Gamiton sa Pinakamarahay an Satong mga Magasin
1 Kun kamo minadolok sa sarong bakalan nin diaryo sa bangketa, ano an naheheling nindo? Mga magasin. Sa sarong tindahan sa kanto, ano tolos an naheheling nindo? Mga magasin. Sa siring, ano an binabasa nin dakol na tawo? Mga magasin. Ipinaheheling nin mga surbey na 9 sa kada 10 katawo an nagbabasa nin kisuerra sarong magasin kada bulan. An kinaban mapag-isip sa magasin.
2 Puede ta daw na gibohon na mapag-isip sa Torrengbantayan asin Awake! an mga tawong sadiosan an puso? Iyo, kun KITA mapag-isip sa Torrengbantayan asin Awake! Ano an makatatabang sato? Horophoropa an mga suhestion na ini:
◼ Basahon an mga Magasin: An sarong nagbibiaheng paraataman nagreport na, sa promedyo, saro sana sa kada tolong parahayag sa saiyang sirkito an nagbabasa kan kada luwas kan An Torrengbantayan asin Awake! nin bilog. Kamo daw iyo? Mantang binabasa nindo an kada artikulo, hapoton an saindong sadiri, ‘Siisay an maapresyar kan impormasyon na ini—sarong ina, negosyante, hoben?’ Dangan isipon kun paano nindo puedeng pukawon an interes sa tema paagi sa saro o duwa sanang pahayag.
◼ Magkaigwa nin Depinidong Pedido na Magasin: Magpedido nin depinidong bilang nin mga kopya kan kada isyu sa tugang na nag-aasikaso sa mga magasin. Sa paaging ini, kamo asin an saindong pamilya magkakaigwa nin regular na suplay nin mga magasin.
◼ Mag-iskedyul nin Regular na Aldaw sa Pagmamagasin: Puede daw nindong suportaran an Aldaw sa Pagmamagasin kan kongregasyon? Kun dai, pagmaigotan na magtagama nin panahon na personal na magdistribwir nin mga magasin, magsalang sa pagpatotoo sa kalye o sa harong-harong asin sa mga ruta sa magasin.
◼ Magin Mapag-isip sa “Torrengbantayan” Asin “Awake!”: Magdara nin mga kopya nin magasin kun nagbibiahe o nagsasaod. Ialok iyan kun kamo nakikipag-olay sa mga katrabaho, kataed, kaeskuela, o maestro. Sarong mag-agom na perming nagbibiahe sa eroplano an naggagamit nin sarong punto sa saro kan bagong mga magasin tanganing ponan an pakipag-olay sa pasaherong kataed ninda sa tukawan. Dakol an saindang makawiwiling eksperyensia. An nagkapirang hoben regular na nagdadara sa eskuelahan nin mga artikulo na sa paniwala ninda pagkakainteresan kan saindang mga maestro o kaeskuela. Magdara nin mga kopya kun kamo nananaod, asin ialok iyan sa mga negosyante pakatapos kan saindong transaksion. Dakol sa sato an regular na nagpapagasolina; taano ta dai ialok an mga magasin sa nagbabantay sa gasolinahan? Padanayon na madaling makua an mga iyan kun nagbibisita an mga paryente, kun minalunad sa pampublikong lunadan, o kun kamo may hinahalat na kaolay. Igwa daw kamong naiisip na iba pang angay na okasyon?
◼ Mag-andam nin Halipot na Pag-atubang kan Magasin: Iplano an halipot sanang sasabihon, alagad sabihon iyan nin marahay. Magin entusiastiko. Aboton an puso. Magin espesipiko. Pumili nin sarong ideya hale sa sarong artikulo, ipahayag iyan sa nagkapirang tataramon, asin ialok an mga magasin. An pinakamarahay na paagi iyo na magpalataw nin hapot sa sarong interesanteng tema dangan itokdo an artikulo na nagtatao nin Makakasuratan na simbag. Konsiderara an nagkapirang halimbawa kun paano puedeng magibo ini:
3 Kun itinatampok nindo an sarong artikulo manongod sa naglalangkaw na bilang nin krimen, puede nindong ihapot:
◼ “Ano an kaipuhan tanganing kita makatorog sa banggi na dai natatakot sa krimen?” An kagharong tibaad magin negatibo manongod sa pagrahay kan mga bagay. Puede nindong sabihon na iyo man iyan an namamatean nin dakol na tawo asin idugang na igwa kamo nin impormasyon na pinaniniwalaan nindong pagkakainteresan nia. Dangan sambiton an angay na punto sa artikulo.
