Magtao nin Banal na Paglilingkod Aldaw Asin Banggi
1 Sarong pambihirang pribilehio an itinao sa sato. Kabtang kita kan pambilog na kinaban na organisasyon nin mga paraebanghelyo na ginagamit ni Jehova tangani na otobon an pinakadakulang gibohon kasuarin pa man na pagbalangibog kan Kahadean! (Mar. 13:10) Kita daw nakikikabtang sa gibohon na ini sa pinakalubos na mapupuede?
2 Dai niato aram kun pira an sa katapustapusi mahimate sa satong paghuhulit. Inaasegurar kita ni Jehova na iyan magigin “sarong dakulang kadaklan” na gabos “nagtatao sa saiya nin banal na paglilingkod aldaw asin banggi.“ (Kap. 7:9, 15) An limang milyon na Saksi bako sanang mga parahinanyog, ni sinda man mga paraatender sana sa pagtiripon. Sinda mga paragibo na nagbabalangibog kan maogmang bareta sa bilog na kinaban!
3 Isip-isipa an dakulang patotoo na ikatatao kun an kada saro sa sato boluntad na ihiras an katotoohan sa saro sanang tawo kada aldaw. Sa halipot na panahon, an gabos sa satong teritoryo puedeng makaolay! An satong pag-apresyar ki Jehova maninigong magpahiro sa sato na magtaram dapit sa saiya na may entusiasmo.—Sal. 92:1, 2.
4 Tabangan an Iba na Magtao nin Banal na Paglilingkod: Durante kan nakaaging taon nin paglilingkod sa Pilipinas, kinonduktahan an promedyong 95,800 na pag-adal sa Biblia kada bulan. An satong pasohan iyo na tabangan an mga tawong ini na magin mga disipulo ni Jesus. (Mat. 28:19, 20) An dakol sa sainda nakagibo na nin pag-oswag paagi sa regular na pag-atender sa mga pagtiripon. Pinonan na nindang makipag-olay sa saindang mga kamidbid “dapit sa makangangalas na mga bagay nin Dios.” (Gibo 2:11) Puede na daw sinda ngonyan na agdahon na makikabtang sa ministeryo sa publiko?
5 Ngonyan na Abril maninigo kitang gumibo nin espesyal na paghihingoa na agdahon an mga bagohan na kualipikadong umiba sa sato sa paglilingkod sa langtad. Nagpahayag na daw an saindong inaadalan nin pagmawot na gumibo kaini? Kun iyo, naaabot na daw nia an Makakasuratan na mga kahagadan? (Helingon an librong Our Ministry, pahina 97-9.) Kun namamatean nindo na kualipikado na an inaadalan, ipakipag-olay ini sa nangengenot na paraataman, na maareglo nin duwang magurang sa kongregasyon na masiyasat kan bagay. Kun kualipikado na an inaadalan na akoon bilang dai pa bautisadong parahayag, agdahon sia na umiba sa saindo sa langtad.
6 Puedeng konsideraron nin mga magurang kun baga an saindang mga aki kualipikado nang magin dai pa bautisadong mga parahayag. (Sal. 148:12, 13) Kun mawot kan saindong aki na magtaram mismo sa paglilingkod sa Kahadean asin marahay an saiyang paggawe, puede kamong dumolok sa saro sa kamagurangan sa komite nin paglilingkod. Pakatapos na kaolayon kamo asin an aki, duwang magurang sa kongregasyon an madeterminar kun baga sia kualipikado nang magin sarong parahayag. Igwa nin espesyal na dahelan para sa paggayagaya kun an mga aki minaiba sa sato sa pag-omaw sa Dios!
7 An kada saro logod sa sato lubos na aprobetsaran an satong makangangalas na pribilehio na omawon nin “marhay“ si Jehova. Dai niato togotan na lumihis an sarong aldaw na dai kita nagtatao kaining banal na paglilingkod!—Sal. 109:30; 113:3.