw “siring sa mga madonong, na tinutubos an panahon para sa saindo man sana.”—Efe. 5:15, 16; helingon man an 1 Corinto 7:31.
4 An nagkapirang tugang na lalaki nagdisenyo nin mga programa sa komputer para sa pagsaray nin mga rekord kan kongregasyon. Siempre, personal na desisyon kun paano gagamiton nin indibiduwal an saiyang komputer. Minsan siring, habo kan Sosyedad na an mga rekord kan kongregasyon ilaog sa mga komputer, mantang an mga aki o ibang dai autorisadong tawo puedeng makaheling kaiyan. An gabos na rekord kan kongregasyon—mga rekord sa kuenta, Congregation’s Publisher Record card, asin iba pa—maninigong ibugtak sa mga porma na itinao kan Sosyedad, asin an impormasyon sa mga pormang ini kan kongregasyon dai maninigong ilaog sa komputer. Sa paaging ini, an kompidensial na mga rekord kan kongregasyon mapoprotehiran.
5 An sarong tugang na lalaki na naasignaran nin kabtang na iaatubang sa pagtiripon sa kongregasyon dai maninigong magdepende sa materyal na inandam nin iba na makukua sa magkakakonektar na komputer. An responsableng mga Kristiano dai nag-aandam nin mga pahayag sa Biblia o mga kabtang sa pagtiripon asin ipinagagamit iyan sa iba paagi sa magkakakonektar na komputer. Minsan siring, an komputer asin an Watchtower Library sa CD-ROM kan Sosyedad puedeng magin mahalagang mga kasangkapan na magagamit nin kada indibiduwal na tugang sa epektibong pagsiyasat sa halipot na panahon.
6 Kumusta man an pagdistribwir nin mga printout sa komputer nin mga teksto na ginagamit sa Pag-adal sa Torrengbantayan o sa Pag-adal sa Libro kan Kongregasyon? Mas marahay para sa mga parahayag na gibohon an sadiri nindang mga nota sa Biblia asin sa mga publikasyon na inaadalan. Sa pagtiripon, an paggamit nin mga printout sa komputer nin mga tekstong sitado sa mga publikasyon puedeng makapadisganar sa paggamit kan Biblia mismo sa paghanap nin mga teksto. An paghanap sa mga teksto durante nin pagtiripon kabtang kan pagpatood na inaako, na sinasangkapan kita para sa epektibong paggamit kan Biblia sa ministeryo sa langtad. Sa kadaklan na kamugtakan, an pagbasa nin direkta sa Biblia mas epektibo, partikularmente kun an mga nagdadangog dinadagka na sundan an pagbasa sa Biblia.
7 Iba Pang Seryosong Siod: Siring sa pakapaliwanag sa pahina 17 kan Agosto 1, 1993 na isyu kan An Torrengbantayan, an pagtakod nin sarong komputer sa electronic bulletin board puedeng magbukas nin dalan sa seryosong espirituwal na mga peligro. An mga apostata, klerigo, asin iba pa puedeng sueltong ikalaog an saindang nakahihilong mga ideya sa mga bulletin board. Apuera sana kun an sarong bulletin board nababantayan nin tama, na linilimitaran an paggamit kaiyan sa maygurang, maimbod na mga lingkod ni Jehova, iyan puedeng magsapeligro kan mga naggagamit na Kristiano sa “maraot na pag-iriba.” (1 Cor. 15:33) An Sosyedad nakaresibi nin mga report na an siring na pribadong magkakakonektar ginagamit bako sana sa pagbanabana manongod sa espirituwal na mga bagay kundi siring man sa pagtao nin maraot na hatol, pagpalakop nin tsismis asin salang impormasyon, hilom na paglaog nin negatibong mga ideya, pagpalataw nin mga kustion asin pagduda na nakararaot sa pagtubod kan nagkapira, asin pagpalakop nin pribadong mga interpretasyon kan Kasuratan. Sa pan-ibabaw, an nagkapirang impormasyon tibaad garo nagtotokdo, pero iyan tibaad may kaibang nakahihilong mga elemento. An mga Kristiano naghahalat sa “maimbod asin madonong na oripon” para sa napapanahon na espirituwal na kakanon asin para sa mga kalinawan. (Helingon An Torrengbantayan na Hulyo 1, 1994, pahina 9-11.) An sarong Kristiano may magabat na paninimbagan na ingatan an saiyang pagtubod tumang sa gabos na nakararaot na impluwensia asin maninigong perming aramon kun kiisay sia nakiaasosyar.—Mat. 24:45-47; 2 Juan 10, 11.
8 An iyo man sanang artikulo sa Torrengbantayan idinoon an halaga nin paggalang sa mga ley sa diretso sa pagpublikar. An kadaklan na kompaniya na nag-aandam asin nagpapabakal nin mga programa sa komputer ikinukua ini nin diretso sa pagpublikar, asin sinda nagtatao nin lisensia sa kun paano gagamiton nin legal an mga programa. Sa parate an lisensia nagsasabi na an kagsadiri dai puedeng magtao nin mga kopya kan programa sa iba; sa katunayan, an internasyonal na ley sa diretso sa pagpublikar ginigibong ilegal an paggibo nin siring. Dakol na paslong tawo an daing pag-alangan sa pagbalga kan ley. Pero, an mga Kristiano maninigong magin sadiosan sa legal na mga bagay, na itinatao ki Cesar an mga bagay na ki Cesar.—Mat. 22:21; Roma 13:1.
9 Dapat na pagturotimbangon an halaga nin arin man na teknolohiya asin an potensial na mga peligro sa paggamit kaiyan. Minsan ngani an telebisyon puedeng gamiton sa ikararahay, an bakong kapakipakinabang na epekto kaiyan sa katawohan ngonyan nagcausa na minsan an mga kinabanon magpahayag nin grabeng kahaditan. An magkakakonektar na komputer nakalalakop sa bilog na kinaban asin puedeng magdara nin mahalagang impormasyon sa harong o sa pinagtatrabawohan. Iyan nag-aalok nin kinakaipong marhay na mga serbisyo sa mga negosyo asin organisasyon patin sa mga indibiduwal sa marikas an paghirong sosyedad na nabubuhayan niato. Kadungan kaini, an magkakakonektar na komputer dinadamat nin mga problema siring sa pornograpiya asin detalyadong impormasyon sa paggibo nin maraot na mga gibo.
10 Kun siring, igwa nin dakol na mahalagang dahelan kun taano an sarong Kristiano ta kaipuhan na padanayon an sarong balanseng punto-de-vista sa teknolohiya nin komputer. Dakol na indibiduwal an nakikinabang sa New World Translation, mga tomo nin Insight, asin GetVerse na programa, na ilinuwas kan Sosyedad sa mga diskette sa komputer. An iba nakinabang paagi sa paggamit kan ilinuwas kan Sosyedad na CD-ROM, na inibanan nin dugang na kakayahan sa pagsiyasat. Mantang minimidbid an halaga kan sarong teknolohiya, an tawong naggagamit kan siring na modernong teknolohiya para sa mapakikinabangan na mga katuyohan maninigo man na magin maingat na protehiran an saiyang sadiri asin an iba tumang sa ano man na negatibong mga aspekto. Kaipuhan tang magin balanse tanganing minsan an dai nakadadanyar na paggamit nin teknolohiya dai makaubos kan dakol na dusay niatong panahon o irayo an atension niato sa satong pangenot na gibohon asin mga pasohan.