Tabangan Sinda na Maglingkod Giraray
1 Si apostol Pablo nagsurat sa saiyang mga kapwa Kristiano: “Oras na para sa saindo na magmata sa pagkatorog, huli ta ngonyan an satong kaligtasan orog na harani kisa kan kita magturubod.” (Roma 13:11) Naghahadit si Pablo dapit sa saiyang mga tugang na tinungka sa espirituwal; gustong-gusto nia sindang tabangan na magin aktibo liwat.
2 Totoong masasabi na an banggi kan daan na kinaban na ini makakaagi na asin madali na an pagsirang kan bagong kinaban. (Roma 13:12) May marahay na dahelan kita na maghadit dapit sa mga tugang niato na uminontok na sa pakikiasosyar sa sato bilang mga parahulit kan maogmang bareta. Kan nakaaging taon nin paglilingkod, sa Pilipinas sana, labing 3,000 na parahayag an natabangan na magin aktibo liwat. Paano ta matatabangan an iba pang bakong aktibo na maglingkod giraray ki Jehova?
3 An Magigibo nin Kamagurangan: Kadaklan na bakong aktibo dai man isinikwal an katotoohan; sinda nagpondo sana sa paghuhulit huli sa pagkadisganar, personal na mga problema, materyalismo, o mga kahaditan sa buhay. (Luc. 21:34-36) Kun posible, mas marahay na tabangan sinda bago sinda magin bakong aktibo. An sekretaryo kan kongregasyon maninigong sabihon sa konduktor sa Pag-adal sa Libro kan Kongregasyon kun an sarong parahayag magin bakong regular sa paglilingkod. An pagsongko sa pagpapastor puedeng gibohon. Kaipuhan na aramon kan kamagurangan an causa kan problema asin kun paano ikatatao an tabang.—Helingon an Setyembre 15, 1993 na Torrengbantayan, pahina 20-3.
4 Kun Paano Makatatabang an Iba: Kadaklan sa sato may midbid na saro na nagin bakong aktibo. Tibaad ini sarong tawo na dayupot na katood ta kaidto. Ano an magigibo niato tanganing tumabang? Taano ta dai gumibo nin halipot na pagsongko? Sabihon sa saiya na pighihidaw na nindo sia. Magin maogma asin positibo. Ipahayag an saindong pagmakolog na dai pinalalataw na may helang sia sa espirituwal. Mag-estorya nin nakapakokosog na mga eksperyensia sa kongregasyon. Magpresentar na ibahan sia sa mga pagtiripon. Ipaaram sa kamagurangan an simbag na nakua nindo.
5 Kun an saro na nagin bakong aktibo bumalik sa mga pagtiripon, posibleng mag-alangan sia kun nakikipag-olay sa iba na kamidbid nia kaidto. Dai nindo sia paghapoton nin, “Nagparasaen ka?” Imbes, ipamate sa saiya na inaako sia. Ientra sia sa orolay. Ipabisto sia sa mga dai pa nia midbid. Taedan sia durante kan pagtiripon, na sinisierto na igwa siang libro nin mga kanta asin materyal na pag-aadalan. Parigonon an saiyang boot na bumalik, asin magpresentar na tumabang.
6 May mainit na kapadangatan sa mga nalagalag, si Jehova asin si Jesus naggagayagaya kun an mga siring maomayan sa espirituwal. (Mal. 3:7; Mat. 18:12-14) Mamamatean man niato an kagayagayahan na iyan kun magin mapanggana kita sa pagtabang sa iba na maglingkod giraray ki Jehova.