4 Kun nag-aalok nin artikulo manongod sa buhay pampamilya, puede nindong sabihon:
◼ “Nanonompongan nin dakol na tawo na sarong angat nanggad an maghanap-buhay asin magpamilya ngonyan na mga panahon. Igwa daw kitang madodolokan na makukuanan ta nin mapananarigan na giya?” Dangan itokdo an sarong espesipikong komento sa magasin na nagpapaheling kan kadonongan na makukua sa Biblia.
5 Puede nindong gamiton an paaging ini kun itinatampok an sarong artikulo manongod sa sarong sosyal na problema:
◼ “An kadaklan na tawo napaaatubang sa pangigipit ngonyan. Nungkang katuyohan nin Dios na kita mabuhay sa kamugtakan na ini.” Dangan ipaheling kun paanong an materyal sa artikulo puedeng tumabang sa sato na atubangon an mga problema sa buhay ngonyan asin makatao nin tunay na paglaom sa ngapit.
6 An Pagpatotoo sa Kalye Epektibo: Sa isyu kan Enero 1940 kan Informant (An Satong Ministeryo sa Kahadean) na an mga parahayag pinarigon an boot sa kaenot-enote na mag-iskedyul nin sarong espesyal na aldaw kada semana para sa pagpatotoo sa kalye na ginagamit an mga magasin. Nakikakabtang daw kamo sa pagpatotoo sa kalye sa panapanahon? Kun iyo, an ginagamit daw nindong paagi epektibo nanggad? Nagkapirang parahayag an naobserbaran na nagtitindog sa sibot na kanto nin kalye, na sinda-sinda nag-oorolay mantang dakol na tawo an nag-aaragi na dai naririparo. Imbes na tumindog nin taraed na kapot an mga magasin, mas epektibo na magsuruhay asin dolokon an mga tawo. An mga estranghero tibaad pumondo asin maghinanyog nin halipot kun sinda dodolokon nin saro sanang tawo, alagad dikit an madolok sa sarong grupo na okupadong marhay sa orolay. Mantang nakukua ta an atension nin dakol sa kalye, igwa nin espesyal na pangangaipo na magin marahay an pag-alinyar asin maggubing nin mabini na angay sa mga ministro nin Dios.—1 Tim. 2:9, 10.
7 Mga Ruta sa Magasin: Idtong may mga ruta sa magasin nakakapasakamot nin dakol na magasin dawa an mga teritoryo regular na nagigibo. An mga ruta sa magasin ekselenteng gikanan nin potensial na mga pag-adal sa Biblia.
8 Kun kamo nagdadalaw liwat sa pagdara kan mga magasin, maririsa nindo na an pagkainamigohan nindo asin kan kagharong nagtatalubo. Mantang orog kamong nagigin pamilyar, orog man na nagigin pasil na ipakipag-olay an Makakasuratan na mga tema. Ini puedeng gumiya sa pagpopoon nin pag-adal sa Biblia. Asin girumdoma, sa kada makaolay nindo an kagharong puede kamong magreport nin sarong pagdalaw liwat.
9 An sarong tugang na babae regular na nagdara nin mga magasin sa sarong babae na perming minaako kaiyan alagad nagsasabi: “Dai ako nagtutubod sa sinasabi mo sakuya.” Sa sarong mas huring pagdalaw, nanuparan kan tugang na babae an agom na lalaki sa harong. Pakatapos nin makiamigong orolay, ikinaareglo na ponan an sarong pag-adal sa Biblia. An tugang na babae nakiamigo sa tolong aking lalaki na nakiayon sa pag-adal. Katapustapusi, an ina asin an saiyang mga aking lalaki idinusay an saindang buhay ki Jehova asin nabautismohan. Sa panahon na ini, 35 miembro kan pamilya an nag-ako na kan katotoohan. An gabos na ini huli ta nagbalik an tugang na babae sa saiyang ruta sa magasin!
