An Makahulang Tataramon nin Dios Gabos Maootob!
1 An Mga Saksi ni Jehova pirme nang interesado sa hula kan Biblia. Kaya naogma kitang maaraman na an tema kan nakaaging pandistritong kombension iyo an “Makahulang Tataramon nin Dios.” Galaga kita kaidtong maaraman an itinagama para sa sato ni Jehova na “kakanon sa igong panahon.” (Mat. 24:45) Dai nia kita sinudya.
2 Mga Tampok na Kabtang kan Kombension: An pahayag sa pinakatema kan Biernes, na “Mag-atento sa Makahulang Tataramon nin Dios,” kaiba an nagtatao nin kaliwanagan na pagtratar sa pagkasaysay kan transpigurasyon. (Mat. 17:1-9) Idinoon kaiyan na ngonyan mismo kita nasa pinto na kan pinakamarahay na mga panahon huli ta kita nasa poro nang marhay kan panahon kan katapusan, na an bagong sistema haranihon na! An sarong mahalagang paagi na kaipuhan niatong mag-atento sa Tataramon nin Dios iyo an regular na pagbasa kaiyan. An simposium na “Ikaogmang Marhay an Pagbasa kan Tataramon nin Dios” nagtao nin praktikal na mga suhestion tanganing gibohon an satong pagbasa sa Biblia na orog na kapakipakinabang asin nakagagayagaya.
3 Kan Sabadong hapon rinepaso niato an mga rason kun taano ta maninigo kitang magin kombensido na kita nabubuhay na sa huring mga aldaw. Magigirumdoman daw nindo an gabos na ini? Kan Domingong aga, ginibong buhay an hula ni Habacuc mantang nanodan niato na an satong kaaldawan kaparehong marhay kan saiyang kaaldawan asin na an importanteng mga pangyayari maabot sa dai na mahahaloy kun laglagon na ni Jehova an mga maraot asin iligtas an mga matanos. Nakua daw nindo an punto kan drama sa Biblia manongod ki Jacob asin Esau? Dapat na aktibo niatong pagmaigotan na kamtan an mga bendisyon hale ki Jehova, na linalabanan an espiritu nin pagkadaing labot asin pagkaindiperente.
4 Sarong Nakapupukaw nin Interes na Bagong Libro: Kanigoan an kaogmahan niato na maresibi an bagong libro, an Pay Attention to Daniel’s Prophecy! Daing duwa-duwa na binabasa na nindo an kawiliwiling publikasyon na ini. An espiker na nagluwas kaiyan nagsabi: “Apuera sa pira sanang detalye, an gabos na hula sa librong Daniel naotob na.” Bako daw na idinodoon kaiyan an pagkaapurado kan satong mga panahon?
5 Napakosog na marhay kan programa sa kombension an satong kombiksion na maootob an gabos na panuga nin Dios na dai pa naootob. Pinahihiro kita na padagos na ipahayag sa iba an makahulang tataramon nin Dios!