Puede daw Nindong Ibagay an Saindong Iskedyul?

1. Taano ta maninigo niatong ibagay an satong iskedyul para sa paghuhulit?

¹ Bilang tunay na mga Kristiano, inako niato an pangagda na magin “mga parasira nin mga tawo.” (Mat. 4:19) Siring sa literal na mga parasira, posibleng magkaigwa kita nin mas mararahay na bunga sa gibohon na paninira nin mga tawo kun maiskedyul kita nin panahon na maghulit kun an mga tawo nasa harong. Kun pabanggi na asin sa amay na banggi, mas dakol na tawo an nasa harong. Sa parate, sinda relaks asin tibaad mas gustong mag-ako nin mga bisita. Puede daw nindong ibagay an saindong iskedyul tangani na makapaghulit sa mga oras na iyan?—1 Cor. 9:23.

2. Ano an nagkapirang paagi na mapapaabotan niato kan maogmang bareta an mas dakol na tawo?

² Paghuhulit sa Banggi: An patienot na pagplano na maghulit durante kan mga oras sa banggi magpapangyari sa sato na mapaabotan kan maogmang bareta an mas dakol na tawo. (Tal. 21:5) An mga hoben puedeng maghulit pagretira sa eskuelahan. An iba puedeng makagibo man kaiyan pagkatapos kan trabaho. An nagkapirang grupo sa pag-adal sa libro puedeng mag-areglo na maghulit sa laog nin sarong oras bago kan semanal na pag-adal.

3. Sa anong mga paagi puede kamong maghulit sa saindong teritoryo kun pabanggi na asin sa amay na mga oras sa banggi?

³ An paghuhulit sa harong-harong kun pabanggi na asin sa amay na mga oras sa banggi puedeng magresulta sa pakikipag-olay sa mga parateng mayo sa harong. Sa dakol na teritoryo, an paghuhulit sa tinampo asin iba pang klase nin pampublikong paghuhulit puede man na gibohon sa banggi. Asin nanompongan nin dakol na banggi an pinakamarahay na oras na dumalaw liwat asin makapoon nin mga pag-adal sa Biblia.

4. Taano ta importante na magpaheling nin pagigin mapagrisa asin magin makonsiderasyon kun naghuhulit sa banggi?

⁴ Kaipuhan an Pagigin Mapagrisa: Kaipuhan an marahay na paghusgar kun naghuhulit sa banggi. Sa parate, pinakamarahay na maghulit sa amay na mga oras sa banggi, imbes na dumalaw kun an mga kagharong tibaad nag-aandam nang magtorog. (Fil. 4:5) Pagtuktok nindo sa pinto, tumindog kun saen kamo maheheling, asin malinaw na magpamidbid. Ipaaram tolos an katuyohan kan saindong pagdalaw. Kun bakong kombenyente an oras kan saindong pagdalaw, arog baga kun nagkakakan an pamilya, sabihon na madalaw na sana sa ibang panahon. Pirmeng magin makonsiderasyon.—Mat. 7:12.

5. Paano kita makakalikay sa potensial na mga peligro mantang naghuhulit?

⁵ Kaipuhan man niatong magin marigmat sa potensial na mga peligro. Kun kamo maghuhulit pagdiklom o kun banggi na, madonong na magbiahe nin duwa-duwa o bilang grupo. Magdanay sa mga tinampo na maliwanag asin dai kamo napapasuway. Maghulit sana sa mga lugar na sa pagmate nindo dai kamo namemeligro. Likayan an mga lugar na tibaad peligroso kun banggi na.—Tal. 22:3.

6. Anong dagdag na pakinabang an puedeng ibunga kan paghuhulit kun pabanggi na asin sa amay na banggi?

⁶ An paghuhulit kun pabanggi na asin sa amay na banggi puedeng magtao sa sato nin panahon na makiiba sa paglilingkod sa mga auxiliary asin regular payunir. (Roma 1:12) Puede daw nindong ibagay an saindong iskedyul tangani na makapartisipar sa kabtang na ini nin paglilingkod?