Tinotokdoan Kita ni Jehova
1 Sa paggiya nin Dios an programa nin internasyonal na pagtotokdo ngonyan nagpupunsionar na sa 233 na nasyon. Mayo nin ano man na ikaaalok an kinaban na ini na makakokomparar dian. An satong Kaharohalangkaweng Paratokdo, si Jehova, tinotokdoan kita kun paano pakikinabangon an satong sadiri ngonyan mantang tinotokdoan man nia kita para sa buhay na daing sagkod.—Isa. 30:20; 48:17.
2 Mga Paadalan sa Pagtotokdo nin Dios: Estudyare an mga paadalan na sa presente kinokonduktahan para sa kapakinabangan kan banwaan ni Jehova. An Teokratikong Paadalan sa Pagmiministro, na kinokonduktahan nin semanal sa mga 87,000 na kongregasyon, sinasanay an minilyon na parahayag kan Kahadean na magin epektibong mga ministro kan maogmang bareta. Nagpalista na daw kamo dian? Kamo daw kabilang sa rinibong nag-adal na sa duwang semanang Paadalan sa Paglilingkod Bilang Payunir? Tibaad an ibinabang kahagadan na oras sa mga regular payunir pangyayarihon an dakol pa na magpayunir asin makualipikar na mag-adal sa paadalan na ini. An duwang bulan na Paadalan sa Ministeryal na Pagsasanay, na ngonyan kinokonduktahan sa mayor na mga lenguahe sa bilog na kinaban, sinasangkapan an mayong agom na kamagurangan asin ministeryal na mga lingkod na mag-ako nin orog pang teokratikong mga paninimbagan. Sa panapanahon, an gabos na magurang sa kongregasyon asin ministeryal na lingkod nag-aako nin espesyalisadong pagtotokdo sa Pankahadean na Paadalan sa Pagmiministro.
3 An mga pasilidad sa Sentro nin Edukasyon kan Watchtower sa Patterson, Nueva York, ginagamit sa pag-akomodar sa tolong espesyal na paadalan, na nagtatao nin mas halangkaw na gradong teokratikong pagsasanay. An limang bulan na kurso kan Paadalan sa Biblia kan Watchtower sa Gilead iinaandam an mga ministro para sa pagmimisyonero sa mga langtad sa ibang nasyon. An mga miembro kan Komite kan Sanga sa bilog na kinaban nag-aadal sa duwang bulan na kurso manongod sa pag-organisar kan sangang opisina. Kan Mayo 1999 nagpoon an bagong duwang bulan na kurso para sa nagbibiaheng mga paraataman na an klase may 48 estudyante hale sa Estados Unidos asin Canada. An gabos na lingkod ni Jehova sa katapustapusi nag-aako nin marahay na mga pakinabang sa pagsasanay na itinatao ni Jehova paagi sa manlaenlaen na paadalan na ini.
4 Tinotokdoan Para sa Anong Katuyohan? An sarong miembro kan Namamahalang Grupo nagsabi: “An satong programa nin pagtotokdo sa presente dinisenyo tangani na darahon an bilog na banwaan ni Jehova sa gabos na lugar pasiring sa marahay na kamugtakan nin pagkamaygurang na ilinadawan sa Talinhaga 1:1-4.” Padagos logod na tawan ni Jehova an lambang saro sa sato “kan dila kan mga tinokdoan.”—Isa. 50:4.