Ano an Sasabihon Nindo sa Sarong Ateista?

¹ “Ateista ako,” an sabi nin sarong propesora na taga Polandia sa sarong misyonera sa Aprika. Minsan siring, nahimo kan tugang na babae na makipag-olay sa babae asin tinawan sia kan librong Life​​—How Did It Get Here? By Evolution or by Creation? Kan bumalik an misyonera kan sumunod na semana, an propesora nagsabi sa saiya: “Bako na akong ateista!” Nabasa nia an bilog na librong Creation asin ngonyan naghagad na adalan sa Biblia. Ano an puede nindong gibohon tangani na magin mapanggana sa pagpatotoo sa mga nagsasabi na sinda dai nagtutubod sa Dios? Enot, estudyare an manlaenlaen na dahelan kun taano an mga tawo ta nagsasabi kaini.

² Mga Dahelan na Nakakokontribwir sa Dai Pagtubod: Bakong gabos na ateista pinadakula na siring kaiyan. An dakol naimpluwensiahan nin sarong klase nin relihion asin kaidto nagtutubod sa Dios. Minsan siring, an magabat na mga problema sa salud o pamilya o nagkapirang inhustisya na naeksperyensiahan ninda nakapaluya sa saindang pagtubod. Para sa iba, an mga kurso na itinotokdo sa mga eskuelahan nin mas halangkaw na edukasyon nagkaigwa nin negatibong epekto sa saindang ideya manongod sa Dios. Mangnoha an minasunod na mga halimbawa nin mga ateista na pag-abot nin panahon nakapatalubo nin makosog na pagtubod ki Jehova Dios asin nagin saiyang mga Saksi.

³ An sarong babae na taga Paris namundag na may nagpapaluyang helang sa tolang. Dawa ngani nabautismohan bilang Katoliko, sinabi nia na sia ateista. Kan hapoton nia an mga madre kun taano an Dios ta tinogotan sia na mamundag na may siring na diperensia, an saindang simbag: “Huli ta namomotan ka nia.” Habo niang akoon an daing kamanungdanan na ideyang iyan. Siring man, konsiderara an sarong hoben na taga Finlandia na nadiskobre na igwa nin dai nararahay na helang sa kalamnan asin nasa silyang de rueda. Dinara sia kan saiyang ina sa sarong Pentecostal na naghihingako na nakapararahay nin mga may helang. Alagad mayong nangyari na milagrosong pagpapaomay. Bilang resulta, an hoben na lalaki nawaran nin interes sa Dios asin nagin ateista.

⁴ An sarong lalaki na taga Honduras pinadakula na Katoliko alagad nag-adal nin pilosopiya asin ateismong Sosyalista. Nakombensir kan tokdo sa unibersidad na an katawohan bunga nin ebolusyon, sia nag-ontok na magtubod sa Dios. Kaagid kaiyan, an sarong babae sa Estados Unidos pinadakula na Metodista. Sa kolehio, sia nagkua nin sikolohiya. Paano naapektaran an saiyang pagtubod? Sia nagsabi: “Kan sarong tig-init rinaot ninda an bilog kong pagtubod sa relihion.”

⁵ Pagtaros sa Puso kan mga Sinsero: An dakol na indibiduwal na nagsasabi na sinda dai nagtutubod sa Dios pahahalagahan an pakaaram kun baga igwa nin solusyon sa mga problema nin maluyang salud, dai pagkaoroyon sa pamilya, inhustisya, asin iba pa. Sinsero an saindang interes na makua an simbag sa mga hapot na siring baga kan: ‘Taano ta nag-eeksister an karatan?’ ‘Taano ta may maraot na nangyayari sa marahay na mga tawo?’ asin ‘Ano an kahulogan nin buhay?’

⁶ An sarong mag-agom na nag-iistar sa Switzerland pareho pinadakula na ateista. Kan enot sindang makaolay manongod sa katotoohan, negatibo an reaksion ninda. Alagad igwa sinda nin magabat na mga problema sa pamilya asin nagpaplanong magdiborsio. Kan sumongko giraray an mga Saksi, ipinaheling ninda sa mag-agom hale sa Biblia kun paano mapanggaganahan an saindang mga problema. Nasorpresa an mag-agom sa praktikal na hatol na nasa Kasuratan, asin sinda uminoyon na mag-adal sa Biblia. Napakosog an saindang relasyon mag-agom, nag-oswag sinda sa espirituwal, asin sinda nagpabautismo.

⁷ Kun Ano an Puede Nindong Sabihon sa Sarong Ateista: Kun may magsabi sa saindo na sia sarong ateista, hingoahon na aramon an dahelan kun taano ta sinabi nia iyan. Iyan daw huli sa edukasyon na inako nia, mga problema na inagihan nia, o pagsaginsagin sa relihion asin falsong mga katokdoan na naheling nia? Puede nindong hapoton sia: “Iyan daw pirme an saboot nindo?” o “Ano an dahelan ta iyan an saindong konklusyon?” An saiyang simbag makatatabang sa saindo na determinaran kun ano an sasabihon. Kun kaipuhan an mapuersang mga argumento, an librong Is There a Creator Who Cares About You? tibaad iyo sana an kaipuhan.

⁸ Puede kamong makipag-olay sa sarong ateista paagi sa paghapot:

⁸◼ “Napaghorophorop na daw nindo: ‘Kun igwa nin Dios, taano ta grabe an kasakitan asin inhustisya sa kinaban?’ [Pasimbagon.] Togoti ako na ipaheling sa saindo an punto de vista kan Biblia manongod sa temang ini?” Basahon an Jeremias 10:23. Pakabasa kaiyan, hagadon an saiyang opinyon manongod sa teksto. Dangan ipaheling sa saiya an pahina 16 asin 17 kan brosyur na Will ­There Ever Be a World Without War? O, imbes, puede nindong gamiton an kapitulo 10 kan librong Creator. Alokon sia na akoon an publikasyon asin basahon an materyal.​—Para sa dugang pang mga suhestion, helingon an librong Reasoning, pahina 150-1.

⁹ Totoo na bakong gabos na ateista maako kan katotoohan. Alagad dakol an andam na konsideraron an ibang punto de vista. Gumamit nin lohika, pangongombensir asin, orog sa gabos, puersa kan Tataramon nin Dios tangani na matabangan sinda na masabotan an katotoohan.​—Gibo 28:​23, 24; Heb. 4:12.