Mga Paraataman na Nangengenot—An Paraataman sa Paglilingkod
1 An paraataman sa paglilingkod interesadong marhay sa gabos na bagay na konektado sa pag-oswag kan gibohon na pag-ebanghelyo sa iinasignar na teritoryo kan kongregasyon. Sa siring sia igwa nin mahalagang marhay na kabtang sa pagtabang sa sato na maotob an satong paninimbagan na ihulit an maogmang bareta. Bilang maigot na paraebanghelyo, sia an nangengenot sa pag-organisar kan gabos na bagay na konektado sa paglilingkod. Bilang may kakayahan na paratokdo, tinatabangan nia an indibiduwal na mga parahayag na mapaoswag an saindang pagigin epektibo sa ministeryo.—Efe. 4:11, 12.
2 An magurang na ini sa kongregasyon an direktang nagdidirehir kan gibohon kan ministeryal na mga lingkod na iinasignar sa pag-asikaso nin literatura, mga magasin, asin teritoryo. Sia an may paninimbagan na siertohon na may bastanteng suplay nin literatura, mga magasin, asin porma sa paglilingkod kada bulan na magagamit niato.
3 Paninimbagan kan paraataman sa paglilingkod na direhiran an manlaenlaen na kabtang nin paghuhulit, kabale an pagpapatotoo sa lugar nin negosyo, tinampo, asin telepono. Alisto sia sa pag-organisar nin praktikal na mga areglo na magtiripon bago lumuwas sa paglilingkod sa bilog na semana, kabale an mga piesta opisyal. Nagpapaheling sia nin tunay na interes sa aktibidad na mga pag-adal sa Biblia. Naghahanap sia nin mga paagi na makapagtao nin espirituwal na tabang sa mga nagigin iregular o inaktibo sa ministeryo. Interesado siang marhay sa gibohon kan mga payunir, asin sia an nagdidirehir kan programang An mga Payunir Nagtatabang sa Iba.
4 Bilang miembro kan Komite sa Paglilingkod kan Kongregasyon, an paraataman sa paglilingkod an nagpoproponer nin ano man na kinakaipuhan na mga pagliliwat sa mga grupo nin Pag-adal sa Libro kan Kongregasyon. Kun nagdadalaw sia sa saindong grupo, siertohon na umatender asin umiba sa saiya sa paglilingkod sa langtad.
5 An gabos sa kongregasyon maninigong gikan sa boot na makikooperar sa paggiya na itinatao kan paraataman sa paglilingkod. Tatabangan kita kaini na mapaoswag an satong pagigin epektibo sa paggibo nin mga disipulo asin makanompong nin orog na kagayagayahan sa satong ministeryo.