HAPOT KAN MGA HOBEN
Mag-amigo Lang o Labi Pa Diyan?—Kabtang 2: Anong mga Senyales an Itinatao Ko?
Gusto mo na yaon ka para sa amigo mo pag kaipuhan niya nin kaulay. Asin kaining mga nakaagi, may saro kang amigo na parati mong kinakaulay. Pero an problema, bako mo siyang kasekso. ‘Mag-amigo sana kami,’ an sabi mo sa sadiri mo, na hinuhuna na arog man kaiyan an namamati niya. May dapat ka daw na ikahadit?
Kun ano an puwedeng mangyari
Mayo man maraot sa pagkaigwa nin mga amigong bako mong kasekso. Pero paano kun nagigin mas espesyal na an pakikiamigo mo sa saro kumpara sa iba? Kun arog kaiyan, tibaad maisip niya na labi pa sa pakikiamigo an gusto mo.
Iyan daw talaga an buot mong maisip niya? Pag-isipan an nagkapirang paagi na puwede iyan na mangyari, dawa dai mo man tinutuyo.
Tinatawan mo an saro nin labi-labing atensiyon.
“Maski ngani dai mo makokontrol an namamati kan iba, dai mo na dapat gatungan pa an kalayo sa pagsabing mag-amigo lang kamo, pero pirmi ka man nag-aapod saka nakikipag-ulay sa saiya.”—Sierra.
Ini-entertain mo an atensiyon niya.
“Bako man ako an nagpuon na makipag-text, pero pirmi akong nagsisimbag sa dakulon na message kan sarong babayi. Pagkatapos kaiyan, nagin dipisil na sa sako na ipaliwanag sa saiya na amigo lang an hiling ko saiya.”—Richard.
Kinukua mo an atensiyon niya.
“Para sa iba, kawat lang an pakikipag-flirt. Kinakawatan ninda an emosyon kan iba asin dai sinda seryosong makipagrelasyon. Dakul na beses ko nang nahiling na nangyari iyan, asin pirming may saro na nakukulgan.”—Tamara.
An punto: An regular na pakikikomunikar asin pagtao nin atensiyon nagtatao nin senyales na gusto mo an sarong tawo.
Kun taano ta mahalaga iyan
May nakukulgan.
An sinasabi kan Bibliya: “An inaantisipar na naaatraso nagpapasakit sa puso.” (Talinhaga 13:12) Kun may saro na sigeng tao saimo nin mga senyales na gusto ka niya, ano kaya an aasahan mo?
“Pag pinapaasa mo an saro, garo ka man sana nakabanwit nin sira pero dai mo man iyan binubutasan o kinukua. Puwede man iyan mangyari sa sarong relasyon. Kun dai ka interesadong makipag-ilusyunan pero padagos mong pinapaasa an saro, makukulgan mo siyang marhay.”—Jessica.
Mararaot an reputasyon mo.
An sinasabi kan Bibliya: “[Tawan] nindo nin atensiyon bako sana an sadiri nindong kapakanan, kundi an kapakanan man kan iba.” (Filipos 2:4) Ano an paghiling mo sa saro na sadiri sana an iniisip? Ano an puwedeng magin epekto kaiyan sa reputasyon niya?
“Para sako, makanos an lalaking nakikipag-flirt sa mga babayi. Kun arog na siya kaiyan ngunyan, posibleng marhay na pag may agom na siya dai siya digdi magigin maimbod. Ginagamit lang niya an iba para kumusog an kumpiyansa niya sa sadiri, asin makasadiri iyan.”—Julia.
An punto: An mga tawong nagtatao nin mga senyales na gusto niya an saro pero mayo man nin intensiyon na makipag-ilusyunan kinukulgan an iba asin an sadiri niya.
Kun ano an puwede mong gibuhon
Sinasabi kan Bibliya na trataron an “mga mas hoben na lalaki na garo . . . tugang mong lalaki” asin an “mga mas hoben na babayi na garo . . . tugang mong babayi, na tinatrato an mga ini na may lubos na respeto.” (1 Timoteo 5:1, 2) Kun susunudon mo an pamantayan na iyan, maiingatan mo an pakikiamigo mo sa mga bako mong kasekso.
“Kun may agom na ako, dai ako makikipag-flirt sa agom kan iba. Marahay na sanayon ko na an sadiri ko ngunyan, mantang mayo pa akong agom, na magin balanse sa pakikiiba-iba sa bako kong kasekso.”—Leah.
Sinasabi kan Bibliya: “Pag kadakul kan pigtataram, dai makakalikay sa paglapas.” (Talinhaga 10:19) An prinsipyong iyan aplikado bako lang sa personal na pakikipag-ulay kundi pati man sa pag-text—kaiba na kun gurano kaparati kan saindong pag-uulay asin kun ano an pinag-uulayan nindo.
“Dai man talaga kaipuhan na i-text an sarong babayi aroaldaw, apuwera na sana kun may plano kang ilusyunan siya.”—Brian.
Sinasabi kan Bibliya: “An kadunungan na gikan sa itaas inot sa gabos dalisay.” (Santiago 3:17) An pagkugos puwedeng mayo man nin malisya—o puwedeng magin senyales na may gusto ka sa saiya.
“Pag nakikipag-ulay ako, hinihinguwa kong magin mainamigo pero may distansiya.”—Maria.
An punto: Maingat na pag-isipan an paggawi mo sa mga bako mong kasekso. “Bibihira lang makakua nin marahay na mga amigo,” an sabi kan tin-edyer na an pangaran Jennifer, “kaya dai mo gugustuhon na maapektaran an pagigin mag-amigo nindo paagi sa pagtao nin bakong malinaw na mga senyales.”
Mga tips
Tawan nin atensiyon an sinasabi kan iba. Kun may naghahapot, “Kamo na ni . . . ?” posibleng indikasyon iyan na sobra na kamo kadayupot.
Trataron nin pantay-pantay an mga amigo mong bako mong kasekso. Dai trataron nin mas espesyal an saro kisa sa iba.
Magin maingat sa pakikipag-text—kaiba na kun gurano ka kaparating nagte-text, kun ano an itine-text mo, asin kun anong oras ka nagte-text. “Dai mo kaipuhan na i-text nin matangang banggi an bako mong kasekso,” an sabi kan hoben na si Alyssa.