Pagpoon nin mga Pag-adal sa Brosyur na Kahagadan
1 Ipinaheheling nin mga bareta hale sa bilog na kinaban na an brosyur na Ano an Kahagadan sa Sato nin Dios? sarong mapuersang kasangkapan sa pagtokdo sa mga tawo kan katotoohan. Rinibong pag-adal sa Biblia an napoponan kada semana sa brosyur na ini. Nagin mapanggana na daw kamo sa pagpoon asin pagkondukta nin pag-adal sa Biblia sa brosyur na Kahagadan?
2 Mantang an kadaklan napapasilan na ipasakamot an brosyur, an nagkapira nadedepisilan na maaraman kun ano an sasabihon tangani na maponan an pag-adal. Anong mga pamamaagi an nanompongan nin iba na epektibo sa pagpoon nin mga pag-adal sa Biblia na ginagamit an brosyur na Kahagadan? An minasunod na mga suhestion posibleng makatabang.
3 Alokon na Idemonstrar an Pag-adal: Kun ginigibo an enot na pagsongko o pagdalaw liwat, imbes na ialok sana sa kagharong an pag-adal sa Biblia, puede niatong idemonstrar kun paano kokonduktahan an kurso nin pag-adal sa Biblia. Hahaleon kaini an misteryo asin kasunod na kahaditan na ikinokonektar nin dakol na kagharong sa terminong “pag-adal.” Oras na manodan niatong idemonstrar iyan, manonompongan niato na paagi sa sarong simpleng introduksion, mapoponan tolos niato an pag-adal.
4 Pag-andam an Liabe: An satong entusiasmo sa pagpoon nin mga pag-adal sa Biblia direktang konektado sa kun gurano kita karahay na nag-andam. An patienot na pag-andam makatatabang sa sato na daogon an ano man na pag-alangan niato na makikabtang sa gibohon na pag-adal sa Biblia. Paagi sa pag-ensayo kan satong pag-atubang nin nagkapirang beses, kita magigin orog na garo nakikipag-olay, na ikinapahahayag an satong sadiri sa natural na paagi asin sa satong sadiring mga tataramon. Bako sanang tatabangan kita kaini na makarelaks kundi siring man gigibohon na pamugtak an boot kan kagharong.
5 Kun nag-eensayo, nakatatabang na orasan an saindong pag-atubang tangani na maimpormaran nindo an kagharong kun gurano kalawig na idedemonstrar an pag-adal. Pakapamidbid nia, an sarong tugang na lalaki nagsabi: “Naghapit ako tangani na ipaheling sa saindo an samong daing bayad na programa nin pag-adal sa Biblia. Kaipuhan nin mga limang minuto an pagdemonstrar kaiyan. Puede daw kamo sa limang minuto?” An Leksion 1 kan brosyur na Kahagadan puedeng ikademonstrar sa laog nin mga limang minuto. Siempre, an pinili sanang mga teksto an puedeng basahon sa oras na ini, alagad paagi sa pagtapos kan enot na leksion sa laog nin nagkapirang minuto, naeeksperyensiahan kan kagharong an enot niang pag-adal. Dangan ipaaram sa saiya na sa pagbalik nindo tangani na pag-adalan an Leksion 2, magkakaipo sana kamo nin 15 minutos.
6 An minasunod na pag-atubang nagin epektibo:
◼ “Boot kong idemonstrar sa saindo an simpleng marhay, pero marikas, na kurso nin pag-adal sa Biblia sa harong na ginagamit an brosyur na ini na Ano an Kahagadan sa Sato nin Dios? Nanompongan nin dakol na sa laog sana nin 15 minutos kada semana sa laog nin 16 na semana, makukua ninda an nakakokontentong Makakasuratan na simbag sa importanteng mga hapot na ini sa Biblia.” Ipaheling sa halipot an lista nin mga laog. Binubuksan an Leksion 1, magsabi: “Kun matatawan nindo kami nin mga limang minuto, gusto niamong ipaheling sa saindo kun paano ini ginigibo. An Leksion 1 may temang ‘Kun Paano Nindo Maaaraman Kun Ano an Kahagadan nin Dios.’” Dangan basahon an tolong hapot, asin ipaliwanag an mga numero na nasa parentesis. Basahon an parapo 1, asin ipaheling sa kagharong kun paano hahanapon an simbag. Puedeng ipabasa sa kagharong an parapo 2. Dangan magsabi: “Basado sa impormasyon na ini, ano an isisimbag nindo sa hapot na ini? [Basahon giraray an hapot, asin pakomentohon an kagharong.] Maririparo nindo na may mga teksto na kaiba sa kada parapo. Dinadara kaini an satong atension sa simbag kan Biblia sa mga hapot na ini. Halimbawa, basahon niato an 2 Timoteo 3:16, 17 asin helingon kun iyan minasuportar sa simbag na itinao nindo may labot sa autor kan Biblia.” Pakatapos na basahon an parapo 3, na kinokonsiderar an hapot, asin binabasa an Juan 17:3, darahon an atension kan kagharong sa kaaraman na nakua nia paagi sa pagrepaso sa Leksion 1. Sa puntong ini puede kamong dumuman sa Leksion 2 asin basahon an huring hapot, “Ano an duwang paagi na kita puedeng makanood manongod sa Dios?” Dangan ihapot: “Noarin kamo magkakaigwa nin mga 15 minutos tangani na mapag-adalan niato an Leksion 2 asin makua an simbag?”
7 Mahalaga na papagdanayon na simple an pag-orolay asin komendaran an kagharong kun mapupuede. Kun iinaareglo an masunod na pagdalaw, imbes na hapoton kun baga gusto niang magpadagos, enkaminaron sana sia na sunodon an iyo man sanang paagi para sa masunod na leksion. Ipaaram sa saiya na inaantisipar nindo na bumalik. An nagkapirang parahayag nag-alok na pag-adalan an leksion paagi sa telepono kun nagin depisil na an pag-iskedyul. Puede man nindong enkaminaron an inaadalan na ibugtak an brosyur sa sarong ligtas, kombenyenteng lugar tangani na madali iyan na makua para sa saindong masunod na pagdalaw.
8 Magin Determinado: Mantang an liabe sa kapangganahan iyo an pag-andam, dapat na magin determinado kitang ipadagos iyan. An pagtokdo nin sarong leksion sa laog nin pirang minuto puedeng magin angat, kaya magin determinado na ensayohon an pag-atubang sagkod sa pinakadakol na beses na kaipuhan tangani na magin marikas asin dirediretso an pagtaram kun idinedemonstrar an pag-adal. Hingoahon na idemonstrar an pag-adal sa gabos na nanonompongan nindo sa pinto, sa impormal na paagi, asin sa pagpapatotoo paagi sa telepono. Kun kamo nadedepisilan na makapoon nin pag-adal sa Biblia, dai madesganar. An kapangganahan sa pagpoon nin mga pag-adal sa Biblia nagkakaipo nin determinasyon asin sinserong pagmawot na ikatao an katotoohan sa iba.—Gal. 6:9.
9 Paagi sa pag-aplikar kan mga suhestion na ini, kamo man puedeng magkapribilehio na tumabang sa saro sa dalan pasiring sa buhay, paagi sa pagpoon asin pagkondukta nin pag-adal sa Biblia sa brosyur na Kahagadan.—Mat. 7:14.