Sarong Pagdalaw na Puedeng Magin Bendisyon
1 May paggayagayang inako ni Zaqueo si Jesus bilang bisita sa saiyang harong. Asin nagin bendisyon nanggad an pagdalaw na idto!—Luc. 19:2-9.
2 Ngonyan, bilang Payo kan kongregasyon, pinagbobotan ni Jesu-Cristo an kamagurangan na “pastoran an aripompon nin Dios.” (1 Ped. 5:2, 3; Juan 21:15-17) Dugang pa sa pagtotokdo sa mga pagtiripon asin pangengenot sa paglilingkod sa langtad, an mga paraataman sa kongregasyon nagtatao nin mamomoton, personal na tabang sa indibiduwal na mga miembro kan kongregasyon. Kun siring, sa panapanahon puede nindong laoman na mag-aako kamo nin personal na atension gikan sa kamagurangan, magsalang sa saindong harong, sa Kingdom Hall, mantang magkaibanan sa paglilingkod sa langtad, o sa iba pang mga okasyon. Maninigo daw nindong ikatakot an mga pagdalaw kan kamagurangan? Dai nanggad. An saindang pagsongko sa saindo dai nangangahulogan na minsan paano may pagkukulang kamo. Kun siring, ano an katuyohan nin pagdalaw sa mga tugang?
3 Nagsabi si Pablo na boot niang dalawon an mga tugang “tanganing helingon kun ano an saindang kamugtakan.” (Gibo 15:36) Iyo, bilang mamomoton na mga pastor, an kamagurangan interesadong marhay sa kun ano an saindong kamugtakan. Boot nindang magtao nin espirituwal na tabang na puedeng makatabang asin makaparigon sa saindo. An personal na pangangataman na iyan an minamawot kan satong mamomoton na Pastor na si Jehova na mapasa kada saro sa sato.—Ezeq. 34:11.
4 Akoon an mga Pagdalaw kan Kamagurangan: An pasohan ni Pablo sa pagdalaw sa saiyang mga tugang iyo na ‘magwaras sa sainda nin espirituwal na balaog tanganing sinda maparigon, asin tanganing magkaigwa nin pagriribayan nin pagparigon sa boot.’ (Roma 1:11, 12) Kita gabos nangangaipo nin espirituwal na pagparigon sa boot sa masakit na huring mga aldaw na ini, asin nangangaipo kita nin tabang tangani na makapadagos na marigon sa pagtubod. An saindong positibong reaksion sa pagdalaw kan kamagurangan mayong duwa-duwa na maresulta sa marahay na pagriribayan nin pagparigon sa boot.
5 Pahalagahan an dakol na pakinabang na makukua gikan sa pagdalaw kan kamagurangan sa mga tugang. Kun igwa nin sarong bagay o hapot na ikinahahadit nindo, girumdomon na yaon an kamagurangan sa kongregasyon tangani na tumabang. Dai mag-alangan na ipakipag-olay sa sainda an ano man na puedeng nakaaapektar sa saindong espirituwal na ikararahay. Apresyaron an mamomoton na areglong ini ni Jehova, asin maggayagaya sa mga bendisyon na puedeng itao kan pagdalaw na iyan.