Magpaheling nin Konsiderasyon sa Iba—Kabtang 1
1 Naggagayagaya kita na maheling an pagtalubo kan banwaan ni Jehova, na nagbunga nin dagdag na dakol pang kongregasyon. Sa ibang lugar, nangorogna sa mas darakulang siudad, nagkapirang kongregasyon an kaipuhan na gumamit nin saro sanang Kingdom Hall. Naghahagad an situwasyon na ini nin ekstrang konsiderasyon sa gabos na kalabot.
2 An kada kongregasyon na naggagamit kan Kingdom Hall maninigong bayaan iyan na husay asin areglado para sa mga tugang na sunod na malaog. An mga tukawan maninigong husay na areglaron, an ano man na literatura sa counter maninigong isaray, asin an ano man na personal na mga bagay na nawalat sa Kingdom Hall maninigong tiponon. An mga kasilyas maninigong bayaan na malinig, na sinisierto na yaon an kinakaipuhan na mga suplay asin iinapon an laog kan mga basurahan.
3 Kun nakaiskedyul na magpoon sa dai mahaloy an saro pang pagtiripon, an mga yaon pa pakatapos kan naenot na pagtiripon maninigong dai magparahaloy kun dai kaipuhan. An halawig na pakikipag-olay puwedeng magbunga nin pagsurusuan asin makaatraso sa mga tugang na nag-aandam para sa masunod na pagtiripon. An paradahan puwedeng limitado, asin magigin kabootan na humale tolos tanganing an mga minaabot magkaigwa nin lugar na mapaparadahan. Sa ibong na kampi, an mga maatender sa masunod na pagtiripon dai maninigong mag-abot nin amay na marhay, na nagkacausa nin dai kinakaipuhan na pagsurusuan sa paradahan asin sa luwas kan Kingdom Hall.
4 Kun saen kalabot an nagkapirang kongregasyon, igwa nin espesyal na pangangaipo para sa dayupot na kooperasyon sa pag-areglo para sa semanal na paglinig kan Kingdom Hall. Sa parate, nagsasarosalida an mga kongregasyon sa paglinig kan Kingdom Hall sa laog nin itinalaan na peryodo. Kun an saindong kongregasyon igwa kan paninimbagan na iyan, siertohon na magibo nin marhay asin tolos-tolos an paglinig tanganing an ibang kongregasyon na naggagamit kan hall mayo nin dahelan na magreklamo.
5 Sa panapanahon tibaad magkaigwa nin pangangaipo para sa mga kongregasyon na liwaton an mga oras nin pagtiripon durante kan pagsongko kan paraataman sa sirkito. Kun apektado an saro pang kongregasyon, maninigong patienot nang paisihon kan mga magurang an ibang kongregasyon tanganing maimpormaran ninda nin amay pa an saindang mga parahayag. Siring man, kun igwa nin autorisadong aktibidad na nakaiskedyul, siring baga kan Paadalan sa Payunir na Paglilingkod, miting kan mga magurang sa sirkito, o kasal, an ibang kongregasyon asin siisay man na paraataman sa sirkito na apektado maninigong dolokon nin patienot tanganing dai sinda mag-iskedyul na gumamit kan Kingdom Hall sa iyo man sanang panahon.
6 Igwang nagkapirang hall na ginagamit nin mga kongregasyon na nakaasignar sa ibang mga sirkito. Mahalaga na an mga nagbibiyaheng paraataman na nagdadalaw sa mga hall na ini impormaran ninda an lambang saro sa sainda dapit sa nagdadangadang na mga pagdalaw na iiniiskedyul. An huring oras na mga pagliliwat o iba pang problema puwedeng magresulta kun an duwang nagbibiyaheng paraataman mag-iskedyul nin mga pagdalaw durante kan parehong semana.
7 An mamomoton na konsiderasyon sa iba, kaiba an marahay na patienot na pagplano asin kooperasyon, matabang na mapagdanay an maogmang relasyon sa pag-oltanan nin mga kongregasyon asin sisiertohon na ‘ginigibo an gabos na bagay sa disente asin aregladong paagi.’—1 Cor. 14:40.