Naprobaran Na daw Nindong Magpatotoo sa Banggi?
1 Kita gabos nakanonompong nin kaogmahan sa pagigin mabunga sa satong gibohon. Sa ibong na kampi, kun dai kita nakaheheling nin positibong mga resulta, puedeng magin nakapapagal asin bakong nakakokontento an gibohon. (Ikomparar an Eclesiastes 3:10-13.) Puede niatong ikaaplikar an prinsipyong ini sa satong paghuhulit. Aram niato gikan sa eksperyensia na kun kita naghaharongharong asin nakakapakipag-olay sa mga tawo manongod sa Biblia, minapuli kita na narepreskohan sa espirituwal. Namamatean niato na talagang igwa kitang nahaman.
2 Sa ibang lugar nagin nang masakit na marhay na manompongan an mga tawo sa harong durante nin mga aga asin hapon. Dakol na kongregasyon an inatubang an problemang ini paagi sa paggibo nin mga areglo para sa pagpatotoo sa banggi, asin nakanompong sinda nin tunay na kapangganahan. Nagrereport an mga parahayag na kun sinda minasongko sa banggi, dakol nang tawo an nasa harong asin an mga tawo mas relaks patin mas may tendensiang maghinanyog sa mensahe kan Kahadean. Naprobaran na daw nindong magpatotoo sa banggi sa saindong teritoryo?—Ikomparar an Marcos 1:32-34.
3 Kamagurangan Mag-organisar Kamo nin Pagpatotoo sa Banggi: Sa ibang lugar an mga pagtiripon para sa paglilingkod sa langtad sa banggi o amay na banggi sinusuportaran na marhay kan hoben na mga parahayag pakaretira ninda sa eskuelahan asin nin mga adulto na nakatapos na sa saindang sekular na trabaho sa oras na iyan. An ibang parahayag na dai nakapakikikabtang sa mga Sabado asin Domingo nanompongan an pagpatotoo sa banggi sa laog kan semana na praktikal na paagi tanganing sinda magkaigwa nin regular na pakikikabtang sa paghuhulit.
4 Igwa nin manlaenlaen na aktibidad na magigibo nindo durante kan pagpatotoo sa banggi. Puede kamong magpatotoo sa harong-harong na dara an mga magasin o gumamit nin alok na literatura para sa bulan. An banggi marahay na panahon na sumongko sa mga tawo na mayo sa harong kan dumalaw an mga parahayag sa aldaw o sa mga Sabado asin Domingo. Tibaad igwa man nin marahay na teritoryo para sa pagpatotoo sa tinampo, na tinotogotan kamong makaolay an mga tawo na papuli hale sa trabaho. Dakol an nakanompong na an banggi iyo an pinakamarahay na panahon na gumibo nin mga pagdalaw liwat.
5 Magin Maingat Asin Madonong: An pagluwas sa banggi puedeng peligroso sa pirang lugar. Madonong na lumakaw na manduwaduwa o grupo-grupo sa maliwanag na marhay na mga tinampo asin dalawon sana an mga harong sa ligtas na mga lugar. Kun minatoktok kamo sa pinto, tumindog kun saen maheheling kamo, asin magpamidbid nin malinaw. Magin mapagmansay. Kun maobserbaran nindo na duminalaw kamo sa bakong kombenyenteng panahon, arog baga kun nagkakakan an pamilya, mag-alok na dumalaw sa ibang panahon. Parateng pinakamarahay na magpatotoo sa amay na mga oras sa banggi, imbes na dumalaw na banggihon na, kun an mga kagharong tibaad nag-aandam nang matorog.
6 Makasisierto kita na, mantang nagtatao kita sa Dios nin “banal na paglilingkod aldaw asin banggi,” seguradong bebendisyonan ni Jehova an satong mga paghihingoa.—Kap. 7:15.