“Pakosogon an Saimong Kairiba sa Harong”
1 Daing duwa-duwa, nagkakasuruhaysuhay an buhay pampamilya sa gabos na parte kan daga. An kinaban ni Satanas lugom sa pandadaya asin inmoralidad. (1 Juan 5:19) Idinodoon kaini an pagkaapurado niato na ‘pakosogon an satong kairiba sa harong’ asin tokdoan an iba kun paano man ninda magigibo iyan para sa saindang sadiring kairiba sa harong.—Tal. 24:3, 27.
2 Proteksion an mga Prinsipyo sa Biblia: Manonompongan an sekreto sa tunay na kaogmahan nin pamilya sa pag-aplikar kan mga prinsipyo sa Biblia. Kapakipakinabang an mga katotoohan na ini sa gabos na miembro kan kairiba sa harong. An pamilya na nag-aaplikar kaiyan magkakamit nin diosnon na katoninongan asin kaogmahan.—Ikomparar an Isaias 32:17, 18.
3 An mga prinsipyo na makatatabang sa sato na pakosogon an satong kairiba sa harong sinusumaryo sa bagong librong, An Sekreto sa Kaogmahan nin Pamilya. Nagtatapos an kada kapitulo paagi sa sarong kahon sa pagtokdo na nagdodoon kan mga prinsipyo na kaipuhan na girumdomon kan mga miembro nin pamilya. An kadaklan sa mga kahon na ini nagpopoon paagi sa hapot, “Paano an mga prinsipyong ini sa Biblia makatatabang . . . ?” Tinatabangan kita kaini na isentro an atension sa mga kaisipan nin Dios manongod sa temang pinag-oolayan.—Isa. 48:17.
4 Magin pamilyar sa libro. Pag-adalan na hanapon an mga prinsipyo na makatatabang kun lumataw an laen-laen na problema. Ipinaliliwanag kan libro an mga bagay na arog baga kan mga ini: kun ano an hahanapon kun naghohorophorop nin maaagom (kapitulo 2), kun anong mahalagang marhay na mga liabe an nagbubukas kan pinto pasiring sa nagdadanay na kaogmahan sa pag-agoman (kapitulo 3), kun paano mapadadakula nin mga magurang an saindang mga tin-edyer na magin responsableng mga adulto (kapitulo 6), kun paano poprotehiran an pamilya sa mapanlaglag na mga impluwensia (kapitulo 8), mga prinsipyo na matabang sa mga pamilyang nagsosolo an magurang (kapitulo 9), espirituwal na tabang para sa mga pamilya na pinupurisaw nin alkoholismo asin kadahasan (kapitulo 12), kun ano an gigibohon kun nasa delikadong kamugtakan an relasyon nin mag-agom (kapitulo 13), kun ano an puedeng gibohon tangani na matawan nin onra an gurang nang mga magurang (kapitulo 15), asin kun paano seseguradohon an daing sagkod na ngapit para sa pamilya nin saro (kapitulo 16).
5 Gamiton nin Lubos an Bagong Libro: Kun dai pa nindo nagigibo iyan, taano ta dai iribang pag-adalan bilang pamilya an librong Kaogmahan nin Pamilya? Siring man, kun napapaatubang an saindong pamilya sa bagong mga problema o angat, repasohon an mga kapitulo sa libro na nagpapaliwanag kan mga ini, asin mapagngayongayong horophoropon kun paano iaaplikar an sadol. Dagdag pa, ngonyan na Marso, mag-iskedyul nin mas dakol na panahon sa ministeryo sa langtad tangani na ikapasakamot An Sekreto sa Kaogmahan nin Pamilya sa pinakadakol na tawong mapupuede.
6 An mga pamilyang naggigibo nin diosnon na debosyon mapakokosog sa espirituwal asin magkakasararo patin magigin andam na marhay na makapanggana sa mga pananalakay ni Satanas. (1 Tim. 4:7, 8; 1 Ped. 5:8, 9) Kanigoan an pasasalamat niato na igwa kita kan instruksion nin Dios gikan sa Kagtugdas kan pamilya!