Pagpapayunir—Madonong na Paggamit kan Satong Panahon!
1 ‘Kadakol ko nang gigibohon! Talaga daw na madonong na ako magpoon nang magpayunir sa panahon na ini?’ Iyan an inisip nin sarong tugang na babae mantang naghihinanyog sia sa sarong payunir na magurang sa kongregasyon na iinaatubang an kabtang sa sarong pansirkitong asamblea na may temang “Mahigos na Pagpapadagos sa Ministeryong Pagpapayunir.” An sarong hoben na tugang na lalaki na kaibanan man sa mga nagdadangog nag-isip, ‘Paano nia natatawan nin lugar an pagpapayunir? Bako akong magurang sa kongregasyon, alagad an sakong buhay pano-pano na nin aktibidad!’
2 Mantang padagos na ipinaliliwanag kan magurang sa kongregasyon an mga bendisyon sa pagpapayunir, ininterbio nia an nagkapirang payunir sa sirkito na nagsabi kan mga pagliliwat na ginibo ninda tanganing makapagpayunir asin kun paano mayaman na binendisyonan ni Jehova an saindang mga paghihingoa. An saro biadi, an saro may agom na daing pagtubod, asin an saro binutasan an sarong kinabanon na karera alagad ta napagkanigo an saiyang entrada. Pakadangog sa kun paano an mga payunir na ini nakapanggagana sa tabang ni Jehova, an tugang na lalaki asin babae na kaibanan sa mga nagdadangog nagpoon na siyasaton liwat an saindang sadiring kaisipan asin mga kamugtakan. Inaagda niamo kamo na gibohon man iyan, nangorogna ta an ibinabang mga kahagadan na oras para sa payunir maaabot na ngonyan nin dakol pang parahayag kan maogmang bareta.
3 Aram niato na si Jehova an Kaglalang asin Unibersal na Soberano patin na utang niato an satong buhay sa saiya. (Dan. 4:17; Gibo 17:28) Malinaw para sa sato na si Jehova naggagamit nin saro sanang organisasyon. Kita may pribilehiong maglingkod nin maimbod kaiba kaiyan, na sinusuportaran “an fiel asin madonong na oripon” sa pagpatotoo sa Kahadean bago dumatong an katapusan. (Mat. 24:45; 25:40; 1 Ped. 2:9) Huling nabubuhay na sa poro kan “huring mga aldaw,” narerealisar niato na nauubos na an panahon na dapat na maghulit. (2 Tim. 3:1) Mientras tanto, kaipuhan niatong sustentohan an satong mga pamilya sa materyal na paagi. (1 Tim. 5:8) An entrada nin saro garo baga dai na nagkakaigo siring kaidtong nakaagi. Tibaad an satong salud bako nang arog kan dati. Asin sadiosan sana, gusto niatong magkaigwa nin kadikit na panahon asin kuarta na magagastos sa satong sadiri. (Ecl. 3:12, 13) Kaya tibaad mag-isip-isip kita kun baga an paghimate sa pangagda na magpayunir talagang madonong.
4 Nasa lambang saro na sa sato na maingat na siyasaton an sato mismong mga kamugtakan asin magdesisyon kun baga kita puedeng magpayunir. (Roma 14:12; Gal. 6:5) Nakaparirigon sa boot na mangnohon an padakol nang padakol na naghimate sa pangapodan na magpayunir. Sa ibong kan mga pangigipit asin problema kan huring mga aldaw na ini, an report sa paglilingkod na ipinublikar sa 1999 Yearbook nagpapaheling na haros 700,000 sa banwaan ni Jehova sa bilog na kinaban an mahigos na nagpapadagos sa ministeryong pagpapayunir. Baga man naglilingkod sa masakit na mga kamugtakan sa pagbuhay, mayong transportasyon, nakaeeksperyensia nin mga problema sa salud, o napapaatubang sa iba pang kadepisilan asin kasakitan, an mga tugang na lalaki asin babaeng ini dai napapagal sa paggibo nin karahayan, asin ini kaomaw-omaw. (Gal. 6:9) Inako ninda an alok ni Jehova na baloon sia. (Mal. 3:10) Naniniwala sinda na an pagpapayunir madonong na marhay na paggamit kan saindang limitadong panahon asin kuarta asin na totoong binendisyonan sinda ni Jehova huli sa paggibo kan kinakaipuhan na mga pagliliwat tangani na makalaog saka makapagdanay sa pagpapayunir.
