Igwa daw Kamo kan Espiritu nin Pagsakripisyo sa Sadiri?
1 An pagpahalaga sa daing kapasloan na ginibo ni Jesu-Cristo para sa katawohan maninigong pahiroon kita gabos na gamiton an satong mga abilidad, puersa, asin kosog sa mapagsakripisyong paagi. Nakikimaherak an Kasuratan: “Idolot nindo an saindong hawak na siring sa buhay na atang, banal, inaako nin Dios, sarong sagradong paglilingkod.” (Roma 12:1) An pagsiyasat sa sadiri sa panapanahon makatatabang sa saindo na helingon kun lubos na ipinaheheling nindo an siring kaiyan na klase nin espiritu sagkod na itinotogot kan personal nindong mga sirkunstansia.
2 Sa Pagmamaigot na Kamtan an Kaaraman sa Biblia: Nagtagama na daw kamo nin panahon para sa regular na personal na pagbasa asin pag-adal sa Biblia? Sinusundan daw nindo an iskedyul na iyan? Kaugalean daw nindong mag-andam na marhay para sa mga pagtiripon kan kongregasyon? Kun kamo sarong payo nin pamilya, igwa daw kamo nin regular na pag-adal sa Biblia kaiba kan saindong kairiba sa harong? An paggibo kan mga bagay na ini tibaad nangangaipo na isakripisyo an panahon na ginagamit sa pagdalan nin telebisyon o sa komputer o iba pang mga aktibidad. Minsan siring, kakadikit nanggad kan pagsakripisyo na iyan, sa pakaaram na an panahon na ginagamit sa Tataramon nin Dios makatatabang na magiyahan kamo pasiring sa buhay na daing katapusan!—Juan 17:3.
3 Sa Pagsasanay sa Saindong mga Aki: An pinakamarahay na panahon na magpoon na makanood kan dalan nin pagsakripisyo sa sadiri iyo an sa pagkaniaki. Tokdoan an saindong mga aki na minsan ngani may panahon para sa pagkawat, dapat na igwa man nin panahon para sa pagtrabaho asin para sa teokratikong mga aktibidad. (Efe. 6:4) Tawan sinda nin kapakipakinabang na gibohon sa laog kan harong. Mag-establisar nin regular na iskedyul na makikabtang sa ministeryo kaiba ninda. Dugangan nin puersa an pagtotokdo nindo paagi sa saindo mismong marahay na halimbawa.
4 Sa mga Aktibidad sa Kongregasyon: Napaooswag an kongregasyon kun an lambang saro na yaon dian naggigibo nin gikan sa boot na mga pagsakripisyo tangani na mahaman an mga bagay para sa kapakinabangan kan gabos. (Heb. 13:16) Posible daw para sa saindo na gumamit nin dugang pang panahon sa paghuhulit kan Kahadean asin paggibo nin mga disipulo? Puede daw kamong magboluntaryo na tumabang sa mga may helang o may edad na, na tibaad tinatabangan sinda sa transportasyon pasiring sa mga pagtiripon?
5 Bago ginibo an pangultimong pagsakripisyo kan saiyang buhay bilang tawo, hinatolan ni Jesus an saiyang mga disipulo na ikonsentrar an saindang mga mata sa intereses kan Kahadean, na ginigibo na segunda an gabos na iba pang bagay sa buhay. (Mat. 6:33) An pagmamaigot na magibo an siring na espiritu nin pagsakripisyo sa sadiri magtatao sa sato nin mas dakulang kaogmahan mantang padagos kitang naglilingkod ki Jehova na may paggayagaya.