10 Dakol an paagi na ponan an sarong ruta sa magasin. Irekord sana an saindong mga ikinakapasakamot asin iareglo an pagbalik kada ikaduwang semana na dara an pinakabagong mga isyu. An sarong paagi iyo an paggamit kan impormasyon sa irarom kan titulong “Sa Masunod na Luwas.” Sa saindong pagbalik, sabihon sa kagharong na dara nindo an artikulong sinabi nindo kan nakaagi. O, kun minabalik liwat, puede nindong sabihon: “Kan basahon ko an artikulong ini, naisip ko na puede kamong magkainteres dian . . . ” Kun natapos na nindo an pagdalaw, inota an limang simpleng punto sa saindong house-to-house record: (1) ngaran kan kagharong, (2) adres, (3) petsa kan pagdalaw, (4) ikinapasakamot na mga isyu, asin (5) itinampok na artikulo. An nagkapirang parahayag nakatipon na nin sagkod sa 40 o mas dakol pang tawo sa saindang ruta sa magasin!
11 Komersial na Teritoryo: Dakol na magasin an ikinakapasakamot nin mga parahayag na naghuhulit sa komersial na teritoryo. Naprobaran na daw nindo an paghulit sa mga tindahan? Sa primero, an nagkapira natatakot na dumolok sa mga negosyante, alagad pakatapos na maprobaran ninda iyan nin nagkapirang beses, nanompongan ninda na iyan makawiwili asin kapakipakinabang. Taano ta dai nindo hagadon sa sarong eksperyensiadong parahayag o payunir na tabangan kamo na makapoon?
12 Igwa nin nagkapirang bentaha an paghulit sa mga tindahan. Kakadikit kan mayo sa harong, kisuerra durante kan oras nin pagnegosyo! An mga negosyante sa parate magalang, minsan ngani tibaad bako sindang partikularmenteng interesado sa Biblia. Magpoon nin amay sa aldaw; posibleng mas istimaron kamo. Pakapamidbid kan saindong sadiri, puede nindong sabihon na bihira nindong manompongan an mga negosyante sa harong, kaya dinadalaw nindo sinda nin halipot sa saindang tinatrabawohan tanganing ialok an pinakabagong mga isyu kan An Torrengbantayan asin Awake! Isabi na dakol na negosyante an inaapresyar an satong mga magasin huli ta kaipuhan nindang masundan an mga pangyayari sa kinaban alagad kakadikit an panahon ninda sa pagbasa. Puedeng magin ruta sa magasin an interesadong mga tawo na nanonompongan sa komersial na teritoryo.
13 Mag-andam Bilang Pamilya: An kadikit na panahon puedeng itagama durante kan saindong pampamilyang pag-adal na pag-olayan kun arin na mga artikulo sa pinakabagong mga magasin an puedeng angay na gamiton sa saindong teritoryo. An mga miembro nin pamilya—kabale an mga aki—puedeng magsarosaralida sa pagpraktis kan saindang mga pag-atubang asin pagsimbag sa komon na mga pagsayuma na pinalalataw, siring sa: “Sibot ako,” “May sadiri na kaming relihion,” o “Dai ako interesado.” Ini mapagin posible para sa bilog na pamilya na makapakikabtang nin regular sa pagdistribwir nin magasin.
14 An mga Konduktor sa Pag-adal sa Libro Puedeng Tumabang: Kun posible, iiskedyul an mga pagtiripon bago maglingkod sa Aldaw nin Pagmamagasin sa mga lugar kan pag-adal sa libro imbes na an bilog na kongregasyon magtiripon sa Kingdom Hall. An mga nangengenot maninigong magin andam na marhay na may espesipikong mga suhestion para sa grupo. An mga pagtiripon bago maglingkod sa langtad—kabale na an pag-organisar kan grupo—maninigong magin halipot, na dai malampas nin 10 sagkod 15 minutos. An mga konduktor sa pag-adal maninigong seguradohon na may supisyenteng teritoryo tanganing an grupo magin sibot sa bilog na panahon nin paglilingkod sa langtad.
