Hapot

◼ Ano an maninigong gibohon kun an iinasignar na espiker sa pahayag-publiko dai makaabot nin tama sa oras para sa pagtiripon?

Sa panapanahon, an dai malilikayan na mga kamugtakan maolang sa sarong tugang na lalaki na makaabot nin tama sa oras tangani na itao an saiyang nakaiskedyul na pahayag. Kun may dahelan na maniwala na maabot sia sa dai mahahaloy, puedeng magdesisyon an kamagurangan na enoton an Pag-adal sa Torrengbantayan; an Pahayag-Publiko puedeng sumunod pakatapos kaiyan. Kumusta kun malinaw na dai maabot an espiker? Tibaad an saro sa lokal na mga espiker makatatao nin ano man na pahayag na iinandam na nia.

An maingat na patienot na pagplano parateng minaolang sa problemang ini. Maninigong kaolayon kan nagkokoordinar kan pahayag-publiko an kada espiker kisuerra sarong semana bago pa tangani na pagirumdomon sia kan saiyang asignasyon. Maninigong kaiba sa pagirumdom an oras kan pagtiripon, an adres kan Kingdom Hall asin numero kan telepono, patin an klarong mga direksion kun paano hahanapon an tiriponan. Dapat na maingat na isurat kan espiker an mga detalyeng ini. Kun may pangyayaring dai malilikayan na maolang sa saiya sa pagtao kan pahayag, maninigo niang kontakon tolos-tolos an nagkokoordinar kan pahayag-publiko tangani na ikaareglo an kasalihid. Dapat na gibohon an gabos na paghihingoa tangani na malikayan an ultimo-orang mga pagkanselar. Kun mahuhuri nin pirang minuto an espiker, puede niang iareglo na magtelepono o kun dai magpadara nin mensahe kun mapupuede tangani na maaraman kan mga tugang kun paano mapadagos.

An pagpahalaga sa mga asignasyon para sa pahayag-publiko, marahay na patienot na pagplano asin mga pagirumdom, patin maingat na pangangataman makagagarantiya na an kongregasyon magkakamit nin kapakipakinabang na pahayag-publiko kada semana.