Naghihimate daw Kamo sa Pagkamoot ni Cristo?
1 Sa paghorophorop manongod sa buhay kan saiyang Kagurangnan, si apostol Juan nagsurat: “Si Jesus, na namoot sa saiyang mga sadiri digdi sa kinaban, namoot sa sainda sagkod sa katapusan.” (Juan 13:1) Durante kan panahon na ini kan Memorial, an nasa isip niato iyo an pinakadakulang kapahayagan kan pagkamoot ni Cristo. Puede kitang maghimate sa pagkamoot na iyan paagi sa pagsagibo nin pagtubod sa pantubos, paagi sa pagkaigwa nin maigot na pakikikabtang sa paghuhulit asin, siring ki Jesus, paagi sa pagtagal “sagkod sa katapusan.”—Mat. 24:13; 28:19, 20; Juan 3:16.
2 Paghimate sa Pagkamoot ni Cristo: Si Jesus aktibong marhay kaidto sa ultimong semana kan saiyang buhay sa daga. (Mat. 21:23; 23:1; 24:3) Bilang mga paraarog ki Cristo, kita man napahihiro nin pagkamoot na ‘maghingoa nin maigot’ sa paglilingkod ki Jehova. (Luc. 13:24) Puede daw nindong aprobetsaran an mga areglo para sa dinugangan na aktibidad na paghuhulit ngonyan na Abril paagi sa pagdagdag nin oras na ginagamit nindo sa ministeryo?
3 Ngonyan na taon an Pamanggihan nin Kagurangnan natangod sa Mierkoles na banggi, Abril 19. Pira an magigin presente para sa makahulogan na okasyon na ini? Sa dakulang kabtang, iyan depende sa sato. Naggibo na daw kamo nin lista kan mga pinaplano nindong imbitaran—an saindong mga inaadalan sa Biblia asin iba pang interesado, paryente, kamidbid sa trabaho, asin kaeskuela? Nakontak na daw nindo sinda asin nagpaabot na daw kamo nin odok sa pusong imbitasyon? Pagigirumdomon daw nindo sinda pirang aldaw bago an Memorial? Kaipuhan daw ninda an tabang nindo sa pagduman? Iimbitaran man kan kamagurangan an siisay man na nagin inaktibo sa ministeryo. Baga man an Memorial gigibohon sa banggi nin ordinaryong aldaw kan semana imbes na sa katapusan kan semana importante pa man giraray na an gabos umatender.
4 Umatender na Preparado: Mahalagang marhay na kita preparado asin nasa tamang kaisipan kun kita nag-aatender sa Memorial. Sinadol ni Pablo an mga kapagtubod na isaisip an pagkaseryoso kan okasyon. (1 Cor. 11:20-26) Puede nindong basahon an kapitulo 13 sagkod 17 kan Ebanghelyo ni Juan durante kan saindong pampamilyang pag-adal sa Biblia dangan ipasaysay sa balang miembro kan pamilya kun ano an kahulogan para sa saiya kan atang ni Jesus. Dai man paglingawan na gibohon an aroaldaw na pagbasa sa Biblia para sa semana kan Memorial!
5 Hararomon an satong pagkamoot ki Cristo, asin iyan lampas pa nanggad sa Abril 19. Determinado kita na ipaheling an satong pagkamoot sa saiya sagkod lamang! An selebrasyon kan Memorial ngonyan na taon makatatabang sa sato na pakosogon an desisyon na iyan.