15 Magpaheling nin Pag-apresyar sa mga Magasin: An artikulong “Paggamit nin Marhay sa Torrengbantayan asin Awake!” na ipinublikar sa Agosto 1993 na isyu kan An Satong Ministeryo sa Kahadean nagsabi kan mahalagang puntong ini: “An Torrengbantayan asin Awake! dai nawawaran kan saindang halaga, dawa dai iyan ikinapasakamot saro o duwang bulan pakalihis kan petsa kan pagluwas kaiyan. An impormasyon kaiyan dai nagigin menus an halaga sa pag-agi nin panahon . . . An pagpabaya na matambak an daan na mga magasin asin dai na noarin man paggamit kaiyan nagpapaheling nin kadaihan nin pag-apresyar sa mahahalagang instrumentong ini. . . . Imbes na ipagilid an daan na mga luwas asin lingawan na iyan, bako daw na mas marahay na gumibo nin espesyal na paghihingoa na ipasakamot iyan sa interesadong mga tawo?”
16 Igwa ngonyan nin dakol na tawong may sadiosan na puso na naghahanap nin katotoohan. An impormasyon sa sarong magasin puedeng iyo sana an kaipuhan ninda tanganing giyahan sinda sa katotoohan! Kamo daw magigin orog na mapag-isip sa pagdistribwir nin magasin sa ngapit? Iaaplikar daw nindo an nagkapirang suhestion na ini sa Sabado asin Domingo mismong ini? Kamo mayaman na bebendisyonan kun iyan gigibohon nindo.
Praktikal na mga Suhestion:
◼ Basahon an mga magasin nin patienot, asin magin pamilyar sa mga artikulo.
◼ Pumili nin artikulo manongod sa sarong bagay na interesante sa pankagabsan sa saindong komunidad.
◼ Andamon an sarong pag-atubang na magigin angay sa manlaenlaen na tawo, siring sa mga lalaki, babae, o hoben. Ipaheling kun ano an ikatatao kan magasin sa kagharong asin kun paano na iyan magugustohan kan bilog na pamilya.
◼ Iplano na makikabtang sa saindong paglilingkod sa langtad kun an kadaklan na tawo nasa harong. Nagkapirang kongregasyon an nag-aareglo nin pagpatotoo sa banggi na dara an mga magasin.
◼ Padanayon na halipot an saindong pag-atubang asin direkta sa punto.
◼ Dai magtaram nin marikason. Kun mayong interes an kaolay nindo, an pagtaram nin marikas dai makatatabang. Pagmaigotan na magin pamugtak, asin tawan nin oportunidad an kagharong na sumimbag.
Pag-alok kan mga Magasin sa Harong-harong:
◼ Magkaigwa nin makiamigong huyom asin maboot na tono nin boses.
◼ Magin entusiastiko manongod sa mga magasin.
◼ Magtaram nin luway-luway asin malinaw.
◼ Magtaram dapit sa saro sanang tema; pukawon an interes sa halipot, asin ipaheling an halaga kaiyan sa kagharong.
◼ Itampok an saro sanang artikulo.
◼ Itampok an saro sanang magasin, na iinaalok an iba bilang kaibahan.
◼ Pakaptan an magasin sa kagharong.
◼ Ipaaram sa kagharong na plano nindong bumalik.
◼ Magkaigwa nin makiamigo, positibong konklusyon kun sayumahan an mga magasin.
◼ Inota sa house-to-house record an gabos na interesado asin ikinapasakamot.
Mga Oportunidad sa Pagpasakamot nin mga Magasin:
◼ Pagpatotoo sa harong-harong
◼ Pagpatotoo sa kalye
◼ Pagpatotoo sa mga tindahan
◼ Mga pagdalaw liwat sa ruta sa magasin
◼ Pagpatotoo sa banggi
◼ Kun minadalaw liwat
◼ Pagsongko sa mga dating inaadalan sa Biblia
◼ Kun nagbibiahe, nagsasaod
◼ Kun nakikipag-olay sa mga paryente, katrabaho, kataed, kaeskuela, maestro
◼ Sa pampublikong lunadan, sa mga kuartong halatan