An mga Gurang Naghuhulit na Dai nin Ontok
1 Mantang naggugurang an mga tawo, dakol sa sainda an naglalaom na magretiro sa saindang regular na sekular na trabaho asin magparelaksrelaks sa buhay durante kan saindang natatadang mga taon. Tibaad nakamamate sinda na sinda nagtrabaho nang marhay asin ngonyan maninigo nang magpahingalo. O tibaad boot sana nindang mag-ogma sa natatadang mga taon kan saindang buhay.—Luc. 12:19.
2 Bilang nagdusay na mga lingkod ni Jehova, laen an satong pagmansay sa buhay. Aram niatong mayong pagretiro sa paglilingkod sa Dios. An satong pagmansay positibo huli ta padagos niatong ‘isinasaisip an buhay na daing katapusan.’ (Jud. 21) An mga taon nin natipon na kaaraman asin eksperyensia puedeng paoswagon an pakamansay nin saro. Puede kaining papangyarihon an saro na magin mas madonong asin mas balanse patin magpaheling nin mas hararom na pagpapahalaga sa buhay. An gabos na atributong ini napakikinabangan nin dakula nin sarong ministro kan maogmang bareta.
3 An paggurang bako sanang pag-edad sa pisikal; kalabot man dian an mental na aktitud nin saro. Kun linalaoman nindong mabuhay nin halawig na panahon asin hinihingoa nindong magdanay na hoben an saindong pagmansay, puedeng madugangan an oportunidad nindo na parehong magibo iyan. An mga gurang puedeng paoswagon an kualidad kan saindang buhay paagi sa pagdugang sa saindang espirituwal na kaaraman asin paghiras kaiyan sa iba.—1 Cor. 9:23.
4 Tunay na Buhay na mga Halimbawa: Sa edad na 86, nagsabi an sarong tugang na babae: “Kun hinohorophorop ko an nakaaging 60 taon poon kan manodan ko an katotoohan, an nakaparirigon na panuga nin Dios nagsusulwak sa sakong puso. Iyo, si Jehova na mahiro na may kaimbodan sa mga maimbod pinaaani kita nin abundang kagayagayahan.” (Sal. 18:25) Nagirumdoman nin sarong gurang na tugang na lalaki kun paano an pagkagadan kan saiyang agom nagin grabe kanakakukubhan para sa saiya, na pakalihis kaiyan luminuyang marhay an saiyang salud. Sia nagsabi: “Alagad, paagi sa dai na kutana maninigong kabootan ni Jehova, naulian akong marhay tanganing makalaog sa paglilingkod bilang payunir pakalihis nin duwang taon. Nagpapasalamat akong marhay ki Jehova na talagang ruminahay an sakong salud huli sa dugang na aktibidad na ini sa paghuhulit!”
5 Kanigoan kaomaw-omaw na kadakol na gurang an determinadong magpadagos sa paghuhulit sagkod na itinotogot kan saindang salud asin kosog—na dai nin ontok! May marahay sindang rason na kumagsing: “O Dios, tinokdoan mo ako magpoon sa sakong pagkaniaki, asin sagkod ngonyan ipinahahayag ko an saimong makangangalas na mga gibo.”—Sal. 71:17.