5 Binebendisyonan an mga Payunir: An sarong tugang na babae sa Camerun na may sadit pang marhay na aking babae nagpaliwanag: “Poon kan sia mamundag, an sakong aki pirme kong kaiba sa ministeryo. Bago pa sia makanood na maglakaw, binabaktot ko sia, na segurado an pagkakabit paagi sa halabang pidaso nin tela. Sarong aga sa ministeryo, nagpondo ako sa sarong puesto sa bangketa. Naghale sa kataed ko an sakong aki, na dara-dara nia an nagkapirang magasin hale sa sakong bag. Nagpupuaypuay na naglakaw sia pasiring sa sunod na puesto. Minsan ngani dai siang gayo makataram, nakua nia an atension nin sarong babae asin sia nag-atubang nin sarong magasin. Talagang napangalas an babae na maheling an siring kasadit na aki na nakikikabtang sa aktibidad na ini. Tolos niang inako an magasin siring man an pag-adal sa Biblia sa harong!”
6 Bilang paghimate sa pangapodan para sa dakol pang auxiliary payunir, an sarong magurang sa kongregasyon asin payo nin pamilya sa Zambia na may bilog na panahon na sekular na trabaho nagdesisyon na mag-auxiliary payunir sa ibong kan saiyang sibot na iskedyul. Boot niang magtao nin halimbawa sa kongregasyon asin sa saiyang pamilya. Sa nagkapirang okasyon, ipinaparada nia an saiyang kotse sa gilid kan tinampo asin pinatatanog an An Sekreto sa Kaogmahan nin Pamilya na nasa audiocassette asin inaagda nia an mga nag-aagi na rumani asin maghinanyog sa binabasa nin makosog. Paagi kaiyan, nakapasakamot sia nin 16 na librong Kaogmahan nin Pamilya asin 13 librong Kaaraman, asin nakapoon sia nin duwang pag-adal sa Biblia.
7 An marahay na espiritu nin pagpapayunir nariparo man sa kataed na nasyon nin Zimbabwe. Durante kan Abril 1998, an sarong kongregasyon na may 117 parahayag nagreport nin 70 auxiliary payunir asin 9 na regular payunir. An saro pang kongregasyon na may 94 parahayag igwa nin 58 auxiliary payunir na nagreport. An saro pa, na may 126 na parahayag, nagreport na 58 an nagdesisyon na mag-auxiliary payunir kaiba kan 4 na regular payunir. Nagin pambihira an nakaaging taon nin paglilingkod sa Zimbabwe. Dawa ngani an mga tugang na lalaki duman sibot na gayo sa mga bagay na pampamilya, mga aktibidad sa kongregasyon, asin pagtogdok kan sangang opisina, sinda nagkonsentrar sa madonong na paggamit kan saindang panahon sa ministeryo.
8 Narerealisar kan mga payunir na an pagpoon sa pagpapayunir asin pagmamaigot na magdanay dian bakong depende sa saindang sadiring kosog. Sinda an enot na maadmitir na an ano man na nakakaya nindang gibohon posible huli ta sinda “nagsasarig sa kosog na itinatao nin Dios.” (1 Ped. 4:11) An saindang pagtubod pinangyayari sinda na gibohon an saindang ministeryo sa aroaldaw. Imbes na hanapon an saindang sadiring kagianan asin kaginhawahan, narerealisar kan mapangganang mga payunir na tangani na mahigos na makapadagos, tibaad nagkakaipo nin “dakulang pakikilaban,” alagad nag-aako sinda nin dakol na bendisyon bilang resulta.—1 Tes. 2:2.
