An mga Pagtiripon Nakadadagka sa Marahay na mga Gibo
1 An duwang mahalagang marhay na kabtang kan satong pagsamba iyo an pag-atender sa mga pagtiripon kan kongregasyon asin pakikikabtang sa paglilingkod sa langtad. Magkadungan an duwang iyan. An saro nakaiimpluwensia sa saro. An Kristianong mga pagtiripon nakadadagka sa marahay na mga gibo, na an pinakamarahay dian iyo an paghuhulit kan Kahadean asin paggibo nin mga disipulo. (Heb. 10:24) Kun maontok kita sa pag-atender sa mga pagtiripon, dai mahahaloy tibaad umontok na man kita sa paghuhulit huli ta dai kita nadadagka na gibohon iyan.
2 Sa semanal na mga pagtiripon, nag-aako kita nin espirituwal na pagtotokdo na dinisenyo sa pagmotibar sa sato na maghulit. An pagkaapurado kan mga panahon daing ontok na idinodoon, na pinahihiro kitang darahon sa iba an nagtataong-buhay na mensahe kan Biblia. Ineenkaminar asin pinakokosog kita na magdanay sa paghuhulit. (Mat. 24:13, 14) Paagi sa pag-aprobetsar sa mga oportunidad na magkomento sa mga pagtiripon, nagigin mas tuod kitang ipahayag sa iba an satong pagtubod. (Heb. 10:23) Paagi sa pagpalista sa Teokratikong Paadalan sa Pagmiministro, nag-aako kita nin pagsasanay na magin mas epektibong mga ministro asin paoswagon an satong mga abilidad sa pagtotokdo.—2 Tim. 4:2.
3 Kun Paano an mga Pagtiripon sa Paglilingkod Nakadadagka sa Sato na Maghulit: Kita gabos ineenkaminar na siyasaton nin patienot an materyal sa An Satong Ministeryo sa Kahadean. Dangan an impormasyon na ini ikinatatadom sa isip niato mantang nag-aatender kita sa Pagtiripon sa Paglilingkod asin naheheling an mga pag-atubang na idinedemonstrar sa plataporma. Kun naglilingkod sa langtad, puede niatong girumdomon An Satong Ministeryo sa Kahadean, girumdomon an mga pag-atubang na idinemostrar, asin paagi kaiyan magtao nin mas epektibong patotoo. Ini an naeksperyensiahan nin dakol na parahayag.
4 Bilang kasunod kan mga Pagtiripon sa Paglilingkod, an nagkapira nakikipag-olay sa iba na mag-ibanan sa ministeryo. An mga parahayag may mga punto sa langtad na presko pa sa isip asin napahihirong probaran iyan huli ta an mga pagtiripon na ini nakaparigon sa boot ninda na makikabtang sa paghuhulit kada semana.
5 Mayo nin kasalida an satong Kristianong mga pagtiripon, kun saen kita nakikipagtipon sa mga kapwa parasamba asin nadadagka sa marahay na mga gibo. Tanganing umoswag an satong ministeryo, dapat kitang regular na umatender sa mga pagtiripon kan kongregasyon. Ipaheling logod niato an pagpahalaga sa marahayon na probisyon na ini gikan ki Jehova paagi sa ‘dai pagpabaya kan satong pagtorotiripon.’—Heb. 10:25.