Kun Paano Nakikikooperar an mga Miembro kan Pamilya Para sa Lubos na Pakikikabtang—Sa mga Pagtiripon kan Kongregasyon
1 Dapat na himateon kan Kristianong mga pamilya an pagboot na magtiripontipon sa mga pagtiripon kan kongregasyon. (Heb. 10:24, 25) Paagi sa marahay na kooperasyon, an gabos puedeng magin mapanggana sa pag-andam, pag-atender, asin pakikikabtang sa mga pagtiripon. Laen-laen an kamugtakan nin pamilya, alagad may mga bagay na magigibo an Kristianong agom na lalaki, nagtutubod na agom na babae, o nagsosolong magurang tangani na paoswagon an pagkasararo nin pamilya sa espirituwal na mga bagay, dawa pira an aki sa harong asin ano man an saindang edad.—Tal. 1:8.
2 Magkaigwa nin Panahon sa Pagpreparar: An mga miembro kan pamilya nakikikooperar tangani na siertohon na an kada saro preparadong marhay para sa mga pagtiripon kan kongregasyon. An dakol iribang pinag-aadalan an artikulo para sa semanal na Pag-adal sa Torrengbantayan. An iba nagpepreparar para sa Pag-adal sa Libro kan Kongregasyon o nagbabasa kan semanal na babasahon sa Biblia bilang pamilya. An katuyohan iyo na ikalaog sa isip an pangenot na mga punto bago umatender sa mga pagtiripon. Paagi kaiyan, an gabos orog na makikinabang sa nadadangog asin masasangkapan na makikabtang kun may oportunidad.—1 Tim. 4:15.
3 Planohon na Makikabtang: An gabos sa pamilya maninigong magkaigwa nin pasohan na ipahayag an saiyang paglaom sa atubangan kan iba paagi sa pagkomento sa mga pagtiripon. (Heb. 10:23) Nangangaipo daw nin tabang o pamparigon sa boot an sarong miembro nin pamilya tangani na magibo ini? Anong tabang an kaipuhan nin kada saro sa pagpreparar nin mga asignasyon para sa Teokratikong Paadalan sa Pagmiministro? Pinahahalagahan nin mga agom na babae kun an saindang agom na lalaki nagpapaheling nin interes asin tibaad nagtatao nin ideya para sa sarong angay na ilustrasyon o sarong praktikal na eksena. Dai kaipuhan na mamatean nin mga magurang na sinda an maninigong mag-andam kan mga kabtang kan saindang hoben pang mga aki. An paggibo kaiyan puedeng makapogol sa inisyatiba kan mga aki. Alagad puedeng tabangan nin mga magurang an saindang hoben pang mga aki asin maghinanyog mantang nag-eensayo sinda nin makosog.—Efe. 6:4.
4 Mag-organisar Tangani na Makaatender: Puedeng tokdoan an mga aki poon na aki pa na magbulos asin mag-andam sa pagduman sa pagtiripon sa sarong itinalaan na oras. Maninigong makikooperar an mga miembro kan pamilya sa pag-asikaso sa mga gibohon sa harong tangani na dai maatraso.—Helingon an mga suhestion sa mga librong Kaogmahan nin Pamilya, pahina 112, asin Young People Ask, pahina 316-17.
5 An mga magurang asin aki pareho makapaghohorophorop sa mga tataramon ni Josue kan suanoy, na nagsabi: “Kun para sa sako asin sa sakong kasararo sa harong, kami maglilingkod ki Jehova.” Dangan magin desidido na makikooperar para sa lubos na pakikikabtang sa mga pagtiripon kan kongregasyon.—Jos. 24:15.