HAPOT KAN MGA HOBEN
Mag-amigo Lang o Labi Pa Diyan?—Kabtang 1: Anong mga Senyales an Nareresibi Ko?
Gustong-gusto mo talaga an tawong ini na bako mong kasekso, asin sigurado ka na gusto ka man niya. Pirmi kaya kamong magka-text, kamo an pirming magkaibanan pag may mga pagturutiripon . . . , saka an nagkapira sa mga message niya saimo nagpaparisa na talagang may gusto siya saimo.
Kaya nagdesisyon kang haputon siya kun pasain an relasyon nindo, para lang masiguradong pareho kamo nin namamatian. An simbag niya? “Amigo lang an hiling ko saimo—iyan lang talaga.”
Kun ano an pagmati
“Angguton ako—sa saiya saka sa sadiri ko! Aroaldaw kaming magka-text saka ipinahiling niyang interesado talaga siya sako. Natural, nagkagusto man ako saiya.”—Jasmine.
“Pareho kaming nagtsatsaperon sa sarong magkailusyon. May mga beses na garo na man sana kami nagdo-double date. Nagpaparaistoryahan kami, dangan nagpuon na kaming magparatext sa kada saro. Dai ko maako kan sabihon niyang amigo lang an hiling niya sako saka kan maaraman kong nakikipag-date palan siya sa iba.”—Richard.
“Aroaldaw akong tine-text nin sarong lalaki, asin kun minsan pareho kaming ‘nagpi-flirt’ sa kada saro. Pero kan sabihon ko an namamatian ko saiya, nagngirit siya tapos nagsabi, ‘Habo ko pa ngunyan na makipag-date sa siisay man!’ Haluyon ko idtong pighibian.”—Tamara.
An punto: Pag paghuna mo pareho kamong may gusto sa kada saro tapos naaraman mong ika man lang palan an may gusto, natural sanang maanggot ka, mapasupog, asin mamati pa nganing trinaydor ka. “Marauton sa pagmati, saka nakulgan talaga ako kan mangyari idto,” an sabi kan hoben na lalaking si Steven. “Haloy man bago ako nagtiwala giraray sa iba.”
Kun taano ta nangyayari iyan
Dahil sa pakikipag-text asin social media, nagigin madalion sanang mahulog an buot mo sa saro na mayo man talagang romantikong interes sa saimo. Hilingon an sinasabi kan nagkapirang hoben.
“Puwedeng pigte-text ka niya para lang magpalipas nin oras, pero tibaad para saimo senyales na iyan na interesado siya saimo. Tapos kun aroaldaw ka niyang pigte-text, ’baad hunaon mo nang espesyal ka talaga saiya.”—Jennifer.
“Su saro tibaad gusto talagang magpuon nin romantikong relasyon, pero su saro man, tibaad gusto lang palan na may kaulay para kumusog an kumpiyansa niya sa sadiri.”—James.
“An simpleng text na ‘good night’ puwedeng mainterpretar na may romantikong kahulugan, pero mayo man palan nin ibang buot sabihon su nag-text kaidto.”—Hailey.
“An smiley face na ipinadara mo puwedeng mayo man nin ibang kahulugan o puwede man na para makipag-flirt an katuyuhan kaiyan. Kun minsan, iniisip na tulos kan pinadarahan mo na nakikipag-flirt ka.”—Alicia.
An punto: Dai tulos pag-isipon na an ipinapahiling saimong atensiyon senyales na gusto niya nin romantikong relasyon.
Mas madali daw sabihon kisa gibuhon? Iyo! Sinasabi kan Bibliya: “An puso urog na mapandaya kisa sa ano pa man na bagay asin desperado.” (Jeremias 17:9) Puwede kang dayaon kaiyan na hunaon na pareho kamong may gusto sa kada saro pero idto palan imahinasyon mo man lang ’yan.
Kun ano an puwede mong gibuhon
Dai magpadara sa emosyon. Magpundo nguna asin isip-isipon kun ano an igwa kamo. Haputon an sadiri, ‘May masarig na mga dahilan daw ako na isipon na espesyal an pagtratar niya sa sako kumpara sa iba?’ Dai tugutan na daugon kan saimong emosyon an saimong “kakayahan sa pangangatanusan.”—Roma 12:1.
Sabuton na marhay an sitwasyon. Sa gabos na senyales na nagtatao saimo nin dahilan na isipon na bako lang kamong mag-amigo, lalo nang tawan nin atensiyon an mga senyales na nagtatao saimo nin pagduda. Dai tulos pag-isipon na miling may gusto ka sa saro, arog na man kaiyan an pagmati niya saimo.
Magin mapasensiya. Sagkod na dai niya direktang sinasabi saimo na gusto ka niya asin mawot niyang mas mamidbid ka pang marhay, dai gayong maglaom ta ’baad makulgan ka lang.
Magin onesto. Sinasabi kan Bibliya na may “panahon na magtaram.” (Eclesiastes 3:7) Kun gusto mong maaraman kun labi pa sa sarong amigo an paghiling niya saimo, kaulayon mo siya. “Kun bako kamong pareho nin namamatian,” an sabi kan hoben na si Valerie, “mas marahay na makulgan ka na ngunyan kisa pahaluyon mo pa iyan tapos saka mo lang marerealisar na dai ka man palan talaga niya gusto.”
An punto: “Ingatan mo an saimong puso,” an sabi kan Talinhaga 4:23. Kun nagkakagusto ka sa saro, aramon mo kun arog man kaiyan an pagmati niya saimo. Kun papabayaan mong mahulog an buot mo na dai na inaaram kun may gusto man siya saimo, garo mo man sana pinipirit na patubuon an sarong tinanom sa sarong matagas na gapo.
Kun madiskubre mong may gusto talaga siya saimo—asin kun nasa edad ka na man saka andam nang makipag-date—nasa saimo na kun gusto mong punan na magkaigwa nin romantikong relasyon sa saiya. Tandaan, an sarong masarig na pag-aguman kompuwesto nin agom na lalaki saka agom na babaying pareho nin mga goal sa espirituwal asin na prangka saka onesto sa kada saro. (1 Corinto 7:39) Sa katunayan, siguradong nagpuon sinda bilang marahay na mag-amigo, asin nagpapadagos na arog kaiyan.—Talinhaga 5:18.