9 An Halimbawa ni Pablo Angay na Arogon: Nakarekord sa Biblia an mga nagibo ni apostol Pablo sa ministeryo asin an marahay na tabang na itinao nia sa kadakol na tawo. Alagad ta, kun may siisay man na kadakol na gigibohon, iyan si Pablo. Tinagalan nia an paglamag asin pisikal na mga kasakitan tanganing ihulit an maogmang bareta asin pakosogon an mga kongregasyon. Kinaipuhan man niang tioson an sarong grabeng problema sa salud. (2 Cor. 11:21-29; 12:7-10) Determinado sia na madonong na gamiton an saiyang panahon. Inadmitir nia na nagibo nia an gabos niang gibohon sa tabang ni Jehova. (Fil. 4:13) Mayo sa mga tinabangan ni Pablo an may rason na magkonklusyon na an saiyang panahon asin paghihingoa sa paglilingkod ki Jehova nasayang o nagamit pa kutana nin mas marahay. Tara, kita nakikinabang pa ngonyan sa madonong na paggamit ni Pablo kan saiyang panahon! Kanigoan na inaapresyar ta an saiyang ipinasabong na hatol sa pagtabang sa sato na siyasaton an satong mga ipinaoorog asin magdanay sa katotoohan sa depisil na mga panahon na ini!
10 Ngonyan orog kisa kasuarin pa man, ‘an panahon na natatada sa paghulit kan maogmang bareta nainaan na.’ (1 Cor. 7:29; Mat. 24:14) Kun siring, angay na hapoton an satong sadiri, ‘Kun biglang matapos sa aga an sakong buhay, masasabi ko daw ki Jehova ngonyan na madonong kong ginamit an sakong panahon?’ (Sant. 4:14) Taano ta dai kaolayon si Jehova sa pamibi ngonyan, na sinisierto sa saiya an saindong pagmawot na madonong na gamiton an saindong panahon bilang saro sa saiyang mga Saksi? (Sal. 90:12) Mamibi para sa tabang ni Jehova na gibohon na simple an saindong buhay. Minsan ngani tibaad nagdesisyon na kamo kaidto na dai kamo makakapayunir, posible daw na ngonyan nanompongan nindo na puede nang magin kabtang kan saindong buhay an pagpapayunir?
11 Lubos na Pakinabangan an Saindong mga Kamugtakan: Siempre, huli sa mga kamugtakan bakong gabos na nagmamawot kaiyan makapag-iiskedyul nin 70 oras kada bulan tangani na maglingkod bilang regular payunir. Minsan siring, dakol na payunir an talagang nag-aareglo na magdusay nin 50 oras kada bulan sa ministeryo bilang auxiliary payunir sa pinakaparateng panahon na mapupuede o dagos-dagos. Kun an saindong mga kamugtakan sa presente masakit kaya dai nindo kayang mag-auxiliary o regular payunir, kosogi an saindong boot. Padagos na mamibi na logod magbago an saindong mga kamugtakan. Mientras tanto, kun bako talagang posible an mga pagliliwat, maranga kamo sa pakaaram na si Jehova naoogmang marhay sa ano man na nahihimo nindo nin bilog na kalag sa paglilingkod sa saiya. (Mat. 13:23) Saiyang naoobserbaran na kamo marigon na naninindogan sa saiyang lado asin na kamo nagmamaigot na marhay na magin fiel na parahayag na nungkang tinotogotan na lumihis an sarong bulan na dai inaaprobetsaran an mga oportunidad na makapagpatotoo. Tibaad puede kamong umoswag paagi sa pagpatarom kan saindong mga abilidad sa pagpapatotoo, na naghihingoang magin eksperto bilang parahulit asin paratokdo kan maogmang bareta.—1 Tim. 4:16.
12 Huling haranihon na an “dakula asin makangingirhat na aldaw ni Jehova,” kaipuhan niatong madonong na gamiton an natatada pang panahon tangani na matapos niato an gibohon na isinugo sa sato na gibohon. (Joel 2:31) Aram ni Satanas na halipot na sana an saiyang panahon, asin orog kisa kasuarin pa man, saiyang pinagmamaigotan na gibohon an gabos niang makakaya na gibohon na komplikado an satong buhay asin papangyarihon na magin depisil para sa sato na makapagkonsentrar sa totoong importanteng mga bagay. (Fil. 1:10; Kap. 12:12) Dai noarin man pagmenuson an pagmalasakit nin Dios sa saindo. Matatabangan kamo ni Jehova na magibong simple an saindong buhay asin magamit an saindong lubos na potensial sa ministeryo. (Sal. 145:16) Marahay sana ta dakol an nakanonompong, sa pagsiyasat liwat kan saindang mga kamugtakan, na puede na sindang umayon sa ranggo kan mga auxiliary o regular payunir. Tunay nanggad, nakanonompong nin hararom na satispaksion an mga payunir sa madonong na paggamit kan saindang panahon. Kamo daw magigin saro sa sainda?