Hapot
◼ Siisay an may paninimbagan sa paglinig kan Kingdom Hall?
An Kingdom Hall na malinig asin nakaaatraer marahay an ipinababanaag sa mensahe na satong ihinuhulit. (Ikomparar an 1 Pedro 2:12.) Mahalagang marhay an pagpapadanay sa hall na malinig asin areglado, saka an gabos puedeng makikabtang sa pagmantener kaiyan. Dai niato maninigong laoman na pira sana an magdara kan bilog na pasan. Sa parate, iinaareglo an paglinig segun sa mga grupo kan Pag-adal sa Libro kan Kongregasyon, na an konduktor sa pag-adal o an saiyang katabang an nangengenot. Sa mga hall na labi sa sarong kongregasyon an nagtitiripon, oorganisaron kan kamagurangan an mga bagay-bagay tanganing an gabos na kongregasyon makapakikabtang sa pagmantener.
Paano niato pinakamarahay na maaasikaso an paninimbagan na ini? Maninigong linigon an Kingdom Hall sono sa regular na iskedyul. Maninigong igwa nin mga suplay asin kasangkapan na magagamit sa paglinig. An sarong listahan nin mga bagay na kaipuhan na gibohon maninigong nakapaskil kun saen puedeng konsultahon iyan kan mga nagtatrabaho para sa instruksion. Puedeng magkaigwa nin duwang laen na listahan, saro para sa lakop na kadikit sanang paglinig pakatapos kan kada pagtiripon asin an saro para sa mas sirot na semanal na paglinig. Maninigong iiskedyul kan konduktor sa pag-adal sa libro an sirot na paglinig sa aldaw asin oras na kombenyente para sa gabos na iinasignar. Maninigo man na magtao nin regular na atension sa natad na may masitas, mga burak, asin marambong na mga tinanom. An mga gilid nin dalan asin paradahan maninigong papagdanayon na mayong ati. Sa kada taon dapat na gibohon an lakop na paglinig, puedeng bago an Memorial. Puedeng kaiba digdi an paghugas kan mga bintana, lanob, asin paglaba nin mga kurtina.
Siempre, kita gabos puedeng mapagian an pasan paagi sa dai pag-apon nin chewing gum o pag-ati sa laog o luwas kan hall. Puede niatong areglaron an kasilyas pakatapos kan kada paggamit, na binabayaan iyan na malinig para sa masunod na magamit. Mag-ingat na dai mapasa an kasangkapan o maraot an muebles. Riparohon an mga dugta sa salog, raot na mga tukawan, mga problema sa instalasyon nin tubig, pundidong mga ilaw, asin iba pa, patin ireport tolos-tolos an mga bagay na ini sa tugang na nag-aasikaso kan mantension kan Kingdom Hall.
Kita gabos magin andam na gibohon an kabtang niato. Nakakokontribwir ini sa nakagagayagayang harong nin pagsamba asin ipinamimidbid kita bilang sarong malinig na banwaan na nagtataong onra ki Jehova Dios.—1 Ped. 1:16.