Ginagamit daw Nindo an Brosyur na Kahagadan sa Pagpoon nin mga Pag-adal?
1 Aram daw nindo na kun regular asin sistematiko nindong ipinakikipag-olay sa sarong interesado an manongod sa Biblia, minsan ngani halipot, asin napag-oolayan an materyales sa saro sa irinekomendar na mga publikasyon, kamo namamayo na nin pag-adal sa Biblia? Iyo, totoo ini dawa kun an pag-adal ginigibo sa pinto o paagi sa telepono. Taano ta dai gumibo nin espesyal na paghihingoa ngonyan na Mayo asin sa Hunyo na makapoon nin siring na pag-adal na ginagamit an brosyur na Kahagadan?
2 Mag-andam Tanganing Magin Mapanggana: Kun nag-aalok kan brosyur na Kahagadan, malinaw na isaisip kun ano an boot nindong ipakipag-olay. Kun kamo nagdadalaw liwat, girumdomon an napag-olayan nindo kan enot na pagsongko. Hapota an sadiri: ‘Arin na mga parapo sa brosyur an puede kong itampok tangani na ikapadagos an pag-oolay na iyan asin magbunga nin pag-adal sa Biblia?’ Kun kamo naghaharongharong, isipon kun anong mga tema an makaaakit sa sarong tinedyer, sarong mas may edad, sarong lalaki, o sarong babae. Repasohon an mga topiko sa brosyur, asin pumili nin tema na interesante. Pakatapos na pumili nin sarong paagi nin pagdolok, mag-ensayo nin nagkapirang beses. Ini saro sa mga liabe sa kapangganahan.
3 An suplemento sa isyung ini kan An Satong Ministeryo sa Kahadean nagtatao nin walong “Mga Suhestion Para sa Pag-atubang kan Brosyur na Kahagadan.” An kahon na “An Direktang Pagdolok” nagpapaheling kun paano gagamiton an brosyur sa pagpoon nin mga pag-adal. Puede nindong gamiton an enot na suhestion siring kan minasunod:
◼ “Aram daw nindo na sa laog sana nin pirang minuto, makukua nindo an simbag sa sarong importanteng hapot sa Biblia? Halimbawa, taano ta kadakol kan relihion na naghihingakong Kristiano? Napaghorophorop na daw nindo iyan?” Pakasimbag kan tawo, buksan sa leksion 13 asin pag-olayan an enot na duwang parapo. Kun itinotogot nin panahon, basahon asin pag-olayan an saro o duwang teksto. Dangan basahon an huring hapot na nasa itaas kan pahina, asin magsabi: “An ibang kabtang kan leksion nagtatampok nin limang midbidan nin tunay na relihion. Maoogma akong bumalik asin ipakipag-olay ini sa saindo.”
4 Magin Prosegido: Aprobetsaran an gabos na oportunidad na idemonstrar an pag-adal sa Biblia sa brosyur na Kahagadan. Arangon an bendisyon ni Jehova. (Mat. 21:22) Paagi sa pagprosegir sa saindong mga paghihingoa, puede nindong maeksperyensiahan an kagayagayahan nin pagtabang sa saro na maghimate sa maogmang bareta!