HAPOT KAN MGA HOBEN
Maraot Daw an Pakikipag-flirt?
Ano an pakikipag-flirt?
Para sa iba, an pakikipag-flirt iyo an pagpamati, paagi sa mga tataramon o mga hiro-hiro, na may gusto an saro sa bako niyang kasekso. Sala daw na ipahiling na may gusto ka sa sarong tawo? Dai man. “Kun puwede ka nang makipag-date saka may nagugustuhan ka na,” sabi kan sarong hoben na si Ann, “paano mo maaaraman kun may gusto man siya saimo?”
Pero sa artikulong ini, pag-uulayan ta an klase nin pakikipag-flirt na diyan ipinapahiling kan saro na may gusto siya sa sarong tawo pero dai man talaga siya seryoso.
“Okey lang na magpahiling nin espesyal na atensiyon sa saro kun may gusto ka man talaga saiya. Pero ibang urulay na kun papaasahon mo siya na may gusto ka saiya pero an totoo, dai ka man talaga seryoso.”—Deanna.
Taano ta ginigibo iyan kan iba?
Nakikipag-flirt an iba para lang madadagdagan an kumpiyansa ninda sa sadiri. “Pag nahihiling mong nakukua mo an atensiyon kan iba pag nakikipag-flirt ka, pirmi mo na iyan gigibuhon,” an sabi kan hoben na si Hailey.
Pero kun padagos mong ipinapamati sa saro na may gusto ka saiya pero mayo man talaga, ipinapahiling mo na mayo kang pakiaram sa namamati niya. Ipinapahiling man kaiyan kun anong klaseng tawo ka. Sinasabi kan Bibliya: “An kamangmangan kaugmahan para sa saro na mayo nin marahay na pagmansay.”—Talinhaga 15:21.
Iyan an dahilan kaya sinabi ni Hailey, “Sa inot, garo okey lang na makipag-flirt, pero pirming bakong marahay an resulta kaiyan.”
Ano an mga peligro?
Kun makikipag-flirt ka, mararaot kaiyan an reputasyon mo.
“An tawong nakikipag-flirt insecure saka immature. Aram mo na bako man totoo an ipinapahiling niya ta may gusto lang siyang makua saimo.”—Jeremy.
Sinasabi kan Bibliya: “An pagkamuot . . . dai nag-iisip kan sadiri sanang kapakanan.”—1 Corinto 13:4, 5.
Pag-isipan: Sa mga sinasabi saka ginigibo mo, arin diyan an matao saimo nin impresyon na flirt ka?
Kun makikipag-flirt ka, makukulgan mo an tawong pinapaasa mo.
“Pag may saro na garo nakikipag-flirt sako, dai ko lamang siya kakaulayon. Pagmati ko kaya nakikipag-ulay lang siya sako ta babayi ako. Mayo man talaga sindang pakiaram sako; gusto lang nindang madagdagan an tiwala ninda sa sadiri.”—Jaqueline.
Sinasabi kan Bibliya: “Padagos na hanapon kan lambang saro, bako an para sa sadiri niyang kapakinabangan, kundi an para sa ibang tawo.”—1 Corinto 10:24.
Pag-isipan: Pinaasa ka na daw kan iba na may gusto siya saimo pero mayo man palan? Kun iyo, ano an namati mo? Ano an magigibo mo para dai ka makakulog nin iba sa arog kaiyan na paagi?
Kun makikipag-flirt ka, masasakitan kang makahanap nin tunay na mamumuot saimo.
“Dai ako mapakasal o makikipag-date sa sarong tawong flirt. Paano ko mabibisto o pagtitiwalaan an saro kun dai man siya seryoso, na pigloloko lang ako?”—Olivia.
Sa Bibliya, an salmistang si David nagsabi: “Linilikayan ko idtong mga itinatago kun ano talaga sinda.”—Salmo 26:4.
Pag-isipan: Anong klase nin tawo an magkakagusto sa sarong flirt? Iyan daw an klase nin tawo na gusto mong magkagusto saimo?