Hapot

◼ Anong mga pagmamaan an kaipuhan kun kita nakikiiba sa mga bakong kasekso sa satong ministeryo?

Igwa kitang dahelan na maglaom na an satong mga tugang na lalaki asin babae may tendensiang kuyogon an pinakahalangkaw na pamantayan sa moral sa saindang personal na paggawe. Minsan siring, nabubuhay kita sa sarong maating kinaban na kadikit an limitasyon sa moral. Mantang puedeng may pinakamarahay kitang mga intension, dapat kitang danay na magmaan tangani na malikayan an pagcausa nin katuyawan o pakikilabot sa sarong bagay na bakong angay. Kabale digdi an pagigin maingat mientras na nakikikabtang sa ministeryo.

Sa paglilingkod sa langtad parate kitang nakatutupar nin mga tawo na bakong kasekso na nagpapaheling nin garo baga sinserong interes sa katotoohan. Kun kita solong nagsosongko asin mayo na nin iba sa harong, parateng pinakamarahay na magpatotoo sa pinto imbes na lumaog. Kun may interes, puedeng makipag-areglo na madalaw liwat sa panahon na maiibanan kita nin saro pang parahayag o kun an ibang miembro kan pamilya presente man. Kun bako ining posible, madonong na ipasongko sa sarong parahayag na kasekso kan kagharong. Aplikado man ini sa pagkondukta nin mga pag-adal sa Biblia sa saro na bakong kasekso.​—Mat. 10:16.

Kaipuhan kitang magin maingat kun nagpipili nin saro na makakaiba sa ministeryo. Minsan ngani an mga parahayag na bakong magkasekso puedeng magkaibang maghulit sa panapanahon, pinakamarahay na gibohon ini kun kaiba nin sarong grupo. Sa parate, dawa mantang nasa ministeryo, bakong madonong na kita magparapakiiba nin solo sa saro na bakong kasekso na bako niatong agom. Huli kaini, an tugang na nangengenot sa grupong maglilingkod maninigong gumamit nin marahay na paghusgar kun pinagpapadispadis an mga parahayag, kabale an mga tin-edyer.

Paagi sa perming paggamit nin marahay na paghusgar, malilikayan niato na ‘magbugtak nin masisingkogan’ magsalang sa sato mismo o sa iba.​—2 Cor. 6:3.