An Makikatood na Pakikipag-olay Nakatataros sa Puso
1 An pakikipag-olay “berbal na pagriribayan nin mga ideya.” An pagpoon nin makikatood na pakikipag-olay sa sarong topiko na may labot sa iba tibaad makapukaw kan saindang interes asin makatabang sa sato sa pagtaros kan saindang puso. Mas epektibo an pakipag-olay sa mga tawo sa makikatood asin kalmadong paagi imbes na sermonan sinda.
2 Kun Paano Poponan an Makikatood na Pakikipag-olay: An pakikipag-olay ta sa iba dai nangangahulogan na kaipuhan niatong magtao nin dakol na kahangahangang punto asin teksto. Iyan nangangahulogan sana na madara niato an ibang tawo na makipag-olay sa sato. Halimbawa, kun kita nakikipag-olay sa satong kataed na harong, kita makikatood asin kalmado. Dai ta iniisip an masunod na mga itataram niato kundi natural na nagsisimbag sa sinasabi nia. An pagpaheling nin tunay na interes sa sinasabi nia tibaad makadagka sa saiya na padagos na makipag-olay sa sato. Maninigo na siring man kaiyan kun kita nagpapatotoo sa iba.
3 An mga topikong arog nin krimen, mga problema nin mga hoben, lokal na mga isyu, mga kamugtakan sa kinaban, o dawa an panahon puedeng gamiton tanganing ponan an makikatood na mga pag-orolay. An mga tema na direktang nakaaapektar sa buhay nin mga tawo epektibong marhay sa pagpukaw kan saindang interes. Oras na maponan an sarong pag-oolay, puede niatong luway-luway na giyahan iyan pasiring sa mensahe kan Kahadean.
4 An kalmadong pakikipag-olay dai nangangahulogan na dai na kaipuhan an patienot na pag-andam. Kaipuhan iyan. Minsan siring, dai na kaipuhan na gumibo nin estriktong outline o magtoom nin sermon, na magbubunga nin sarong pakikipag-olay na dai ikababagay sa presenteng mga kamugtakan. (Ikomparar an 1 Corinto 9:20-23.) Marahay na mag-andam nin saro o duwang Makakasuratan na tema, dangan isentro dian an mga pag-oolay. An pagrepaso sa mga tema na manonompongan sa librong Reasoning makatatabang digdi.
5 Mahalagang mga Kualidad Para sa Sarong Makikatood na Pakikipag-olay: Kun nakikipag-olay kita sa iba, kita maninigong magin mainit asin sinsero. An huyom asin maogmang itsura nagpapabanaag sa mga kualidad na ini. Yaon sa sato an pinakamarahay na mensahe sa kinaban; iyan nakaaakit na marhay sa mga sadiosan an puso. Kun mamatean ninda na an interes ta sa sainda minomotibar nin sinserong pagmawot na ihiras sa sainda an maogmang bareta, sinda kun siring tibaad mapahirong maghinanyog.—2 Cor. 2:17.
6 An pakikipag-olay dapat na magin nakaoogmang eksperyensia. Kun siring, kita maninigong magin maboot asin mataktika sa pag-atubang kan mensahe kan Kahadean. (Gal. 5:22; Col. 4:6) Pagmaigotan na makawalat nin paborableng impresyon minsan kun an tawo dai naghihimate.
7 An pakapoon nin sarong makikatood na pag-oolay bakong resulta nin abilidad sa pagsermon. Iyan pagpukaw sana nin interes sa sarong tema na pinag-iinteresan nin sarong tawo. Hingoahon niatong taroson an puso nin mga tawo paagi sa paghiras sa sainda kan maogmang bareta kan Kahadean.—2 Ped. 3:13.