Pagpauswag kan Satong Kakayahan sa Ministeryo​—Pagpuon nin Pakikipag-ulay na Matao nin Oportunidad na Makapagpatotoo

Nakapagpatotoo nin impormal si Jesus sa Samaritana huling pinunan niyang kaulayon an babayi. Paano niyato mapapauswag an satong kakayahan na makapuon nin pakikipag-ulay sa mga dai kamidbid?

• Magin mainamigo asin makipag-ulay sa mga tawo. Dawa pagal-pagal, pinunan ni Jesus an pakikipag-ulay paagi sana sa paghagad nin maiinom. Kaya makakapuon ka man paagi sa simpleng pangungumusta dangan puwede mong komentuhan an kamugtakan nin panahon o an sarong pangyayari sa presente. Tandaan, an panginot na katuyuhan ta iyo na makapuon sana nin pakikipag-ulay, kaya ipakipag-ulay an ano man na tema na puwedeng pagkainteresan kan saro. Kun dai siya magsimbag, mayo man nin mawawara. Purbaran giraray iyan sa iba. Maghagad ki Jehova nin kusog nin buot.—Ne 2:4; Gi 4:29.

• Magin alisto sa mga oportunidad na iintrodusir an maugmang bareta, pero dai maghidali. Pabayaan na magin natural an dalagan kan urulay. Kun magigin mapamirit ka, puwedeng mauyam an kaulay mo asin dai na makipag-ulay. Dai madisganar kun natapos an pakikipag-ulay mo na dai ka nakapagpatotoo. Kun nasusupog kang ipakipag-ulay tulos an dapit sa maugmang bareta, praktison na makapuon nin pakikipag-ulay na mayong katuyuhan na makapagpatotoo. [I-play asin tukaron an video 1.]

• Humanap nin oportunidad na makapagpatotoo paagi sa udok sa pusong pagsambit dapit sa tinutubod mo na tibaad makapahiro sa kaulay mo na hagadan ka nin paliwanag. Nagpalataw si Jesus nin nakakapukaw sa interes na mga punto na nakapahiro sa babayi na maghapot. Kan inintrodusir na niya an maugmang bareta, sinisimbag man sana niya an mga hapot kan babayi. [I-play asin tukaron an video 2, dangan i-play asin tukaron an video 3.]