Nagbago Na an mga Panahon
1 Sinasabi sa sato kan Biblia na “an kamugtakan kan kinaban na ini nagbabago.“ (1 Cor. 7:31) Abaa katotoo kaiyan ngonyan! Dawa sa satong bilog na buhay, naheling na niato an biglang mga pagbabago sa pag-isip asin paggawe nin mga tawo sa gabos na kabtang kan sosyedad nin tawo. Tangani na mapangganang mapaabotan sinda kan mensahe nin Kahadean, an satong pagdolok kaipuhan na makisabay sa nagbabagong mga panahon.
2 Kan nakaaging mga taon, sa dakol na nasyon an gibohon na pagpatotoo laen huli ta an mga tawo namuhay nin mas trangkilo, asin tiwasay sinda. An relihion may sagradong lugar sa saindang buhay. Iginagalang na marhay an Biblia. Kan mga aldaw na idto parateng kaipuhan niato na pahimutikan an falsong mga doktrina. Ngonyan, ribaraw an buhay nin mga tawo. Dakol an nawaran na nin pagtubod sa relihion asin sa Biblia.
3 An sarong nagbibiaheng paraataman nagkomento: “Ngonyan, garo baga kadakoldakol nin problema sa buhay nin mga tawo kaya kaipuhan niato sindang tokdoan kun paano mamuhay. An pangenot na inaasikaso nin mga tawo naturalmenteng nakasentro sa saindang sadiri, sa saindang mga pamilya, asin sa saindang mga pinaghahaditan. Ini an mga bagay na pinag-oorolayan ninda kun sinda nagkakatiripon. Kaipuhan na girumdomon niato iyan sa satong pagpatotoo. Magkakaigwa kita nin orog na kapangganahan kun makapopoon kita nin mga pag-orolay na konektado sa mga problema na inaatubang kan mga nakakaolay niato.
4 An Kahadean nin Dios an Solamenteng Siertong Paglaom Para sa Ngapit: An kadaklan na tawo kakadikit kan kompiansa sa gobyerno nin tawo. Nasudya an falsong relihion na tawan sinda nin ano man na basihan para sa paglaom. Iyan an dahelan kun taano ta an pinakadakulang panga-ngaipo nin katawohan iyo na makadangog kan maogmang bareta manongod sa Kahadean nin Dios. An satong pangenot na pasohan sa pagpapatotoo iyo na isentro an atension sa Kahadean asin ipaheling kun paano kaiyan itatao an mga solusyon sa gabos na problema na napapaatubang sa katawohan.
5 An Biblia an Solamenteng Masasarigan na Gikanan nin Paggiya: An kadaklan ngonyan linalagalag kan mga namomoon na nananarig sa kadonongan nin tawo asin kinabanon na mga pilosopiya. (Jer. 10:23) An pinakamahalagang leksion na manonodan ninda iyo na kaipuhan nindang ‘manarig ki Jehova sa bilog nindang puso asin dai manarig sa saindang sadiring pakasabot.’ (Tal. 3:5) Mantang nagbago na an mga panahon, an Biblia dai nagbago. Huli kaiyan, sa satong ministeryo maninigo niatong tokdoan an iba na pahalagahan an ipinasabong na paggiya kaiyan. (2 Tim. 3:16, 17) Tangani na magibo iyan, dapat niatong gamiton an Biblia sa pagsimbag sa saindang mga teapot, asin suportaran an pangangaipo na pag-adalan iyan asin iaplikar an praktikal na kadonongan kaiyan.
6 Maski sa nagbabagong mga panahon ngonyan, an satong mga katuyohan sa ministeryo dai nagbago. Minsan siring, tangani na maotob an mga katuyohan na ini sa pinakamarahay na paagi durante kan 1996, an satong sinasabi dapat na konektado sa presenteng mga pangangaipo kan mga pinatototoohan niato. Paagi sa paggibo kaini, puede kitang magin mga parahiras kan maogmang bareta sa iba asin sa siring madara an pinakadakol na tawo.—1 Cor. 9:19, 23.